Yesus dalu de Yerusalem ¹ Rama Yesus ngau bala murid dah damping Yerusalem, de Betfage te teletak de Bukit Zaitun, Yesus nyuruh dua urang murid Ya ² ngau pesan: "Angkat kin ke kampung de mua kitak yak, diak kitak medak bisik keledai inuk detamat, minik anak ya. Lepas ke yak, baik sedua ngau Aku. ³ Antik bisik urang ngerara kitak, padah: Tuhan perlu. Ilak ya mulai ke." ⁴ Hal tuk tejadi isak genap firman te depadah nabi: ⁵ Padah ngau inuk Sion: Pedak, Raja kitak datai ngau kitak, Ia lemah lembut, numpang keledai beban te agik biak." ⁶ Udek bala murid angkat, ngerja te desuruh Yesus ngau sidak. ⁷ Sidak ngemaik keledai inuk ngau anak keledai, udek dalas sidak ngau pengau sidak, Yesus naik katau keledai yak. ⁸ Urang mayuh ngampar ke pengau sidak de jalai, bisik ugak te nungkung dan kayu mit, de susun de jalai. ⁹ Urang mayuh te bejalai de mua Yesus ngau urang te nurut re belakanag, bepengap: "Hosana bagi Anak Daud, deberkat Ya te datai alam nama Tuhan, hosana de tempat te palin tinggik!" ¹⁰ Rama ya tamak ke Yerusalem, gempar seluruh kuta yak, ngau sidak banai: "Sapa mensia tuk?" ¹¹ Mensia mayuh diyak nyaut: Tuk me nabi Yesus ari Nazaret de Galilea." ¹² Udek Yesus tamak alam Bait Allah, ngusir semua urang te bejual beli de halaman Bait Allah. Ya ngelingkap ke mija penukar duit, ngau bangku-bangku pedagang merpati. ¹³ Ya banai ngau sidak: "Bisik detulis: Rumah Ku dejenang rumah doa. Tapi kitak nyadi ke yak sarang penyamun." ¹⁴ Maka urang timpang ngau butak datai ngau Ya, desemuh ke Ya sidak. ¹⁵ Tapi rama imam kepalak ngau ahli Taurat medak bala mujizat te depulah Ya, serta ngau sidak diak te mengap: "Hosana bagi Anak Daud!" sau nar sidak, ¹⁶ udek sidak banai ngau Ya: "NUan ninga nama te depengap nemiak yak?" Saut Yesus ngau sidak: "Aku ninga, pan suah kah kitak maca: Ari mulut bala nemiak ne nusu Nuan dah nyiapke puji-pujian?" ¹⁷ Udek Ya nudi ke sidak, angkat ke Betania bemalam din. ¹⁸ Yesus ngutuk pun ara Lam kenyung rama Yesus detengah pejalai pulai ke kuta, Yesus lapar. ¹⁹ Damping jalai Ya medak pun ara udek kiyak, tapi Ya ndai sik bulih nama-nama bukai re daun na. Jekuh Ya ngau pun kayu yak: "Dirik ndai bebuah sampai selamanya!" Pun ara rangkai seklin yak. ²⁰ Medak piyak, bala murid iran, udek banai ngau Ya: "Tipa pun ara yak tau rangkai seklin?" ²¹ Saut Yesus: "Aku madah kitak, antik kitak pecayak ngau ndai ragu, kitak bukai cuma tau mulah nama te Kupulah ngau pun ara tuk, tapi antik kitak kak banai ngau bukit tuk: Tebelanting kin kalaam laut! yak bakal lalu. ²² Nama te kitak pintak alam doa ngau penuh pecayak, kitak bakal nerimak yak." ²³ Udek Yesus tamak ke Bait Allah, ketengah Ya ngajar diyak, datai bala imam kepalak ngau tuai-tuai bansa Yahudi, lalu betanyak ngau Ya: "Ngau kuasa ni Mih mulah hal-hal tuk? sapa te merik kuasa tuk ngau Mih?" ²⁴ Saut Yesus ngau sidak: "Aku kak nanyak kitak ugak, antik kitak madah Aku, Aku bakal madah kitak reni Kubulih kuasa