YESUS GADARA HINING NU O HOMIYAHA ALOLO. ¹ Yuwunun yang ji jawa lala mihi ara hamahang. Pli'i ba yuwunun yang mi du, Gadara hining ey plii. ² Yesus eey ta hele hi, nami lotinu, homiyaha om mi. ³ Ey loti du ey benye eng we mi. Ey du nami apese alaain di med dang. ⁴ Lahang na olo puyn di yaha, nami no'o di ano'o moling yaha. Ey lahang na olo di ahidi abutung. ⁵ Dilele dilele lowi id bra'ang benye eng ta, biin di ta lowi id, wuy puyn ya waha yahini anoo bamed. ⁶ Yel dumi du, ey lete dunu Yesus ahol. Ey mong te'eng ho'o, Yesus opong madang mi. Ey ye pelihi muding, Yesus opong madang mi. ⁷ Ey lowi id no'ohi, ey uubang do,oyn, "Aa ey naba lap ho'o we, Yesus Lahatala Ey Mati Lawen, ma ewana Lahatala Eni puyn, naring asara ey." ⁸ Wede'e Yesus Ey armating do'oyn, "Homiyaha ba ey oyndo, o waha o hiri mi du, hele yang!!" ⁹ No'ohi Yesus Ey eni uta'ayn, "Eninghana?" ey uuboro, "nening Legion". ¹⁰ Ey Yesus ara mating uulemi lolo, aa ni lolo bo beng la yang ey, bo doro mi. ¹¹ Dumi du bi towong yaha bin yele mi na adihe. ¹² Homiyaha du, ey uubang do'oyn, "Yesus, ni Ewana , ni howo bi nun om we la wa." ¹³ Yesus Ey uueneng. Bi piri ribolo yi yawa lala mihi we mi muyu mini ohang. ¹⁴ Ohowe nami ba bi uubu'ung du te'eng yang bang pli'i ana nami towong ara mating, Yesus o panene edunu. ¹⁵ Nami ba ho'o Yesus o lap ho'o. Nami ba homiyaha om mi di tabiringang. Wene puynang o tanut didi no ang. Oho we nomi ba ho'o dumi du baros o yaha. ¹⁶ Nami towong ba ho'o leng dumi du, Yesus ey homiyaha alolo, ahowo bi om mi la wa du, yang nami towong ara mating. ¹⁷ Duru we Gadara hining du nami Yesus ahowo yang beng leang. ¹⁸ Yesus Ey eey ta midi ya boro yo bo ey ba Ya ano'o tabiring du ho'o ebang, naring diara hama-hama lami. ¹⁹ Yesus Yaay, Ey uubang aaboro ooleleng oobala ta yang, Lahatala o uukarang du ooleleng oobala aramating. Du'uyn he ey ba Yesus ano'o tabiring du ey yang Yesus o uukarang o hadana. ²⁰ Duru we ey yang Dekapolis didi oyn puyn nami towong ara mating. Nami no'o ayr nu uuyahory yabobo. ²¹ Yel du ara hama, Yesus Ey yi jawa lala mihi o adi'ing mi. ²² Ohowe Sinagoge o opong turu du ening Yairus, ho'o Yesus ahol, ey Yesus opong madang mi. ²³ Ey dunu Yesus ahol, ey Yesus ewana, ey aytnono'o he Yesus ebang, ey uubang, "no oyobo kaay du bomo no'o mini. ma ee aatang med tapuyn ee du'uyn ee, ey tabiring, weseng. ²⁴ Duru we Yesus e Yairus hama-hama yangang. ²⁵ Dumi du ey obo nu obo malodi med tun ayrnu welingolang. ²⁶ Ey seng towong puyn ye ho'ongang yo bo omalodi mongta. ²⁷ yel du arhama du nami Yesus oolobong. Ya ma hi Yesus ara dumi. ey Yesus amotlolo yang nami noo towong mi huwi hanang. ²⁸ Ey obo du uubang, "na Yesus okondo we atol didi na tabiringang." ²⁹ Dumi du ey obo owi ba tawoyl he du ta'atang. ³⁰ Yesus Ey ahol, natahoyr du awaha ahiri mi du helang. Duruwe ya yadimi yaboro ohowe ya uubang do'oyn, "aana yo no kondo atol?" ³¹ Ohowe Yesus o skol eyknewe aramating do'oyn, "nami towong o labubung, aaus, aahodo doro we edun me, aa uubanghi aana yo na tol?" ³² Ohowe Yesus aadiming aaboro aana yo Dokondo atol. ³³ Ey obo du ahol ya tabiringang. Ey baros o yaha. Ey ho'o Yesus ewana uubang dooyn na ookondo atol duruwe na tabirigang. ³⁴ Noohi Yesus Ey ey obo ara mating do'oyn, " no'oy, atino'o aauntu snang aholang, aa tabiringang ba aaboro." ³⁵ Yesus dey matinghe hi nami piri den moyn Sinagoge o nami turu o bangmi ho'ang. Oo ey minang ba woy Guru armating ey. ³⁶ Nami ho'o uubang bo Yesus Ey dangpain. Ey nami turu du Ey aramating do'oyn, "bros ey! O atino'o ahol duru, oouw dumi duru." ³⁷ Ohowe, Yesus, Petrus, Yohanis yo dopo la yang. Nami beng ata'ay dang. ³⁸ Yuwunun yang Sinagoge o namituru o bang mi he nami labubung he, nami den ahain he. ³⁹ No'ohi Yesus Ey nami no'o towong aramating, "tro'oynwe yi bra'ang? med yi ahayn didi? ey oyndo ey mini dang bo ey mopo he" ⁴⁰ Duruwe nami Yesus mong o yala bo Yesus nami dumi du alolo loling lahele. No'ohi Yesus Ey owo omong olowi, o skoleyknewe didi ara hama-hama yang leng ba ey mi tarahe du mi. ⁴¹ Ohowe, Yesus Ey eyka'ay du aatangapuyn, Yesus Ey ey obo du ara mating, "TALITAKUM" (Ohiri hi no'oy ka'ay weleng toho!). ⁴² Eyka'ay obo du tohang. Ohowe, lamiang. Duruwe nami no'o ayrnu uuyahoyr. Eyka'ay obo du o uur, tun ayrnu weling oolo. ⁴³ Ohowe Yesus Ey eyka'ay owo omong du atiting du'uyn ee, nami uuara mating eiy. No'ohi owo omong ara mating, eyka'ay du na en adi.