1
Udah yok, Yesus angkat re enta yok serto sampai di kuto asal-Neh, lalu balo murid-Neh tamai semuo.
2
Watu ari mingu, Yesus nemulo ngajar di rumah gerijo. Serto bangat ura te mednin-Neh ngeraso iran, serto ngumung, ''Re ni Neh buleh semuo utan yok? Penumut apo te di berik ngau-Neh tamai ute aneh-aneh upo yok dipulah ngau jari-Neh?
3
Aso endo salah Neh yok tuka kayu, anak Maria, serto sentuo Yakobus, Yoes, Yudas, serto Simon? Balo menyadik betinok Neh ado dituk besamo ngau kito?'' Lalu sidok pun ketauk sapo Neh, serto endo pecayok ngau Neh.
4
Udah yok, Yesus ngumung ngau sidok, "Dini-dini ura tentu hormat ngau seura Nabi, kecuali enta asalneh kedirik, serto di tengah balo menyanakneh kedirik, tamai di dangau neh kedirik."
5
Yesus endo tauk mulah mujizat din lagik, selain ngeletak jari-neh enta ura te pedih serto nyemuh sidok.
6
Lalu, Neh iran ute sidok endo pecayok. udah yok, Neh pun angkat bekelilin ke kampo-kampo samil ngajar.
7
Neh pun ngumai keduo belas murid lalu ngutus sidok bekaban duo ura, serto merik sidok kuaso ngau nangkis roh te jai'i.
8
Lalu, Neh pun bepesan ngau sidok isok sidok endo ngemaik balo utan anti'k bejalai, selain ngemaik tungkat, nusah ngemaik rute, nang ngemaik tas, apo lagik duit ringit enta ikat pinga samo sekalik nusah,
9
tapi tauk ngau senal serto nusah ngaqu baju belapis duo.
10
Lalu, Yesus ngumung ngau sidok, "Dini genno kitak tamok ke dalam dangau, nugau diok sampai kitak keluar re yok.
11
Serto, bilo ado te endo nerimok kitak tamai endo kok mednin kitak, watu kitak angkat re yok budau debu te lekat dikaki kitak isok ngau ngingat bagi sidok."
12
Lalu, sidok pun angkat tamai merik kabar berito ute semuo ura arus betubat.
13
Sidok pun ngusir bangat sitan serto ngusuk minyak zaitun ngau ura pedih, tamai nyemuh sidok.
14
Rajo Herodes gok mednin tenta Yesus ute damo-Neh udah te kenal mulah mujizat-mujizat te bekerjo didalam-Neh.'
15
Te lain madah "Neh yok Elia," tapi te lain madah Neh gok seura nabi, salah sikuk re balo nabi."
16
tapi, watu Herodes mednin hal yok, neh ngumung, "Yohanes te udah aku panco kepaloneh, udah bangkit lagik!"
17
Sajo Herodes kedirik te udah nyuruh ura nangkap Yohanes, serto maso neh dalam penyaro demi Herodias, bini sentuo neh, Filipus, ute Herodes udah kawin ngau Herodias.
18
Kebok, Yohanes berapo kalik madah ngau Herodes, "Endo benar nuan ngamik bini sentua nuan."
19
Ute piyok, Herodias bisi'k dedam ngau Yohanes serto mau'k munuhneh, tapi neh endo tauk.
20
Ute, Herodes takut ngau Yohanes te neh ketauk Yohanes yok ura benar serto suci, Herodes pun ngelidno neh.senta Herodes mednin Yohanes, neh jadi sangat bingung, tapi Herodes sangat gago mednin Yohanes.
21
Tapi, Sento ari te tepat, watu Herodes pas ula taunneh mulah acaro bejamu ngau balo pejabat tingik neh, balo tentaro neh, serto balo petingik Galilea.
22
Lalu watu anak betinok Herodias tamok serto menari, nrh nyenang Herodes serto sidok te duduk besamo ngau neh. Rajo ngumung ngau anak daro yok, 'Mintok apo sajo te kulok mau'k tentu aku merikneh ngau dik.'
23
Herodes besumpah ngau neh, Apo sajo te kitak pintok ngau aku, pesti aku berik ngau kitak, sampai setengah re kerjaan aku tuk.''
24
Lalu, daro yok angkat serto madah ngau inaineh, ''Aku arus mintok apo?" Inai neh nyaut, "kepalo Yohanes pembaptis.''
25
Serto watu yok gok ngau te gesak-gesak, daro yok datai ngau rajo serto madah,''Aku mau'k pituk gok nuan merik nguso aku kepalo Yohanes Pemaptis didarat talam.
