MOU POS GANG HUKUNG ¹ Asing dara papanau ama de laka iye beka ubisara ma Lahatal gi ama nuka faring ugehuhung, wer di ama nuka de laka tata'un ama do bisara towarai de yang Lahatal mi rumai, hoko nang gi kir - kir yang ka Lahatal mia. ² Wer di gewarai faring moko da geyagal mang terui de Lahatal gi uyala oho dei ukana. ³ Da u hanokai ufan iye yap mang towarai de gi lolong oho geyagal, dobahe ama de gewarai oho gi hukung asing ba yang hota. ⁴ Ama lea Lahatal da ufan malaikat do ahala gaten gahup di gi gea oho neraka, ⁵ Nuh gi kofa giwel nang gowa din tidaroko oho do Lahatan mi ama ge dom, doba he mitowang mi faring mul mang dolai. ⁶ Afeng Sodom he Gemora del ara hida mang do lai oho ya hot ma ute tufa warai mode weka - mar nang ama do ge derang. ⁷ Lahatal da hot goa do u nuka, do usep de da nuka hama ba gaten doba he amanuka de hida madin oho beka ba da gaten ga'fup, ⁸ Lot da do gen da do mi may do u hida do u madin ya hot da ama ganai hama mia. Ama gi gaten da urui uwalel beka ruang ama gaten. ⁹ Lahatal da ama go gatan ama de dofeng ka kari gi geyagal, doba he ama de beka gaten ari aku Yesus gi hoka mai mia da ama gang hukung. ¹⁰ Ama de tafui takau de parenta gi beka ufan da dahokang, ama tang halang da mura gi ma nuka ba gal ipa, ¹¹ ya hot malaikat na ama teu mi gen ka ama gopupun yang ya Lahatal gaho gareng mia. ¹² Amanuka de kui - kafiu warai de kir - kir ka gowa, oho gopun de fayen ya hot ama do ya de kol, ¹³ amanuka de beka ahala gotohoka gi ihi di he beka ahala ba da gen uru tana ama ded oho do rupasai ba golelang. ¹⁴ Ama gi kareang oho tafui takau, ama gamona galal mai ie beka ba ma ama u gaboho. ¹⁵ Ama ded ie nuka ama ka gal, ama gi uyala oho iye de gal oya Bilean bin Beor, ba gal falupu oho hiyaka gi rupasai ge oho mi. ¹⁶ Doba he, keledai de lolong beka da mi gotai yahot amanuka gamaou kawal warai iye beka oho donuka ka gaten. ¹⁷ Amanuka de gi rupa iya geng de yang takat, tabekel de himor da gowa lia, papanau do ama gi geya. ¹⁸ Lolong nuka hama ba da ubisara doba he gi ihi ka goa, oho yahot gaten de amanuka de da gobisara oho gaten ama gom do u nuka boge. ¹⁹ Ama nuka de ama gopakang de ama gogatan doba he ama ded di he madal imon rai, ²⁰ Oho do, amanuka yang iye beka gaten hiyaka hoko gi de da gen Lahatal Yesus oho do pi gokarimang gapeke, doba he gi minuka mia Yesus Kristus Da wai hiyaka hoko ge dawai, ama de beka gaten gafuk oho tew mi towang beka. ²¹ Tew minuka ama de kaya iye nuka mi gaten garup oho mang goyepeng da do golelang galalai yahot pi wai gowa iye nuka ba pi ma ugehung doba he sebang Lahatal gi parenta da ka gegalul migatan migahub. ²² Ama nuka de gi gaten ge oho warai yahot ama de mi pin gen, ya hot kui da wai dawai di i karai, lai he fe de ama gawela gahopa waimang dawai ma para mi kira warai.