¹ Ker'no kito mpu'k balo janyi tu'k, hai te dikasi'h, bo'h kito mere'sih kedir'k kito dar'i dar'i semuo te ke cema'r tubuh tamai roh sami'l nyempur'na kekudusan enta te takut ke Allah ² Beri'k em ati kita'k ngau kami nugau. Kami ndo salah ke sapo pun, tamai ndo ngami'k unto dar'i sapo pun. ³ Aku ndo madah tu'k ngau nyalah ke kita'k, ker'no se apan yo'k, aku dah madah ke kita'k kalau kita'k bisi'k enta ati kami, ngau ati besamo tamai idup besamo. ⁴ Kepecayo'k aku ngau kita'k besai, kebango aku besai ke kita'k, aku dipenuh ngau pengibu'r enta te disusah kami. ⁵ Bahkan, watu kami datai di Makedonia, kami ndo tenang, tapi te siso dar'i segalo sisi, yo'k te bekelai dar'i lua'r tamai enta ditakut. ⁶ Tapi Allah, te ngibu'r ur'a te putus aso, ngibu'r kami ngau pematai Titus. ⁷ Ndo ngau penatai neh geno, tapi kedo'k ker'no pengibu'r te mulah neh gago dienta kita'k, upo te neh ceri'to nguso kami tenta ri'nu kita'k, duko cito kita'k, te bena'r ngau aku sampai aku makin gago. ⁸ Jadi, anti'k aku dah nyuru'h kita'k ri'du ker'no sura't aku yo'k, aku ndo nyesal. Walau aku suah nyesal, yo'k ker'no aku mantau kalau sura't yo'k nyedi'h ke ati kita'k walau cumo sekejap. ⁹ Pitu'k aku gago, ndo ker'no kita' sedi'h, tapi ker'no kita'k sedi'h ngau betubat, kita'k besedi'h sesuai ngau te diko'k Allah bia'r kita'k ndo diru'gi enta hal apopun uli'h kami. ¹⁰ Sebab, sedi'h te sesuai ngau te diko'k Allah ngasi'k ke petubatan te ndo disesal tamai nuju keselamatan, tapi, kesedihan duniowi ngasi'l ke te mati. ¹¹ Kebo'k, pera'ti em bangat ke sedi'h te sesuai ngau ke diko'k Allah yo'k nger'jo ke kita'k besai te bena'r, bukti kalau kita'k ndo besalah, ringat, takut, ri'nu, semangat, tamai, te dibalas. Dienta segalo hal, kita'k dah ngebukti kalau kita'k ndo salah enta hal tu'k. ¹² Walau aku nulis sura't nguso kita'k, hal yo'k ndo ngau kepenting ur'a te mulah salah tamai ndo go'k ngau ke penting ur'a te disalah, tapi bia'r kebena'r kita'k tera'dap kami dinyato kita'k diadap Allah. ¹³ Yo'k kebo'kneh kami gago. Disamping te digago kami yo'k, kami lebi'h besukacita agi'k ke Titus ker'no rohneh dah disega'r uli'h kita'k semuo. ¹⁴ Anti'k aku suah ngebango ke kita'k nguso Titus, aku ndo dipemalu. Tapi, macam ni kami madah segalo utan ngau kita'k enta te bena'r, piyo'k go'k te dibango kami diadap Titus yo'k bena'r. ¹⁵ Tamai, kasih sayangneh tera'dap kita'k betamah besai, apobilo neh ingat ketaat kita'k semuo, macam ni kita'k nyamu't kedataineh ngau takut tamai genta'r. ¹⁶ Aku gago ker'no enta segalo hal aku mpu'k keyakin dienta kita'k.