Perempama tentang gawai kawin ¹ Udek Yesus banai alam perempama ngau sidak: ² Hal kerajaan surga sempama surang raja te mulah pesta kawin untuk anak ya. ³ Ya nyuruh anak buah ya ngumai bala urang te udah dundang ke gawai yak, tapi sidak ngai datai. ⁴ Ya nyuruh anak buah bukai ugak, ngau pesan: Padah ngau sidak te dundang: pemakai pengempak dah siapa, lembu laki ngau bala ternak dah desemelih; semua udah bisik, datai kitak ke gawai tuk. ⁵ Tapi bala urang te dunang ndai peduli; bisik te kuma, bisik te ngurus usaha, ⁶ te lain nangkap anak buah ya, nyisa ngau munuh sidak. ⁷ Udek rutau raja yak, lalu nyuruh pasukan ya munuh ngau nunu kuta sidak te munuh bala hamba ya. ⁸ Udah yak ya banai ngau anak buah ya: Gawai kawin dah siap, tapi urang te dunang ndai layak datai kiyak. ⁹ Maka kitak kalah angkat ke simpang-simpang jalai, unang sidak te kitak temu din, baik ke gawai kawin. ¹⁰ Udek bala anak buah angkat, ngumpul ke semua urang te depedak sidak dejalai-jalai, urang te jaik ngau urang te awas, sampai penuh ruang ngau tamu. ¹¹ Rama raja yak tamak untuk betemu ngau tamu-tamu diyak, ya medak surang te ndai ngau pengau gawai. ¹² Ya madah: U menyadik, tipa dirik kituk ndai ngau pengau gawai? Tapi mensia yak nugau na. ¹³ Udek jekuh raja ngau anak buah ya: Kebat kaki ngau jari ya, sempalung mensia tuk re te palin keleman, din bisik ratap sabak ngau kerit gigi. ¹⁴ Empadai mayuh te dekumai, sikit te depilih." ¹⁵ Udek bala urang Farisi angkat, sidak bepekat tipa cara nyerat Yesus ngau buah tanyak. ¹⁶ Sidak nyuruh murid sidak tamai urang Herodian betanyak ngau Ya: "Guru, kami ketau, nuan urang jujur, ngau jujur ngajar jalai Allah, nuan ndai sik takut ngau sapa-sapa, empadai Nuan ndai mintak puji. ¹⁷ Padah ngau kami nama penapat Nuan: Tau mayar pajak ngau Kaisar atau ndai? ¹⁸ Tapi Yesus ketau pengenyaik ati sidak, lalu Ya banai: "Nama kitak nguji Aku ui bala urang munafik? ¹⁹ Tunyuk ngau Aku mata duit pajak yak." Sidak ngemaik sutik dinar ngau Ya. ²⁰ Maka Ya betanyak ngau sidak: "Gamar ngau tulis sapa tuk?" ²¹ Saut sidak: "Gamar ngau tulis kaisar." Udek jekuh Yesus ngau sidak: "Berik ngau Kaisar nama te kalah kitak berik ngau ya, berik ngau Allah nama te kalah kitak berik ngau Allah." ²² Ninga miak sidak iran lalu angkat nudi ke Yesus. ²³ Pada ari yak Yesus datai ngau urang Saduki, te ndai pecayak bisik kebangkitan. Sidak betanyak ngau Ya: ²⁴ "Guru, Musa madah kalau bakas mati ndai sik nudi ke anak, menyadik ya kalah jadi ngau bini ya isak ke kenturun ya ndai putus. ²⁵ Tapi dentara kami bisik tujuh menyadik. Te pertama kawin udek mati ndai sik nudi ke anak, bini ya dedudi ke ya jadi ngau menyadik ya. ²⁶ Upa yak te kedua, ketiga sampai ketujuh. ²⁷ Udek udah sidak mati semua, inuk yak mati ugak. ²⁸ Sapa dentara sidak ketujuh menyadik te jadi laki inuk yak rama ari kebangkitan? empadai kan sidak udah bebini ke ya semua." ²⁹ Yesus nyaut sidak: "Kitak sesat, empadai kitak ndai nyaruk Kitab Suci ataupun kuasa Allah! ³⁰ Rama ari kebangkitan, urang ndai kawin ngau dekawin ke tapi idup upa malaikat de surga. ³¹ Tapi tentang kebangkitan urang-urang mati ndai mek kitak maca te udah defirman ke Allah, rama Ya besabda: ³² Aku tuk Allah Abraham, Allah Ishak, ngau Allah Yakub? Ya bukai Allah urang mati, tapi Allah urang idup." ³³ Urang mayuh tebelenga muji ninga pengajar Ya. ³⁴ Rama urang Farisi ninga kalau Yesus dah mulah urang Saduki jadi bungkam, sidak bekumpul, ³⁵ surang re sidak, ahli Taurat betanyak untuk nguji Yesus: ³⁶ "Guru, hukum ni te terutama alam ukum Taurat?" ³⁷ Saut Yesus: "Kasih ke Tuhan, Allah ngau segenap ati, segenap jiwa, segenap akal budi. ³⁸ Yak mek ukum te terutama ngau peruba. ³⁹ Ukum kedua te sama ngau yak: "Kasih ngau pangan upa kasih ke dirik. ⁴⁰ Entang kedua ukum yak mek tegantung seluruh ukum Taurat ngau kitab bala nabi." ⁴¹ Ketengah urang Farisi bekumpul, Yesus betanyak ngau sidak: ⁴² "Nama penapat kitak tentang Mesias? Anak sapa Ya?" Saut sidak ngau Ya: "Anak Daud." ⁴³ Saut Ya ngau sidak: "Antik piak, tipa Daud ulih Roh Kudus tau nelah Ya tuan, rama ya banai: ⁴⁴ Tuhan dah befirman ngau Tuanku: duduk kituk desepiak kanan Aku, sampai bala munsuh Mih Ku taruh debabah kaki Mih. ⁴⁵ Jadi antik Daud nelah Ya Tuan, tipa tau Ya anak ya ugak? ⁴⁶ Ndai sik sidak te numut nyaut, mulai ari yak, ndai sik suah urang nanyak nama-nama ngau Ya.