¹ Uy bala samadikan, amun ada urang kajuhukan manjawat panyalah, kolai nya rohani harus mamulakakan urang uba inyan agan roh kalomutan. Bajaga-jaga tam akai kolai siku pan jangan junjumpatan. ² Tantulukan tam manangung beban nan akai kolai mantaatai Hukum Kristus. ³ Amun ada urang maangap dirinya penting, padahal bilanya uba inyan, inya manipu dirinya siku. ⁴ kahonanya satiap urang mauji kalakuanya siku. Jadi inyan,inya suba am bangga agan dirinya siku tapi bilanya obai mambanikannya agan urang bukai. ⁵ Sobab, satiap urang harus manangung bebannya siku. ⁶ Sopa nya mandapatan ajaran dari firman Allah harus mambagian samua hal nya baik inyan agan urang nya malajarainya. ⁷ Jangan tatipu. Allah ntah ulih dipermainan obai urang pacaan manuai apa nya inya tabur. ⁸ Urang nya manabur dari nafsu kadagikan pacaan manuai kaburukan dari kadagikannya. Tapi, urang nya manabur dari Roh pacaan manuai hidup kekal dari Roh. ⁹ Jangan kita nyadi lomah bajawat kabaikan. Amun musimnya datang,kita pacaan manuai asal kita ntah manyorah. ¹⁰ Karna inyan, amun kita dapat kasompatan, ayu am kita bajawat kabaikan agan samua urang, hususnya ka kaluarga dalam iman. ¹¹ Tiatam maha bosar bala huruf nya kutulis agan tanganku akai kolai. ¹² Sia nya hona mampangkakan kabaikan dari bala jolu nya lahiriah pacaan mamosa kolai akai disunat. Sia malabuhan hal inyan akai ntah dianiaya demi salib Kristus. ¹³ Sia inya di sunat pan ntah mamatuhai Hukum Taurat, tapi kahona sia kolai disunat akai sia ulih mambangaan diri agan sunat kolai nan. ¹⁴ Mudahan tam aku ntah kala mambangaan diri kacuali dalam salib Tuhan kita, Yesus Kristus. Malaluai salib-Nya, dunia jadi disaliban akai aku, dahan aku akai dunia. ¹⁵ Disunat atau pan ntah disunat apa jam artinya. Nya penting inyanan manyadi ciptaan baharu. ¹⁶ Pakai samua urang nya manjalatan aturan ini, biaram damai sejahtra dahan rahmat turun akai sia dahan akai Israel umpu Allah. ¹⁷ Ahirnya,jangan ada urang nya mampersulit aku obai aku mambaba bala tanda Yesus dalam tubuhku. ¹⁸ Bala samadikan, mudahan tam anugrah Tuhan Yesus Kristus ada sasama agan roh kolai. Amin.