tau mulah semua hal itu. ²⁵ Reni penatai baptisan Yohanes? Re surga atau re mensia?" Sidak banai sama direk, madah: "Antik kita madah: Re surga, Ya pasti nganuk kita: Antik piyak nama kitak ndai pecayak ngau ya? ²⁶ Tapi antik kita madah: Re mensia, kita takut ngau urang mayuh, empadai sidak ngangap Yohanes yak nabi. ²⁷ Udek sidak nyaut Yesus: "Kami ndai ketau." Udek Yesus pun nyaut sidak: "Antik piyak Aku ngai madah ngau kitak, ngau kuasa reni Aku mulah bala hal tuk." ²⁸ Tipa penapat kitak tentang tuk: Bisik urang mpu dua anak bakas. Ya banai ngau anak tuai: "Mih angkat bekerja kin ke kebun anggur. ²⁹ Saut ya: Auk Apai. Tapi ya ndai angkat. ³⁰ Udek retuai yak ngau anak numur dua, banai piyak ugak. Anak yak nyaut: Ngai ku. Tapi udek ya nyesal lalu angkat ugak. ³¹ Sapa dentara sedua te ngerja penakak apai sidak?" Saut sidak: "Te penude" Jekuh Yesus ngau sidak: "Ku madah kitak, pemungut cukai ngau inuk kanyi bakal dulau re kitak tamak kalam kerajaan Allah. ³² Empadai Yohanes datai nunyuk ke jalai te benar ngau kitak, kitak ndai pecayak ngau ya. Tapi pemungut cukai ngau inuk kanyi pecayak ngau ya. Ngau kitak padahal medak tapi kitak ndai nyesal, ndai pecayak ngau ya. ³³ Dinga ke perempama tuk. Bisik tuan tanah mukak kebun anggur, dekelingik pagar. Ya ngali lubang ngau meras anggur, niri ke manara jaga alam kebun yak. Udek kebun yak desewa ya ngau pengarap, udek ya angkat ke menua lain. ³⁴ Dah kak damping musim mutik buah, ya nyuruh anak buah ya datai ngau pengarap-pengarap kak ngamik bagi asil. ³⁵ Tapi pengarap-pengarap yak nangkap bala anak buah tadik: Sidak maluk surang, munuh te lain, nikam ke yang bukai ngau batu. ³⁶ Udek tuan yak nyuruh anak buah te lain agik, lebih mayuh re peruba, tapi sidak depulah sama upa te udah. ³⁷ Udek ya nyuruh anak ya ngau sidak, jekuh ya: Anak aku pesti kesegan sidak. ³⁸ Tapi rama bala pengarap medak anak ya yak, sidak banai sama direk: Ya yak bah ahli waris, buh kita munuh ya, isak warisan jadi empu kita. ³⁹ Sidak nangkap ya lalu nyempalung ya kalam kebun anggur yak, lalu munuh ya. ⁴⁰ Maka antik tuan kebun anggur yak datai, nama te kak depulah ya ngau bala pengarap yak?" ⁴¹ Saut sidak ngau Ya: "Ya pesti ngeminasa ke sidak te jaik yak, udek kebun anggur desewa ke Ya ngau bala pengarap lain te nyerak ke asil bagi ngau ya rama dah senta." ⁴² Saut Yesus ngau sidak: "Pan suah kah kitak maca alam kitab suci: Batu te debuai bala tukang, udah nyadi batu penyuru: hal tejadi re pihak Tuhan, pempulah ajaib de mata kita. ⁴³ Maka, Ku madah kitak, kerajaan Allah bakal damik re ritak, deberik ke bansa te bakal ngasil ke buah kerajaan yak. ( ⁴⁴ sapa te jatuk katau batu yak, ya ancur, sapa te kenak tingang batu yak, ya dedak.)" ⁴⁵ Rama bala imam kepala ngau urang Farisi ninga perempama yak, paham lah sidak, kalau sidak te demaksud ke Yesus. ⁴⁶ Sidak berusaha kak nangkap Ya, tapi sidak takut ngau urang mayuh, empadai urang mayuh ngangap Ya nabi.