¹ Lalu, bekumpul ura-ura Farisi betemu ngau Yesus berto ngau beberapo ahli Taurat te datai re Yerusalem. ² Sidok mantau beberapo murid Yesus makai rute ngau jari kutur. ³ Ute ura-ura Farisi tamai semuo ura Yahudi ndo ko'k makai tik jari sidok ndo di basok sampai ke buku'k lengan padai udah adat inik muyang te sidok pegai. ⁴ Bilo ura ura-ura Yahudi yok datai re tempat umum, sidok ndo makai dulu seapan masok jari. Serto bangat adat lain neh te sidok terimo ngau di pegai, upo masok cawan, balo keni, serto tempayan-tempayan re temago. ⁵ Udah yok, ura-ura Farisi tamai ahli-ahli Tautar betanyok ngau Yesus," Ngapo murid-murud Nuan ndo idup ngau adat inik muyang, tapi makai ruyte ngau jari kutur?" ⁶ Saut Yesus ngau sidok,"Yesaya madah benar tenta kitak te purok-purok nyadi ura baek, upo ado tetulis:"Banso tuk merik hormat ngau aku ngau mulut geno, tapi ati sidok jauh re Aku. ⁷ Sidok nyemah Aku sio-sio geno ute ngajar perintah te di pulah ulih mensio." ⁸ Perintah Allah kitak abai serto ndo peduli, tapi adat ngau tradisi mensio kitak pegai kuat-kuat." ⁹ Lalu Yesus becakap lagik ngau sidok,"Sajo numut kitak nulak perintah Allah sampai tau ngetan adat kitak kedirik. ¹⁰ Ute musa madah," Hormatlah apai ngau inai kitak, sapo te ngutuk apai ngau inai neh arus di ukum mati." ¹¹ Tapi, Kitak madah bilo seura becakap ngau apai inai neh,"Apo unto te tauk nuan peruleh re aku utan yok kurban pesemah ngau Allah.' ¹² Lalu kitak ndo lagik nyuruh neh ngelaku apo pun utan ngau apai tamai inai neh, ¹³ Upo yok kitak udah ngemela Firman Allah ngau adat tradisi te udah turun-temurun. Serto kitak ngelaku bangat utan hal agik upo yok." ¹⁴ Lalu Yesus ngumai lagik semuo ura lalu madah,"Penin't semuo jekuk Aku, kitok semuo serto kingat. ¹⁵ Ndo bisik utan re luar mensio te tamok ke dalam dirik neh ge tau ngutur neh, tapi utan te keluar re mensio te ngutur neh." ¹⁶ Bilo seura mpuk penin't arus ningo isok neh tauk menin't!" ¹⁷ Lalu watu Yesus tamok ke dangau serto nudi ura-ura yok, balo murid betanyok ngau Neh tenta perumpamo yok. ¹⁸ Lalu Yo madah ke sidok,"Apo kitak gok ndo ngerti? Ndo kitak ketauk ute re luar tamok ke dalam mensio, yok ndo ngutur ke neh? ¹⁹ Kebok ute tamok yok ndo tamok ke dalam ati neh, tapi ke perut neh, lalu keluar enta kakus." yok bereti maksud Yesus semuo pemakai tauk di makai. ²⁰ Lalu bunge Neh" Apo te keluar re mensio te nyuruh neh kutur. ²¹ Ute re dalam, re ati mensio pansut pemikir-pemikir ja'i, duso cabul, encuri, munuh, ²² selingkuh, serakah, iri ati, nipu, nguto'k ura. ²³ Semuo utan yok datai re ati mensio, yok ute ngutur neh." ²⁴ Re tempat yok Yesus angkat ke benuo Tirus tamai sidon. Lalu tamok ke dangau ute ndo sik ura ketau, tapi penatgai Neh ndo tauk di resio. ²⁵ Pado watu menin't tenta Yesus, Ado seura betinok ute anak neh kerasuk roh ja'i datai lau sujud di kaki Yesus. ²⁶ Betinok yok ura Yunani bansa Siro-Fenuidia. Neh minto Yesus isok ngusir sitan keluar re anak neh. ²⁷ Udah yok, Yesus madah ke betinok yok,"Isok em balo nemiak dulu kenyang, ndo baek ngamik rute empu balo nemiak lalu nyempalo rute yok ngau balo asuk." ²⁸ Tapi betinok yo nyaut Yesus," Benar Tuhan, tapi balo asuk ute di baroh mijo pun makai siso nemiak yok. ²⁹ Lalu Yesus madah betinok yok,"Padai kata-kata nuan yok, pulai kin. Sitan yok udah lari re anak nuan." ³⁰ Lalu betinok yok pulai ke dangau serto betemu ngau anak neh lagik tengah gurin't, serto sitan yok udah angkat. ³¹ Udah yok Yesus keluar lagik re benuo Tirus lalu angkat ngelalu Sidon nuju ke danau Galilea dibenuo Dekapolis. ³² Lalu sidok maik ngau Yesus ura tulik ute ndo lancar ngumung. Sidok mintok mohon ngau Yesus isok ngeletak jari Neh enta ura yok. ³³ Udak yok Yesus maik ura yok jauh re kerumun ura bangat. Yo majak tunyuk jari Neh ke penin't ura yok, lalu ngeludah serto megai lidah ura yok. ³⁴ Lalu Yesus nengkadah ke langit, Neh nyintak penyuan panyai lalu madah,"Efata!", retineh "Tebukok!" ³⁵ Sekelin't yok penin't ura yok tebukok, pengebat lidah neh telecut lalu yo tau becakap jelas. ³⁶ Yesus nidah sidok becerito masalah tuk ngau sapo-sapo. Tapi nguman Neh nidah sidok, sidok nguman becerito. ³⁷ Sidok benar-benar iran lalu madah,"Yo udah ngelaku segalo utan te baek. Neh nyuruh ura tulik nyadi menin't serto ura bisuk tau ngumung."