¹ Sasudah kami malewatinyo jongon salamat, kami mangatahui namo pulau itu Malta. ² penduduk asli pulau itu luar biasa elok hatinyo. sabab sidak manyalokan api jongon manyambut kami sadonyo karano saat itu mulai hujan jongon udara nyo pun dingin ³ Katiko Paulus mangumpukan ranting-ranting jongon malatakkannyo di ate api, saikku ula baludak kalua karano hangek lalu malilik tangan Paulus. ⁴ katiko panduduk asli maliek binatang babiso tu bagantung di tangan Paulus, sidak mangeccek satu samo lain, "Indak diragukan lai, urang ko iyolah saurang pambunuh. Walaupun inyo ala salamat dari laut, Kaadilan indak nakkan mampadiakannyo hidup." ⁵ Namun, paulus mangibaskan binatang tu ka dalam api dan inyo indak mandarito luko apo pun. ⁶ Urang-urang tu mangiro Paulus akan mambangkak ato tajatuh dan mati saat tu juo. Namun, satala sidak lamo manunggu jongon indak maliek sasuatu na salah tajadi padonyo, sidak barubah pikkiran jongon mangatokan banwo Paulus iyolah dewa. ⁷ Suatu saat, di sakitar tampek tu, ado tanah punyo pamimpin di pulau tu na banamo Publius, na manyambut kami dan menjamu kami jongon ramahnyo salamo tigo hari. Waktu tu, ayah Publius tagolek di tampek tidu karano damam dan disentri. Paulus datang untuk manjanguk jongon mandoakannyo, lalu manumpangkan tangannyo ka ate urang tu jongon mancegakkannyo. ⁹ Satala paristiwo tu tajadi, urang-urang lainnyo di pulau tu na sadang sakkik juo datang kapado Paulus jongon dicegakkan. ¹⁰ Sidak juo samakkin manghormati kami dan katiko kami dan katiko kami siap balayar, sidak manyadiokan sagalo sasuatu na kami parlukan. Paulus Manuju Kota Roma ¹¹ Satala tigo bulan balalu, kami balayar di dalam sabuah kapal dari Aleksandria, na balabuh di pulau tu salamo musim dingin jongon mamakke Dioskuri sabage lambangnyo. ¹² Satala tibo di Sirakusa, kami tingga di sinun salamo tigo hari. ¹³ Dari sinun, kami balayar manyusuri pantai dan tibo di Regium. Barisuknyo, angin salatan batiup, dan pado hari barikutnyo, kami tibo di Putioli. ¹⁴ Di sinun, kami manjumpoi babarapo saudaro saiman dan di undang untuk tingga basamo sidak salamo tujuh hari. Lalu, kami pai ka Roma. ¹⁵ Dan, saudaro-saudaro saiman di sinun, katiko mandanga tantang kami, datang dari sinun sampe ka Forum Apius jongon Tres Taberne untuk manjumpoi ami. Saat Paulus maliek sidak, inyo basyukur kapado Allah dan hatinyo dikuekkan. Paulus di Kota Roma ¹⁶ Katiko kami sampe di Roma, Paulus dibisakan untuk tingga sandirian, jongon saurang prajurit na mangawalnyo. ¹⁷ Tigo hari kamudian, Paulus mangumpukan pamimpin-pamimpin Yahudi satampek, dan satala sidak bakumpu, inyo mangeccek kapado sidak, "Saudaro-saudaro, meskipun ambo indak malakukan apo pun na malawan bangsa kito ato adat istiadat nenek moyang kito, tatapi ambo disarohkan sabage saurang tahanan dari Yerusalem kapado tangan urang-urang Roma. ¹⁸ Katiko sidak ala mamarikso ambo, sidak nandak mambebaskan ambo karano indak ado alasan untuk hukkuman mati bagi ambo. ¹⁹ Akan tatapi, karano urang-urangh Yahudi kebaratan, ambo tapakso naik banding kapado kaisar, indak bararti ambo mampunyoi tuduhan untuk malawan bangsa ambo. ²⁰ Jadi, itulah sababnyo, ambo ala mamintak untuk mangeccek jongon kau karano ambo di kabek jongon rantai ko demi pangharapan Israel." ²¹ Lalu, sidak mengeccek kapado Paulus, "Kami indak manarimo surek tantangkau dari Yudea dan indak ado saincek pun dari saudaro-saudaro saiman na datang ka sikko untuk mangagi kabar ato mangatokan sasuatu na buruk tantang kau. ²² Namun, kami nandak mandanga darikau apo pandapek kau karano tantang sekte ko, kami tau bahwo di mano-mano urang-urang manentangnyo." ²³ Katiko sidak ala manantukan sahari untuk Paulus, sidak datang kapado Paulus di tampek panginapannyo, basamo sarombongan uryang banyak. Dari pagi sampe malam, Paulus manjelaskan kapado sidak jongon basaksi tantang karajaan Allahdan barusaho mayakinkan sidak tantang Yesus, elok dari Hukkum Taurek Musa, maupun kitab paro nabi. ²⁴ Babarapo urang manjadi yakin malalui apo na dikatokan Paulus, tatapi na lainnyo manolak untuk piccayo. ²⁵ Katiko sidak indak satuju satu samo lain, sidak pun pai satala Paulus mangatokan parnyatoan ko, "Memang benar apo na dikatokan Roh kudus kapado nenek moyangkau malalui Nabi Yesaya, ²⁶ Pailah kapado bangsa ko dan katokanlah: Kau akan mandanga, tatapi indak nakkan pana mamahami, dan kau akan maliek, tatapi indak nakkan pana mangarti. ²⁷ Sabab, hati bangsa ko ala manaba dan talingonyo barek untuk mandanga. Sidak tala manutup matonyo. Supayo, jangan sidak maliek jongon mato sidak, mandanga jongon talingo sidak, mangarti jongon hati sidak dan babelok. Kamudian, Ambo akan mancegakkan sidak.' Yesaya 6;9-10 ²⁸ Karano itu, padialah hal ko kau katahui bahwo kasalamatan na dari Allah ko ala disampekan kapado bangsa-bangsa lain dan sidak akan mandangakan." ²⁹ Satala Paulus manyampekan pakatoan-pakatoan tu, urang-urang Yahudi pai jongon banyak pabedaan pandapek di antaro sidak. ³⁰ Paulus tingga salamo duo tahun panu di rumah na disewanyo sandiri dan manyambut sadonyo urang na datang kapadonyo, ³¹ sambi mambaritokan Karajaan Allah dan mangajar tantang Yesus Kristus jongon panu kabaranian dan tanpa rintangan apo pun.