26
Sekelin't yok, rajo nyadi sedih, tapi ute sumpah neh tamai ura-ura te makai bereto neh, neh endo mau'k nulak daro yok.
27
lalu rajo cepat nyuruh ura ngemaik kepalo Yohanes, lalu pengawal yok angkat serto manco kepalo Yohanes di penyaro.
28
Udah yok, neh ngemaik kepalo Yohanes didarat talam serto merik neh ngau daro yok, lalu daro yok merik ngau inai neh.
29
Watu balo murid Yohanes menin't, sidok datai lalu ngamik tubuh Yohanes serto ngeletak neh dalam kubur.
30
Udah yok, Balo rasul samo bekumpul tamai Yesus lalu madah apo te udah sidok kerjoserto apo te udah sidok ajar.
31
Lalu Yesus madah sidok"Abom kito angkat ke tempat sungik ngau betegok sekejap." Padai bangat ura te datai serto pulai, ngau makai pun sidok ndo sempat.
32
Lalu Yesus tamai murid-murid Neh angkat ngau perau ke tempat sungik.
33
Tapi ura bangat mantau sidok angkat lalu ngenal sidok. Ura bangat yok bereto bebedap ngelalu jalai darat re semuo kota, penatai sidok dulu re Yesus tamai balo murid Neh.
34
Watu Yesus bejalai ke sisi danau, Yo mantau bangat benar ura, lalu Yo ngeraso kaseh ke sidok padai sidok upo domba te ndo sik gemala neh. Maka Yesus mulai ngajar sidok bangat hal.
35
Watu ari kok kleman, murid-murid Yesus datai lalu madah,"Tempat tuk tempat sungik serto udah tengah malam.
36
Suruhlah sidok angkat ke kampong sekelilin't isok sidok meli pemakai."
37
Tapi Yesus nyaut sidok,"Kitaklah te merik sidok makai." Lalu bunge sidok,"Haruskah kami angkat lalu meli rute rego duo ratus dinar lalu merik ngau sidok makai?"
38
Yesus nanyok sidok,"Ado berapo rute te kitak bisik? cubo periso!" Seudah diperiso sidok, sidok madah,"Limo rute serto duo ikan."
39
Lalu Yesus nyuruh sidok semuo dudok bekelompok-kelompok.
40
Ura bangat yok dudok bekelompok, ado te seratus, ado te limo puluh.
41
Seudah Yesus ngamik limo rute serto duo ikan yok, Neh nengkadah ke langit serto ngucap syukur lalu mecah rute yok serto merik ke murid-murid Neh isok dibagi ke ura bangat, piok gok duo ikan yok Neh bagi ke semuo ura.
42
Sidok semuo makai sampai kenyang.
43
Lalu sidok ngamik duo belas bakul sisok rute serto ikan yok.
44
Ado limo ribu laki te makai rute.
45
Lalu Yesus nyuruh balo murid Neh naek ke perau serto angkat dulu re Neh ke sebera, ke Betsaida, sementaro Yo nyuruh ura bangat yok pulai.
46
Seudah neh bepisah re sidok, Neh naek ke bukit lalu bedoa.
47
Pado watu ari udah kleman, perau yok udah di tengah danau, sementaro Yesus tengah kedirik di darat.
48
Watu Neh mantau murid-murid susah payah ngayuh padai angin belawan arah ngau sidok, kiro-kiro jam tigo malam Yo datai ngau sidok bejalai didarat aik lalu Yo kok bejalai ngelalu sidok.
49
Pado watu sidok mantau Yesus bejalai didarat aik, sidok nyangkok Yo antu lalu sidok mangkas, ute sidok semuo mantau Yesus lalu takut.
50
Udah yok Yesus ngumung ngau sidok serto madah,"Tenanglah! Tuk Aku, ndo dah takut!"
51
Lalu Yo naek bereto sidok ke perau, lalu angin pun betegok sidok semuo nyadi kagum.
52
Padai sidok pan paham tentang mujisat limo rute yok serto ati sidok agik degil.
53
Pado watu Yesus tamai murid-murid Neh nyebera, sidok betamat di tanah Genesaret.
54
Watu sidok turun re perau, ura-ura langso ngenal Yesus
55
lalu bededas ke semuo kampung lalu mulai maik ura-ura pedih ute tegurin't di tilam ngau Yesus, dinipun Yesus bisik.
56
Maka, kinipun Yesus tamok ke balo kampung, atau balo kota, sidok naroh ura-ura pedih di pasar lalu minto Neh isok sidok tau megai ujo jubah Neh geno. Lalu sapo pun ute megai jubah Neh nyadi semuh.