¹ Yesus bacakap, "Sabotulnyo, Aku mambilangkan samomu, orang nang masuk ka kandang domba tapi tak lewat pintu, malainkan dengan mamanjat malalui jalan lain, orang tu iolah pancuri dan parampok. ² Tapi, orang nang masuk lewat pintu, diolah gembala domba. ³ Baginyo, panjaga pintu mambukakan pintu, domba-domba mandongar suaronyo, dan dio mamanggil domba-dombanyo sandiri dengan namo orang tu, torus manuntun orang tu ka luar. ⁴ Abis mangaluarkan samuo dombanyo, dio bajalan di muka orang tu dan domba-dombanyo mangekor samo dio korno orang tu mangonal suaronyo. ⁵ Orang asing tak orang tu ekori, tapi orang tu akan lari dari dio korno orang tu mangonal suaro orang-orang asing." ⁶ Parumpamaan tu lah nang dibilangkan Yesus samo orang tu, tapi orang tu tak mangorti apo nang barusan Yesus bilangkan samo orang tu. ⁷ Sobab tu, Yesus bacakap lagi samo orang tu, "Sabotulnyo, Aku bacakap samomu, Akulah pintu ka domba-domba tu. ⁸ Samuo orang nang datang sabolum Aku iolah pancuri dan parampok, tapi domba-domba tak mandongar orang tu. ⁹ Akulah pintu. Bilo saorang masuk lewat Aku, dio akan disalamatkan, dan akan kaluar masuk, jugo manomukan padang rumput. ¹⁰ Pancuri datang hanya untuk mancuri, mambunuh, dan malonyapkan; Aku datang agar orang tu mampunyoi hidup, dan mampunyoinyo sacara balobih-lobih. ¹¹ Akulah gambalo nang baek; gambalo nang baek mangasi nyawanyo samo domba-dombanyo. ¹² Orang nang diupah, nang bukan gambalo, nang bukan punyo domba-domba tu, manengok sarigalo datang, dio maninggalkan domba-dombanyo tu dan balari; sarigala tu kan manorkam dan mamisahkan domba-domba tu. ¹³ Dio lari korno dia orang nang diupah dan tak ponting samo domba-domba tu. ¹⁴ Akulah gambalo nang baek. Aku mangonal domba-domba-Ku dan domba-domba-Ku mangonal Aku. ¹⁵ Samo macam Ayah mangonal Aku dan Aku mangonal Ayah; dan Aku mangkasi nyawa-Ku samo domba-domba tu. ¹⁶ Aku jugo punyo domba-domba nang laen nang tak dari kandang ni; Aku harus mambawak orang tu jugo, dan orang tu akan mandongar suaro-Ku; dan orang tu akan manjadi satu kalompok dengan satu gambalo. ¹⁷ Korno inilah Ayah mangasihi Aku, sobab Aku mangkasi nyawa-Ku supayo aku dapat mangambeknyo balek. ¹⁸ Tak ado saorang pun nang udah mangambeknyo dari-Ku, malainkan Akulah nang mangkasinyo sasuai kamauan-Ku sandiri. Aku punyo hak mangasi nyawa-Ku, dan Aku jugo punyo hak mangambeknyo balek. Inilah parintah nang Aku dapat dari Ayah-Ku." ¹⁹ Sakali lagi, ado parpocahan di antaro orang-orang Yahudi korno parkatoan Yesus. ²⁰ Banyak dari orang tu nang bacakap, "Dio kamasukan roh jahat dan manjadi gilo. Mangapo kamu mandongarkan Dio?" ²¹ Nang laen bacakap, "Itu bukan parkatoan orang nang kamasukan roh jahat. Bisokah roh jahat mambuka mato orang nang buto?" ²² Pas maso tu, hari rayo penahbisan balangsung di Yerusalem. Pas pulak musim dingin, ²³ dan Yesus lagi bajalan di Bait Allah, yaitu di Serambi Salomo. ²⁴ Abis tu, orang-orang Yahudi bakumpul mangalilingi Dio dan bacakap samo-Nyo, "Barapo lamo lagi Kau biarkan jiwa kami bimbang? Kok Kau Kristus, bilangkanlah torus torang samo kami." ²⁵ Yesus manjawab orang tu, "Sudah Kubilang samo kamu, tapi tak yakin. Korjaan-korjaan nang Aku lakukan dalam namo Ayah-Ku, itulah nang mangkasih kasaksian tontang Aku. ²⁶ Tapinyo, kamu tak yakin korno kamu tak masuk kiro domba-domba-Ku. ²⁷ Domba-domba-Ku mangonal suaro-Ku, Aku mangonal orang tu dan orang tu ikut Aku. ²⁸ Aku mangkasih hidup kokal samo orang tu, dan orang tu takkan pornah binaso; dan tak saorang pun dapat marobut orang tu dari tangan-Ku. ²⁹ Ayah-Ku, nang sudah mangkasih orang tu samo-Ku, lobih bosar daripado samuo, dan tak saorang pun dapat marobut orang tu dari tangan Ayah. ³⁰ Aku dan Ayah iolah satu." ³¹ Sakali lagi, orang-orang Yahudi mangambek batu untuk malempari Yesus. ³² Tapi, Yesus bacakap samo orang tu, "Aku sudah manunjukkan samomu banyak karojoan baek dari Ayah, karojoan mano dari samuonyo nang mambikin kamu ondak maluntar Aku samo batu?" ³³ Orang-orang Yahudi tu manjawab Dio, "Bukan korno suatu korjaan baek kami ondak malempari Kau samo batu, malainkan korno hujat; dan korno Kau, nang hanyo saorang manusia, manjadikan diri-Mu Allah." ³⁴ Yesus manjawab orang tu, "Bukankah tatulis dalam Kitab Tauratmu, "Aku sudah bafirman, Kamu iolah allah'? ³⁵ Bilo Allah manyobut orang tu nang manarimo firman tu 'allah', padahal Kitab Suci tak biso dibatalkan, ³⁶ Apokah kamu bacakap tontang Dio nang sudah Ayah kuduskan dan utus ka dalam dunio, 'Kau manghujat,' korno Aku bacakap samo kamu, 'Aku iolah Anak Allah'? ³⁷ Bilo Aku tak malakukan korjaan-korjaan Ayah-Ku, jangan parcayo samo-Ku. ³⁸ Tapi, kolok Aku mangorjokan korjaan-korjaan tu, meskipun kamu tak parcayo samo-ku, parcayolah akan korjaan-korjaan tu supayo kamu tau dan mangorti kolok Ayah di dalam Aku, dan Aku di dalam Ayah." ³⁹ Sakali lagi, orang tu mancoba manangkap Yesus, tapi Dio lolos dari orang tu. ⁴⁰ Abis tu, Yesus pogi lagi manyaborangi sunge Jordan manuju ka tompat Yohanes partamo kali mambaptis dulu dan Yesus tinggal disana. ⁴¹ Banyak orang datang samo-Nyo dan bacakap, "Meskipun Yohanes tak mangorjokan satu tanda ajaib pun, tapi samuo nang dikatokan yohanes tontang orang ni botul." ⁴² Dan, banyak orang manjadi parcayo samo-nyo di sano.