¹ Buk mengiti, bet na ketu puyan ja'at, atai ya baka', kimet ja'at, sakit atai, ngan tira baka'. ² Tiga na'am murip kebaan dite anak ya lepek nai musang, ya ufa' telang ite' ya bue' ngan tiga, apanna ikam nai ja'au ngan un keselamatan, ³ buk ikam lan-lan lepek tisen peniga Tuhan. ⁴ Nai na pala' Iye, bateu ya murip iti, ya' kelunan lepek bet, aken (Allah) ti lepek menile' ngan pempau (Iye). ⁵ Ikam se kua' ngan batu urip, ya' sinteng ka pedeng se lamin rohani, imamat ya' bue', seleket se pengencai rohani umet Yesus Kristus pala' Allah ti. ⁶ Ufanna un tebara' dalem kitab ya' bue iti: "Atek lan, Aki' lepek pelek ko Sion ti, se bateu penuso', se bateu suka' ya maan, i' ya' mengelan pala'-Iye, empei ra ketai se'e un. ⁷ Tuk ikam, ya' mengelan, maan ale a, aken pala' ire ya' ence mengelan: "Iti se bateu ya' tukang-tukang lamin lepek bet, aken (bateu iti) tai jadi se bateu suka', ngan lepek jadi bateu ya' uyai dulu petatek ngan laset." ⁸ Ire ya' tai petatek neng a, ufan ra ence baya' daau isiu Tuhan ti; kelunan ira menginye, ufan tuk puyan inye (Tuhan ti) menile' ire. ⁹ Aken ikam na kelunan' ya lepek (Tuhan ti) menile, imamat ya' ja'au, lebu' ya bue', kelunan ya un dalem Tuhan, apanna ikam tai bara' mung puyan ja'au ya' Iye uyai, Iye lepek bai ikam kawang met entem ko ufan-A ya' dema: ¹⁰ ikam, met penaring a empei nem kelunan ya' mirip dalem Tuhan ti un, aken na kini murip dalem Tuhan, aring da empei nem un dalem pengelesau (Tuhan ti) un, na' kini (ikam) un dalem pengelesau-A. ¹¹ Senganak-senganak ya' aki lesau, aki pekatuk nem, buk ikam se sakai ya' tai peselai, mengesu' na urip nem met puyan ira' ja'at, ya' menyakat pala' kadep brue lu. ¹² Baya' na urip ya tiga neng aang kelunan-kelunan Yahudi, apanna buk ire peja'at ikam kua ngan kelunan ja'at, ire sinteng mena'at met puyan-puyan nem ya' tiga ngan pempau Tuhan ti, keba'an dau, daleu A nai tegu' ire. ¹³ Baya' daau kadep Allah ti, tiga naam tunuk pala' mung pengenja'au dalem adet nem, pala' raja-raja ya' engkang pengayeng empau, ¹⁴ pala' wali-wali ira' un pengayeng ke mukum kelunan ja'at ngan mengempau kelunan ira' uyai puyan tiga. ¹⁵ Ufanna ini na kadep Allah ti, ufa ikam ke uyai puyan ya tiga, apan nem sinteng ke uyai kelunan budok ya' bang tira ja'at, ence sinteng pisiu. ¹⁶ Murip na kua' ngan kelunan ya' lepek merdeka, ncem ba'an dite ire ya' bang mekep puyan ja'at ra ngan kemerdekaan iti. Aken murip na ke ba'an dite ula' Allah ti. ¹⁷ Tunuk na pala' mung kelunan, lesau na senganak-senganak nem, takut na pala' Allah ngan tunuk na pala raja nem! ¹⁸ Hoi ikam, ula'-ula' tunuk na ngan takut pala' tuen nem, ncem pala' ire ya' tiga ngan selima' pala' ikam lu, pala' ire ya' luai buteng se. ¹⁹ Bang ufan so'on pengelesau Tuhan ti lu' dulu sinteng menyi'un penuyen ya' ence harus iye nyiun. ²⁰ Ufanna, buk ikam un penuyen so'on penyala' nem tengen, sinteng lu kume a se pengempau ngaran lu? Aken buk ikam uyai puyan tiga, ngan so'on inye nem tai siu' penuyen, inye na se puyan ya' empau neng jume Tuhan ti. ²¹ Inye kadep Tuhan ti bai ikam, ufanna Kristus ti lepek siu tuyen so'on ikam ngan lepek bara' se puyan ya tiga, apan nem sinteng tai baya' asat-A. ²² Empei A uyai puyan ja'at un, ngan le'e empei un tira' baka' dalem ba'-A ti un. ²³ Daleu A siu tira' ja'at, empei A se-se menyakat ngan tira' ja'at un, daleu A tai siu penuyen, empei A se-se bara' kadep-A ke petuyen dulu peluat un, aken bang nyat pala' Iye ya' sinteng ke mana'at ketu' penyala peging mukum puyan sala' ngan teneng. ²⁴ Iye tengen lepek menyi'un ketu' penyala' lu dalem use-A tengen daleu dulu salib Iye. Apanna ileu ya' lepek matai so'on penyala' lu, murip peluet neng asat ya' teneng. Ufan so'on suat-A ya' un sukung use-A ti lu nai muat. ²⁵ Aring da ileu lepek lingeu keba'an dite domba da, aken na' kini ikam nai peluet pala' gembala ya' petubo brue nem.