¹ Mengiti paam ledo-ledo, tunuk na pala' lakei nem, apan na buk un neng ata ire ya' ence baya' daau katuk Tuhan, sinteng ra nai mengenal so'on puyan tiga met ledo ra, ² buk ire mena'at, mengempei dite bue ngan teneng urip ledo ra. ³ Nyem ufa kebara' dite penyilung nem mase awang lu, keba'an dite buk ya' dulu bang manyam, un mat, ngan un sapai ira' tiga, ⁴ aken empei nem ufa ke petula' dite peniga atai nem, puyan ya selima, peging brue ya see' un, ketu' puyan inye tiga neng mate Tuhan ti. ⁵ Mengiti na dite ledo-ledo ya' bue atai met aring a nebara dite penyilung ra, yaiti ledo-ledo ira' menyente tebelom ra pala' Allah ti; ire tunuk pala' lakei ra, ⁶ kua' keba'an dite Sara ti tunuk pala' Abaraham ti ngan uyai iye seleket tuen a. Ikam ini anak-anak a, buk nem uyai puyan ya' tiga ngan ence takut pala' kadep ja'at ya ikam sekening. ⁷ Ngiri paam lakei-lakei, murip na see' lu ngan ledo nem, ire na kelunan ira' lema'! Kun nira keba'an dite tuyang ya' kua' ke petuk urip ngan ikam apanna sebayang nem ence un ato. ⁸ Ngan ple'e, pekua' isiu ngan atai nem, lesau na senganak-senganak nem peging selum ngan puyan ya selima', ⁹ Nyem ufa' menyua' puyan ja'at ngan puyan ja'at, ngiri pa tira' ja'at ngan tira' ja'at, aken tiga naam mencai se peniga, ufanna inye kadep Tuhan ti bai ikam, ya'iti apan nem ala' peniga urip met Iye. Ufanna: ¹⁰ "I' ufa' un urip ngan mena'at dau-dau ya' tiga, tiga nira jaga' jela' ra met ira' ja'at peging ujon ra met isiu-isiu ira' baka' ¹¹ Mengesu' urip a met ketu' ira' ja'at ngan uyai puyan ya' tiga. ¹² Ufanna mate Tuhan ti mena'at kelunan ira' teneng, kelinge-A sekening daau pengeyat ra' pala' Iye, aken silung Tuhan ti menyakat kelunan-kelunan ira' uyai ja'at." ¹³ I' ya ufa' ke uyai ja'at pala' ikam, buk ikam tangen uyai puyan ya' tiga? ¹⁴ Aken buk ikam tai tuyen neng usun puyan ya' teneng, inye se peniga urip tuk ikam. Nyem takut' pala' ineu ya' ire takut ngan nyem tai seregen. ¹⁵ ngaran Kristus ti, Iye Tuhan dalem atai nem! Mipa na daau isiu dulu ya' bang ke puteu tebelom urip nem ngan isiu ya' selima, puyan ira' tiga, ¹⁶ peging atai ya' bue', apanna ire ya' peja'at ikam neng dite urip nem ya' teneng dalem Kristus, tai se'e neng usun tira' ja'at ra. ¹⁷ Ufanna, masa' tiga lu tuyen neng usun puyan tiga, buk inye kadep Tuhan ti, neng o lu tuyen usun puyan ja'at. ¹⁸ Kristus ti lepek matai so'on ketu' penyala' lu, Iya ya lan tuk kelunan ira' sala' apan-A sinteng engkin ileu pala' Allah ti; Iye ya lepek matai dalem use-A ngan murip peluet dalem Brue-A, ¹⁹ dalem Brue iti, Iye tai bara' kemenangan-A pala' brue-brue ira' un dalem lamin sepen, ²⁰ yaiti pala' brue-brue ya' ence baya' daau katuk Tuhan daleu sengkasan pengurip Nuh ti da, aken Allah ti pedena' kimet-A pekena ire daleu Nuh ti ke pelepek uyai kapen ja'au. Bang kedu'ut lu' kelunan ira ence matai lenyet so'on meso sungai ja'au, un aye use kadu' ra. ²¹ Na' kini, ikam diselamatkan so'on baptisan a (se kedana' lu' inye, empei inye sinteng ngebue' ano dalem urip nem un, aken se pengenyat apanna Allah ti na' atai ya' bue), neng dite kenai Yesus Kristus ti beti' met patai-A, ²² Iye ya' ke uku' mase ta'au Allah ti, kena A tai ko' surga, Iye lepek uyai mung malaikat, kuasa, peging kekuasaan tunuk pala' Iye.