HUR NABABA BA PI VENG BANANG SE TAVA VENGANI ¹ Kaku naung serang naung, eke ing toang omi mi angu iava ma tubing ula ing di vomung vala,angu ba iini ateing ping ba vomung vala angu mi nu se ne veng tadang taning bot ukur tamadi angu ba nehe ma pi nang. ² Ping emampi pi ahalang ue naba ari nu omimi. angu ba nubaba ava rasa hula hemateng omimi angu bae mi ahala niang, angu se Aing ba nehe molo una, bot anae boa ipi angu veng liko. ³ Pi sar metma kuda ai veng parta aulang e ana pi a mulung, bot ping di kuda e boa ipi angu emampi veng liko. ⁴ Bot uling kampal angu naung, masiking etabit ele bot enar ele iaoling , kampal e uling angu etabit kiki arunge , aing ba kampal e tiri angu veng ebang. bot ana tang adang ila di neha alapa angu ba e jaling. ⁵ Aulang di, tajabur anga kiki nu ue pi boa ipi anga veng, arunge tajabur anga ana ava tajaning ue nababa ele angu omimi. Uling ahing banaha angu etabit berang arunge Ad viring kiki nu angu ana edet atepul. ⁶ Tajabur anga emeng hula ad viring bot jasi ahala ae por alolang tang, ue metma pi boa ipa anga veng a pina, bot aing ba pi boa ipi anga emang pi ajasing. seng e ana pa a betang e lamal e tahi angu ening a viring di seba , andi tutung herek omimi viring. ⁷ Angu ba binanta palevang emampi bot dung , bot binanta mang era bot binanta ba poe tang omi mi a beta angu naung bot manusia ana ening amunang ila. ⁸ Arunge ne nu anga bae ajabur angu ening amunang ahala sehi. Tajabur anga kavasar jasi bot bae tening rama niang bot ransong ue omi aving baning veng amina. ⁹ Tajabur angu ba ping vaning aung hama ening met mutu Yesus bot Timang Lahatala e dana , Arung ba se Aing angu di ana vala metma nehe ba Lahatala Ana ahami e ateni angu adana. ¹⁰ Tai omimi anga ba tajani palevang, bot vala di ni hela. kaku naung serang naung , ba e emeng hula aulang niang. ¹¹ Aulang se, jar eng nu kolang angu ana jar makara bot jar tama angu hama hama a totut mi nu kolang niang ? ¹² Kaku naung serang naung , aulang se kumi angu e hi veng se zaitun e hi molo; niang he anggur e hi angu veng sekumi hi molo ? Aulang di ba, jar eng va makara angu ana bae jar tama omimi totut hela niang. UKUR E ANDE BANG ARU ¹³ Ing anga naung nubaba hur ateing bot mang garati? kilang e abetang angu ening ana aung hama ana ava ening balea hur ateing omimi , Aulang he ana nababa veng karajang se nehe met e tuving. ¹⁴ Arung ba se iini have iomi alil makara angu eu ing veng bot a betat ia va anamang, inang kokolang ue omimi se iini eke iava tajaning bot mola e una angu aing lawang ekang. ¹⁵ Hur dal aulang angu ba e doe atela mi hela niang, arunge por alolang e, bae roh hamulang omimi niang bot jasi ahala. ¹⁶ Ave iomi bot iava oit atela angu mi angu se tota orang, jasi ahala angu ba iini veng karajang. ¹⁷ Hur dal doe atela mi hoa angu e halomang angu molo una seng se tomi nu taha nu tomi tejajahi, moleng haleng, bot tomi met teteleleng , bot ening aung hama , bot tapang veng kalalang niang. ¹⁸ Molo una ehe ehi angu nehe ba nehe ening iot tomi nu taha nu angu ana met omimi barehak varai.