Yesus demulia ke datau bukit ¹ Enam ari udah yak, Yesus ngemaik Petrus, Yakobus ngau Yohanes menyadik ya, tamai sidak Ya naik katau bukit te tingik. Sidak na te diak. ² Udek mata mua Yesus berubah de mua sidak; mua Ya mancak upa mata panas, pengau Ya jadi putih upa terang. ³ Maka nampak ngau sidak, Musa sedua Elia ketengah banai ngau Ya. ⁴ Jekuh Petrus ngau Yesus: "Tuhan, gaga nar kami nugau dituk. Antik nuan kak, ilak kumulah tiga buah langkau, sigik mpu Nuan, sigik mpu Musa, sigik mpu Elia." ⁵ Ketengah ya banai, mua ari putih turun nyerangkung sidak, re awan yak tedinga ingan te banai: "Tuk mek Anak te Kukasih, ngau Ya Aku bekenan, dinga ke Ya." ⁶ Ninga yak, bala murid tesungkur ngau takut nar. ⁷ Udek Yesus datai ngau sidak, neguk samil banai: "Bediri, nang takut!" ⁸ Rama sidak ngangkat kepalak, sidak ndai sik medak urang bukai sebali Yesus. ⁹ Rama sidak turun re bukit, Yesus bepesan ngau sidak: "Nang kitak madah ngau urang te kitak pedak tadik, seapan Anak Mensia debangkit ke dentara urang mati." ¹⁰ Udek bala murid betanyak ngau Ya: "Antik piak nama bala ahli Taurat madah Elia kalah datai dulau?" ¹¹ Saud Yesus: "Elia pesti datai ngau nyemaik semua hal ¹² Aku madah kitak: Elia udah datai tapi urang ndai ngelala ya, sidak mulah ya sepenekak ati sidak. Piyak ugak Anak Mensia bakal sisa ulih sidak." ¹³ Rama yak bala murid Yesus nyaruk kalau te depanai Ya yak Yohanes Pemanik. ¹⁴ Rama Yesus ngau bala murid bekalih ngau urang mayuh, bisik surang datai lalu nyemah Yesus, ¹⁵ jekuh ya: "Tuhan, kasih ke AnakKu. Sisa nar ya kenak gila babi. Ya rajin jatuk kalam aik ngau api. ¹⁶ Aku dah ngemaik ya ngau murid Nuan, tapi sidak ndai dapat nyemuh ke ya." ¹⁷ Mungkak saut Yesus: "Ui kitak angkatan te ndai pecayak ngau sesat, kak berapa lamak agik aku nugau dentara kitak? Berapa lamak agik aku sabar ngau kitak? Baik nemiak yak kituk!" ¹⁸ Yesus ngerara kayah, udek sitan keluar re tubuh nemiak yak, ya pun semuh seklin yak ugak. ¹⁹ Udek bala murid Yesus datai ngau Ya, ngau rama sidak diak kedirik, sidak betanyak: "Nama kami ndai numut ngusir sitan yak?" ²⁰ Ya nyaut sidak: "Empadai kitak kurang pecayak. Aku madah kitak: sekira kitak bisik iman mesai igik sesawi na, kitak tau banai ngau bukit tuk: pinah kin, maka bukit tuk pinah, ngau ndai sik te mustahil bagi kitak. ( ²¹ sitan jenis tuk ndai dapat dusir piyak na, kalah ngau doa ngau.)" ²² Rama Yesus sekaban ngau bala murid de Galilea, Ya banai ngau sidak: "Anak Mensia kak deserah ke jari mensia ²³ sidak bakal munuh Ya, ari ketiga Ya debangkit ke." Maka ati bala murid matang sedih bebenar. ²⁴ Rama Yesus ngau bala murid datai de Kapernaum, datai kiak pemungut bea bait Allah ngau petrus, jekuh Ya: "Nama guru mih ndai mayar bea dua dirham yak?" ²⁵ Saut ya: "mimang mayar." Rama Petrus tamak ke rumah, Yesus ngelampat ya ngau betanyak: "Nama penapat mih Simon? reni bala raja denia mungut bea ngau pajak? Ari rayat atau penatai?" ²⁶ Saut Petrus: "Re urang penatai!" Maka saut Yesus ngau ya: "berete bebas rakyat sidak. ²⁷ Tapi isak kita ndai jadi kesenangkan sidak, angkat kin ngait de lepung. Ikan peruba ulih kait, tangkap ngau bukak mulut ya, maka mih nemu mata duit empat dirham dalam yak. Amik ngau bayar ke ngau sidak, mpu Aku ngau mpu mih ugak."