¹ Sobab tu, Yesus pogi ke Bukit Zaitun. ² Pagi-pagi botul, Dio datang ka Bait Allah dan samuo orang datang samo-Nyo. Dio duduk dan mangajar orang tu. ³ Lalu, patuah-patuah Taurat dan orang-orang Farisi mambawa saorang parompuan nang katauan babuat zina, dan sasudah manompatkan parompuan tu badiri ditonga-tongah orang tu, ⁴ Orang tu bacakap samo Yesus, "Guru, parompuan tu tatangkap basah waktu sodang bazina. ⁵ Hukum Taurat Musa mamarintahkan kito bak malempari parompuan samacam ni samo batu. Apo pandapatmu tontang hal ini?" ⁶ Orang tu mancakapkannyo ondak mancuboi Yesus supayo orang tu punyo alasan ondak manjobak Yesus. Sobab tu, Yesus mambungkuk dan samo jari-Nyo, Dio tuliskan di tanah. ⁷ Korno orang tu torus manorus mananyoi Dio, Yesus togak dan bacakap ka orang tu, "Orang nang tak badoso diantaro kalian ondaklah dio manjadi nang partamo malempar parompuan ni samo batu." ⁸ Lalu, Yesus mambungkuk lagi dan manulis di tanah. ⁹ Katiko orang tu mandongar hal tu, orang bapogian satu par satu, dari nang tuo, dan Yesus ditinggalkan orang tu sandiri, samo parompuan tu nang ado togak di tongah-tongah tu. ¹⁰ Lalu, Yesus togak dan bacakap ka parompuan tu, "Hai parompuan, ka manokah orang tu? Tak ado orang nang ondak manghukummu?" ¹¹ Jawab parompuan tu, "Tak ado, Tuhan." Yesus bacakap, "Aku pun tak ondak manghukummu. Pogilah, samonjak hari ni, jangan mambuek doso lagi." ¹² Sobab tu, Yesus bacakap ka orang banyak tu, katon-Nyo, "Akulah torang dunio. Siapo sajo orang nang ondak ikut Aku takkan bajalan dalam kagolapan, malainkan mandapat torang hidup." ¹³ Sobab tu, orang-orang Farisi bacakap ka Yesus, "Engkau basaksi tontang diri-Mu sandiri, makonyo kasaksian-Mu tak botul." ¹⁴ Yesus manjawab orang tu, kato-Nyo, "Sakalipun Awak basaksi tontang diri-Ku sandiri, kasaksian-Ku iolah botul korno Aku tau dari mano Aku datang dan ka mano Aku pogi, tapi kau tak tau dari mano Aku datang dan ka mano Aku pogi. ¹⁵ Kau manghakimi ondak cara kadagingan, sedangkan Awak tak manghakimi siapo pun. ¹⁶ Korno tu, saumpamo Awak manghakimi, panghakiman-Ku itu botul korno Awak tak manghakimi saorang diri, sabaliknyo samo Bapa nang manyuruh Aku. ¹⁷ Sobab tu, dalam kitab Tauratmu tatulis sobab kasaksian duo orang iolah bonar. ¹⁸ Awak basaksi tontang Diri-Ku sandiri dan Ayah nang manyuruh Awak basaksi tontang Awak. ¹⁹ Sobab tu, orang tu batanyo pada-Nyo, "Dimanokah Ayah-Mu?" Yesus manjawab, "Kau tak mangonal Awak maupun Ayah-Ku, bilo kau mangonal Awak, kau jugo mangonal Ayah-Ku." ²⁰ Parkatoan ni Yesus sampekan di dokat parbendaharaan pas Dio mangajar di Bait Allah, tapi tak saorang pun nang manangkap Dio korno waktu-Nyo bolum tibo. ²¹ Torus tu, Yesus bacakap lagi ka orang tu, "Awak akan maninggalkan kau dan kau akan mancari Awak, tapi kau akan mati dalam dosa. Kamano Awak akan pogi, kau tak biso datang." ²² Torus tu, orabg-orang Yahudi tu bacakap, "Apokah Dio ondak bunuh diri korno Dio bacakap, 'Kamano Awak ondak pogi, kau tak biso datang'?" ²³ Tapi, Yesus bacakap ka orang tu, "Kau barasal dari bawah, tapi Awak barasal dari atas. Kau barasal dari dunio ni, tapi Awak tak dari dunio ni. ²⁴ Sobab tu, Awak bacakap ke kau sabotulnyo kau akan mati dalam doso kau korno bilo kau tak parcayo samo-Ku, kau akan mati dalam dosa-dosamu." ²⁵ Torus tu, orang tu batanyo ka Dio, "Siapo Kau?" Yesus manjawab orang tu, "Awak sudah mangatokannyo sojak awal. ²⁶ Ado banyak hal tontang kau nang harus Awak katokan dan hakimi, tapi Dio nang manyuruh Awak iolah botul dan apo nang Awak dongar dari Dio, itulah nang Kusampekan ka dunio." ²⁷ Orang tu tak paham bahwa Yesus sodang bacakap ka orang tu tontang Ayah. ²⁸ Dan korno tu, Yesus bacakap, "katiko kau sudah maninggikan Anak Manusia, pas tu lah kau kan tau bahwa Awak iolah Dio, dan bahwa tak ado satupun nang Awak buat dari diri-Ku sandiri, malainkan Awak mambilangkan apo nang dilatih Ayah ka Awak. ²⁹ Dan, Dio nang manyuruh Awak ado basamo-samo dengan Awak, Dio tak maninggalkan Awak sandiri korno Awak torus malakukan hal nang bakonan ka Dio. ³⁰ Pas