Hal merik sedekah
1
"Kingat ke, nang kitak nyalai ke kewajiban agama kitak de mua urang isak depedak sidak, mpadai antik upa yak kitak ndai bulih upah ari apak kitak te de surga.
2
Jadi, antik kitak merik sedekah, nang kitak bamuk, upa te depulah urang munafik de rumah-rumah ibadat, ngau de lurung-lurung, isak sidak depuji urang. Aku madah kitak: Sidak udah bulih upah.
3
Tapi antik kitak amerik sedekah, nang deketau jari kibak nama te depulah jari kanan.
4
Nyak me sedekah kitak kalah deberik belabuk, maka apai kitak medak depelabuk bakal malas ngau kitak."
5
"Ngau antik kitak bedo'a , nang lah kitak bedo'a upa urang munafik. Sidak rajin nelah do'a bediri de rumah-rumah ibadat ngau tikungan-tikungan jalai raya, isak depedak urang. Aku madah kitak: Sidak udah bulih upah.
6
Tapi antik kitak bedo'a, tamak ke pangkin, tutup lawang, bedo'a me ngau Apai kitak te nugau de tempat te ndai kenak pedak.
7
Alam do'a kitak nang lah kitak bebelit ansit upa kejama urang te ndai ngelala Allah. Sangkak sidak, ngau mayuh leka igik anai, do'a sidak tekabul.
8
Nang kitak upa sidak, mpadai Apai kitak ketau nama te deperlu ke kitak sapan kitak mintak ngau-Ya.
9
Empadai yak, bedo'alah piyak:
Apai kami te de Surga,
Dekudus ke nama Nuan,
10
Datai me kerajaan Nuan,
jadi me kedekak Nuan
de bumi upa de surga,
11
Berik ke kami pada ari tuk
pemakai kami te cukup
12
Ampun ke bala kesalah kami, upa kami ngampun ke bala urang te besalah ngau kami;
13
Nang ngemaik kami kalam pencubaan,
tpi lepas ke kami ari te jaik.
(Empadai Nuan te empu kerajaan ngau kuasa ngau kemuliaan sampai selama-lamanya.)
14
Empadai antik kitak ngampun kesalah urang, Apai kitak te de surga bakal ngampun kesalah kitak ugak.
15
Tapi antik kitak ndai ngampun urang , apai kitak ndai ngampun kesalah kitak ugak."
16
ngau antik kitak bepuasa, nang muram mata mua kitak upa urang munafik. Sidak ngubah mata mua sidak isak urang ketau sidak ketengah puasa. Aku madah kitak: Sidak udah bulih upah e.
17
Tapi antik kitak bepuasa, minyak ke kepala ngau basuk mua kitak,
18
isak nang depedak urang kalau kitak puasa, melain ke hanya Apai kitak te nugau de tempat te ndai kenak pedak. Maka Apai kitak te medak te depelabuk bakal malas ngau kitak."
19
" Nanglah kitak ngumpul ke reta de bumi; de bumi ngengat ngau karat berusak e ngau debungkar pencuri.
20
Tapi kumpul ke reta de surga, de surga ngengat ngau karat ndai dapat berusak e, ngau pencuri ndai dapat ncuri e.
21
Empadai dini reta kitak nugau, diyak ati kitak nugau.
22
Mata yak pelita tubuh. Antik mata kitak baik, terang me semua tubuh;
23
antik mata kitak jaik, keleman me semua tubuh. Jadi antik terang te entang kitak keleman, matang keleman bebenar keleman yak.
24
Ndai sik surang pun te tau mengabdi ngau dua tuan. empadai antik piyak, ya bakal bencik ngau surang, ngasih te surang agik, atau ya bakal setia ngau surang, ndai peduli ngau te surang agik. Kitak ndai dapat mengabdi ngau Allah, dan ngau Mamon."
25
" Aku madah kitak: Nang gaduh ke bala idup, nama te demakai, depinum, ngau nang gaduh ugak ke tubuh, nama te kak dengau. Bukai kah idup lebih penting ari pemakai, ngau tubuh lebih penting ari pada pengau?
26
Pedak ke burung-burung de langit te ndai ngunsai, ndai mutik, ngau ndai sik ngumpul ke bekal alam lupung, tapi debrik Apai kitak de surga makai. Bukai kah kitak jauh ngelebih burung-buruh yak?
27
Sapa dentara kitak te empadai kegaduh ya tau namah seseta pada jalai idup ya?
28
Ngau nama kitaak gaduh ke bala pengau? Pedak ke bunga bakung dum te tumuh ndai bekerja ngau ndai memintal,
29
tapi aku madah kitak: Salomo ngau bala semua kemiwah ya jak ndai bepengau sebaik salah sutik ari bunga yak.
30
Jadi antik upa yak Allah nanan rumput duma, te ari tuk bisik, pagi debuai kalama api, ndai kah Ya lebih agik nanan kitak, u bala mensia te ndai pecayak?
31
Maka kitak ndai sah gaduh, ngau banai: Nama te kak kami makai? nama te kak kami pinum? Nama te kak kami ngau?
32
Semua yak degegak bansa-bansa te ndai ngelala Allah. Tapi Apai kitak te de surga ketau kalau kitak perlu ke semua yak.
33
Tapi gegak dulau kerajaan Allah ngau kebenar e, maka semua yak bakal detamah ke ngau kitak.
34
Empadai yak, nanglah kitak gaduh ke ari pagi, empadai pagi bisik kesusah e kedirek. Kesusah sari cukup untuk sari.