¹ Demi kamerdekaan, Kristus jadi Mambebasan kita am. karena inyan, badiri teguh tam dahan jangan honak di bebanai agan kuk Perbudakan. ² Dingaanam! Aku, Paulus, mangataannya ka kolai aman kolai manarima sunat, Kristus ntah ada gunanya akai kolai. ³ Sakali lagi, aku mangataan ka satiap urang nya manarima sunat bahawa inya wajib manurutai saluruh Hukum Taurat. ⁴ Amun kolai bausaha akai dibonaran agan manjalatan Hukum Taurat, hidup kolai jadi dipisahan dari Kristus dahan kolai maningalan Anugerah. ⁵ Malaluai Roh, agan Iman, kita tantungu baharap agan kabonaran. ⁶ Sobab, dalam Yesus Kristus, basunat atau pan ntah basunat bila ada artinya. Baya iman nya bakaroja malaluai kasih nya ada artinya. ⁷ Kolai jadi bajalan baik am, sopa pani nya mahalakai kolai mantaatai kabonaran ni? ⁸ Nya mahaupai inyan bilanya datang dari Inya nya mamangil kolai. ⁹ "Sedikit ragi pan manjawat samua adonan Ngomang." ¹⁰ Aku percaya agan kolai dalam Tuhan obai kolai tidak akan manarima pamikiran nya bukai. Tapi, sopa pan nya mangacauan kolai pacaan manangung hukupannya. ¹¹ Jadi bala samadikan, amun aku ija mambritaan sunat, maapa aku ija dianiaya? Amun uba inyan, Batu sandungan akai salib jadi disingkiranam. ¹² Aku baharap sia nya maasuh kolai inyan pacaan mangabiri dirinya siku. ¹³ Bala samadikan, kolai nan mardekaam. Tapi kamardekaan kolai inyan jangan dipakai akai hidup dalam daging, tapi layatai tam urang bukai dengan kasih. ¹⁴ Obai, saluruh Hukum Taurat digenapai dalam satu Firman ini, "Kasihai tam sasama kolai manusia uba diri kolai siku." ¹⁵ Amun kolai saling mangotap dahan manolan, hati-hati tam kolai jangan mambansaan siku manyiku. ¹⁶ Jadi, aku mangataan, hidup tam dalam roh, maka kolai tidak akan malabuhan bala jolu nya dikahonaai nafsu kadagingan. ¹⁷ Kahona nafsu kadagingan balawatan agan kahona roh, dahan kahona roh balawatan agan kahona kadagingan, obai kaduanya saling balawatan, akai kolai ntah malabuhan jolu nya kolai kahonaai. ¹⁸ Tapi, amun kolai di dalam pimpinan roh, kolai ntah ada di babah Hukum Taurat. ¹⁹ Pakarojaan nafsu kadagingan jadi jelas am, inyanam dosa seksual,kacomaran, hawa nafsu, ²⁰ manyomah berhala, kuasa golap, kaboncian, pakalahian, hiri hati, emosi nya ntah takandali, kapentingan diri siku, perselisihan, perpocahan, ²¹ kacamuruan mabuk-mabukan, pesta pora, dahan sejenisnya. Aku pringatan ka kolai inini uba nya jadi aku pringatan sabolumnya, sopa nya malabuhan bala hal inyan tidak akan mawarisai Krajaan Allah. ²² Tapi, buah roh inyanam Kasih, suka cita, damai sejahtera, kasabaran, karamahan, kabaikan, kasatiaan, ²³ kalomah lomutan dahan panguasaan diri. Ntah ada hukum nya malawan bala jolu Inyan. ²⁴ Sia nya nyadi umpu Yesus Kristus jadi manyaliban nafsu kadagingan agan sagala nafsu dahan kahonaknya. ²⁵ Amun kita hidup agan roh, kahonaknya kita bajalan sasuai agan roh. ²⁶ Jangan kita somong, saling maasuh atau saling hiri dengki.