Yesus mambilangkan samuanyo tu, banyak orang parcayo samo-Nyo. ³¹ Torus tu, Yesus bacakap ka orang-orang Yahudi nang parcayo ka Dio, "Bilo kamu totap dalam firman-Ku, kau bonar-bonar murid-Ku, ³² dan kau akan mangorti kabonaran, dan kabonaran tu kan malopaskan kamu. ³³ Orang tu manjawab, "Kami iolah katurunan Abraham dan tak pornah manjadi hamba siapo pun. Jadi, mangapa Kau bacakap, "Kau akan bebas?" ³⁴ Yesus manjawab orang tu, "Sabotulnyo, Awak bacakap ka kau, tiap orang nang mabuat doso iolah hamba doso. ³⁵ Saorang hamba tak tinggal dalam sabuah kaluargo untuk salamanyo, tapi saorang budak tinggal untuk salamanyo. ³⁶ Jadi, bilo Anak mambebaskan kau, kau botul-botul bebas. ³⁷ Awak tau bahwa kau katurunan Abraham, tapi kau ondak mambunuh-Ku korno ajaran-Ku tak mandapat tompat di dalam kau. ³⁸ Awak mangatokan tontang hal-hal nang sudah Awak tengok basamo Ayah-Ku, samo jugo kau mangkarojokan hal-hal nang kamu dongar dari ayahmu." ³⁹ Orang tu manjawab dan bacakap samo-Nyo, "Abraham iolah Ayah kami." Jawab Yesus, "Bilo kau katurunan Abraham, kau ondaknyo mangkarojokan apo nang Abraham karojokan. ⁴⁰ Tapi, kau barusaha mambunuh Awak, orang na mangkasitamu kabonaran, nang Awak dongar dari Ayah. Abraham tak mangkarojokan hal tu. ⁴¹ Jadi, kau hanya mangkarojokan apo nang dikarojokan ayahmu sandiri." Orang tu bacakap samo-Nyo, "Kami tak dilahirkan dari hasil parzinaan. Kami punyo satu Ayah, yaitu Allah. ⁴² Yesus bacakap ka orang tu, "Bilo Allah iolah Ayahmu, kau kan mangasihi Awak korno Awak datang dan barasal dari Allah. Dan, Awak datang taklah atas kamauan-Ku sandiri, malainkan Dio nang manyuruh Awak. ⁴³ Apo sobabnyo kau tak mangorti apo nang Awak katokan? Itu korno kau tak bisa mandongar firman-Ku. ⁴⁴ Kau barasal dari ayahmu, yaitu ta'un dan kau ondak malakukan kamauan-kamauan ayahmu. Dio iolah pambunuh dari samonjak partamo dan tak bapegang samo kabonaron di dalam dirinyo. Bilo dio bacakap bongak, dio mambilangkannyo dari tingkahnyo sandiri korno dio iolah pambongak dan ayah pambongak. ⁴⁵ Tapoi, korno Awak mambilangkan kabonaran samomu, kau tak parcayo samo-Ku. ⁴⁶ Siapo diantaro kau nang biso mangiyokan bahwa Awak badoso? Bilo Awak mangatokan kabonaran, mangapo kau tak parcayo samo-Ku? ⁴⁷ Siapo pun nang barasal dari Allah, dio mandongarkan firman Allah; itulah sobabnyo kau tak mandongarkannyo korno kau tak barasal dari Allah." ⁴⁸ Orang-orang Yahudi manjawab Yesus dan bacakap samo-Nyo, "Botul bukan kolok kami mangatokan bahwa Kau iolah orang Samaria dan Kau karasukan ta'un?" ⁴⁹ Yesus manjawab, "Awak tak karasukan ta'un, tapi Awak manyogani Ayah-Ku, tapi kau manyogani Awak. ⁵⁰ Tapi, Aku tak mancari kamuliaan buat diri-Ku sandiri; ado Satu nang mancarinyo dan nang manghakimi. ⁵¹ Sabotul-botulnyo, Awak bacakap samomu, satiap orang nang patuh firman-Ku, dio tak kan pornah manengok kamatian." ⁵² Orang-orang Yahudi bacakap ka Yesus, "Sakarang kami tau bahwa Kau memang kamasukan ta'un! Sobab, Abraham dan para nabi pun sudah mati. Tapi, Kau bacakap, 'Satiap orang nang patuh firman-Ku, dio tak kan pornah marasakan kamatian.' ⁵³ Apokah Kau lobih bosar daripada Abraham, ayah kami, nang sudah mati? Para nabi jugo sudah mati; Samo siapo Kau samokan diri-Mu?" ⁵⁴ Yesus manjawan, "Bilo Awak mamuliakan diri-Ku sandiri, kamuliaan-Ku tu tak ado artinyo; Ayah-Kulah nang mamuliakan Awak, nang tontang-Nyo kau bacakap, "Diolah Allah kami." ⁵⁵ Tapi, kau tak mangonal Dio, tapi Awak mangonal Dio; bilo Awak mambilangkan bahwa Awak tak mangonal Dio, Awak manjadi pambongak, samo macam kau, tapi Awak mangonal Dio dan Awak patuh firman-Nyo. ⁵⁶ Ayahmu, Abraham, basukacita korno dio kan manengok hari-Ku. Dio sudah manengoknyo dan basukacita." ⁵⁷ Lalu, orang-orang Yahudi tu bacakap samo-Nyo, "Umur-Mu sajo bolum ado 50 taun, tapi kau sudah manengok Abraham?" ⁵⁸ Yesus bacakap ka orang tu, "Sabotulnyo Awak mangatokan samomu, sabolum Abraham ado, Awak sudah ado." ⁵⁹ Korno tu, orang tu mangambek batu buat malempari Dio, tapi Yesus marondokkan dan maninggalkan Bait Allah.