¹ Pitu'k, balo menyanak, kami ko'k kita'k ketau'k tenta anugra'h Allah te udah meri'k nguso balo jemaat di Makedonia, ² kalau enta bangatneh ujian deri'to, kelimpahan sukocito tamai besaineh kemiskinan sido'k udah bekelimpah enta kekayo ketulus ati sido'k. ³ Aku besaksi kalau sido'k meri'k sesuai kemampu sido'k, sampai lebi'h dar'i kemampuneh ngau keri'lo sido'k kediri'k. ⁴ Sido'k muhon sangat ngau kami ke anugra'h bia'r tamai ngami'k bagian enta pelayanan balo ur'a kudus. ⁵ Tu'k em te sido'k pulah, ndo upo te kami ara'p, petamo-tamo, sido'k meri'k ke diri'k sido'k nguso Allah, udah yo'k nguso kami ngau te diko'k Allah. ⁶ Jadi, kami ngenesak Titus, macam ni neh udah ngenulu, upo yo'k go'k neh ngelesai peker'jo anugra'h tu'k diantar'o kita'k. ⁷ Tapi, samo upo kita'k bekelimpah enta segalo utan, enta iman, pemadah, pengetau'k, segalo usaha, tamai enta kasi'h kita'k ke kami, aru'sneh kita'k bekelimpah go'k enta anugra'h tu'k. ⁸ Aku ndo madah tu'k ngau peri'ntah, tapi ngau nguji kebena'r ur'a lain tenta keiklas kasi'h kita'k. ⁹ Kebo'k, kita'k ketau'k anugra'h Tuhan kito Yesus Kristus, meski Neh kayo, Neh re'lo jadi miskin demi kita'k bia'r ngelalu kemiskin Neh, kita'k jadi kayo. ¹⁰ Enta utan tu'k aku meri'k penapat, utan tu'k ngau keunto kita'k, te watu taun subo'k, kita'k ndo cumo ngelakuneh, tapi mau'k go'k mulahneh. ¹¹ Jadi pitu'k, selesai ke em peker'jo yo'k sesuai ngau kere'la kita'k nyelesai apo te bisi'k enta kita'k. ¹² Ker'no anti'k ko'k meri'k, pemeri'k yo'k ko'k diteri'mo'k, sesuai ngau te dimpu'k seseur'a, bukan bedasa'r ke apo te ndo dimpu'kneh. ¹³ Hal tu'k ndo ngau ngeringan ur'a lain tamai ngebeban kita'k, tapi bia'r ado kesamo. ¹⁴ Bia'r kelebi'h kita'k pitu'k nyukup ke te kur'a sido'k dah yo'k kelebi'h sido'k nyukup ke te kur'a kita'k. Ngau piyo'k bisi'k kesamo. ¹⁵ Upo te ditulis enta Kitab Suci," Ur'a te ngumpul bangat ndo bekelebi'h tamai ur'a te ngumpul siki't ndo bekekur'a." ¹⁶ Tapi, stuku'r ngau Allah naru'h enta ati Titus kebena'r samo ngau te aku mpu'k. ¹⁷ Kebo'k Neh ndo cumo neri'mo'k penganyu'r kami, tapi ngau kebena'rneh te besai, neh datai ke kita'k yo'k kemau'kneh kediri'k. ¹⁸ Besamo Titus, kami ngutus menyanak te dipuji-puji diantar'o semuo jemaat enta hal pembri'to Injil. ¹⁹ Ndo yo'k geno, neh ditunyo'k go'k uli'h balo jemaat ngau angkat besamo kami enta pelyan anugra'h tu'k, ye kami pulh ngau ngemai kemuliaan ngau Tuhan tamai ngau nunyo'k pengiklas kami. ²⁰ Kami beati-ati bia'r ndo si'k ur'a te ko'k ncela kami enta utan pemeri'k besai te diatu'r uli'h kami. ²¹ Kami beru'saha mulah apo te bena'r, ndo cumo enta pemantau Tuhan, tapi ena te dipantau mensio go'k. ²² Besamo sido'k, kami ngutus menyanak kami te ra'jin kami uji tamai tebukti ra'jin enta bangat hal, lebi'h lagi'k pitu'k neh makin ra'jin ker'no mpu'k keyakin te besai ke aku. ²³ Pitu'k tenta Titus, neh adolah tepa tamai kawan ker'jo aku te beguno ngau aku. Tenta balo menyanak kito te lain, sido'k utusan balo jemaat, yo'k kemuliaan ngau Kristus. ²⁴ Jadi tunyu'k em ke sido'k, dimuo balo jemaat, tunyu'k em kasi'h kita'k tamai ke dibango kami ngau kita'k.