OMI MET NEHE TOANG ANGU E JAHI ¹ Kaku naung serang naung omi anamang ba mutu Yesus Kristus omimi angu, iini eke metma nehe e tubing se ake paul abang ekang. ² Iini kalu taing veng e toang pina, senge nehe i ba hoa e ma angu, ana kila ba huling e jala angu metma atang mi, bot pakiang ba e bili ele angu ba ana pake se hoa e ma, jol uang adana angu ba nehe masiking e sakiang angu naung hoa e ma angu, iini pakiang karita e manisa angu ba paket hoa. ³ Bot nehe ba pakiang e bili ele pake angu, iini e uling e ateing ening alus- alus seng se iini hur metma e maring, " Alang ma mana aung anga mi mihi," arunge nehe ba masiking angu iini at mateng, " ang mo mi tahi," niange " Hela nia ela ang mi mihi !" ⁴ Anguse emeng hula iini taing paul taing a bang ila, bot iukur e i andet jasi angu ba me veng piling e veng taloul ila. ⁵ Kaku e serang naung ba na nomi metma i jahi, vengme veng hela ! Taang mi Lahatala Ana nehe ba por alolang ateing se hula ana masiking, angu Lahatala ana ing veng talail ila, aulang e iomi anamang omi angu mi iini kudi kavasa e bisa Lahatala e abang sanang ba Ana metma nehe ba iomi metma Lahatala e jahing angu naung veng iapalaing angu naung , ing di kudi harak e ateing ? ⁶ Aulang arung ba se, nehe ba masiking angu iini e hura. Iini ateing niang nehe ba kavasa angu ba ing pariku bot iat ila metma piling e taloul vala angu apang adang mi ? ⁷ Ing angu ba Lahatala amal hamulang angu, e hura e mananti angu e bele ba nehe ia ru angu ? ⁸ Iini kalu parentae molo ba ue Lahatala e surat hamulang omi mi angu iini veng karajang, " E veng banang hula nehe toang nehe rae angu iomi metma i jahi, " emeng hula e boa ipi angu ede denang angu se e molo ba iini veng karajang ba angu. ⁹ Arunge iini kalo manusia angu paul e avang, angse iini jasi ahala angu ba veng karajang ba angu bot ing angu ba parenta angu pariku ba angu. ¹⁰ Nubaba parenta angu emampi ea mulung, arunge ana bae nu kolang ea mulung niang ang muse ana bae emampi a mulung niang ila ba angu. ¹¹ Aulang base , Aing ba veng banang hula , " Eke buha." Aing amba bot veng banang, " EKe nehe a meang. " Aulang base pi bae buha niang, arung e pi kalu nehe a meang, angus pi parenta angu tang tahi ba angu. ¹² Mateing e hubai bot medi e pina angu ening emeng hula nehe ba mi nu se ne adang taaning ot va ila parenta angu e halang angu eda denang. ¹³ E veng banang hula tadang taaing angu bae tejajahi angu ateing niang, tejajahi angu ana tadang taaning angu aing uuntung. TOMI ANAMANG ANGU E KARAJANG MA VENG NIANG SE AMINA. ¹⁴ Kaku naung serang naung, nehe nu hula omi anamang ue arunge ana va e e karajang me veng ping niang se e gunang ba naba? Omi anamang angu ot bisa va ila salamat angu ateing ? ¹⁵ E kaku e e serang nu e pakiang niang, bot aadang nananang angu ana etatabit omi metmaveng mea, ¹⁶ Arunge iini metma e maring, " Aung ba lamal, aung hama metma eoa, niange e boa ipa angu kudi tutung angu harak bot ubal e barang metma eoa arunge nababa e boa ipi parlu angu iini bae metma aing veng aping niang se e gunang ba naba ? ¹⁷ Aulang di ba iomi anamang angu, iomi anamang angu kalu e karajang ma veng apina niang se iomi anamang angu amina. ¹⁸ Arunge nehe iba ue veng banang hula, " Ing iomi anamang veng , bot naing e karajang veng." Na veng maring , omi anamang e karajang veng niang angu ana eke ma tuving, aulang e nebot nomi anamang e bot e karajang eveng anga na matuving. ¹⁹ Iini iomi metma veng anamang se hula lahatala angu nu. angu molo. roh jasi ahala angu naung di iomi metma veng anamang bot iini tavavar. ²⁰ hai ing ba nehe kamuke angu naung ! iini hula iava veng aniveng banang hula tomi anamang e karajang veng apina niang angu mang parasasumang. ²¹ Taang mi timang Abraham, Lahatala aing ening ot molo karna e karajang angu e bele, e veng banang hula oal mehal ishak, ana hula metma sarada ening met Lahatala enang ? ²² Ulinng, tomi anamang e bot e karajang angu ole hama -hama karajang aulang base e karajang angu va ila tomi anamang angu ot taing kanap. ²³ Aulang e nababa surat hamulang veng banang angu ot taing kanap, " Abraham ana omi metma Lahatala veng anamang, bot aing angu nehe veng rekeng e veng taanang metma e molo ening, " bot Lahatala e serang ening. ²⁴ Aulang base iini ateing veng banang hula e karajang angu ba nehe bot va ila molo, ual tomi anamng ba enang kolang. ²⁵ Aulang di ba Rahab nehe jangu jasi ahala angu, veng rekeng ot va ila molo angu harak , e veng banang hula ana Israel e vagal bala angu naung iot iava vaning bihit metma via abeung oat ila ? ²⁶ Aulang base emeng hula pi boa ipi anga teing hara veng niang se ana amina, angu se tomi anamang ang di e karajang veng niang se ana amina.