Urang Farisi ngau urang Saduki mintak kecelik ¹ Udek datai kiyak bala urang Farisi ngau Saduki kak nguji Yesus. Sidak nyuruh Ya mulah kecelik re surga ngau sidak. ² Tapi saut Yesus: "Rama babah ari empadai langit mirah, kitak madah: Ari kak terang, ³ rama lam kenyung empadai langit mirah ngau redup, kitak madah: Ari jaik. Upa langit kitak numut ngecelik, tapi kecelik kiamat ndai. ⁴ Angkatan te jaik ngau ndai setia tuk nuntut kecelik. Tapi sidak ndai bakal deberik kecelik, sebali kecelik nabi Yunus." Udeh Yesus angkat nudi ke sidak. ⁵ Rama bala murid Yesus nyemerang lepung, sidak kelupa maik ruti. ⁶ Yesus banai ngau sidak: "Ati-ati ngau ragi urang Farisi ngau Saduki." ⁷ Maka sidak bepikir ngau banai sama direk: "Ya madah miak mpadai kita ndai ngemaik ruti." ⁸ Rama Yesus ketau ke nama te depanai ke sidak, Ya banai: "Nama kitak banai ke te ndai sik ruti?" U bala urang te ndai pecayak! ⁹ Apan gak kitak nyaruk? Kitak dah kelupa ke limak ruti untuk limak ribu urang, ngau berapa bakul sisak udek? ¹⁰ Ataupun tujuh ruti ngau empat ribu urang, ngau berapa bakul sisak yak? ¹¹ Tipa kitak lalu ndai nyaruk, bukai ruti te demaksud ke Aku. Aku madah kitak: Waspada ngau ragi urang Farisi ngau Saduki." ¹² Rama yak baruk sidak nyaruk kalau bukai ragi ruti te detangkis tapi ajaran urang Farisi ngau Saduki. ¹³ Udah Yesus datai de daerah Kaisarea Filipi, Ya betanyak ngau bala murid: "jekuh urang, sapalah Anak Mensia yak?" ¹⁴ Saut sidak: "Bisik te madah: Yohanes pemanik, bisik ugak te madah: Elia, ngau bisik ugak te madah: Yeremia, atau nabi bukai." ¹⁵ Udek Yesus betanyak ngau sidak: "Tapi nama jekuh kitak, sapa Aku tuk?" ¹⁶ Saut Simon Petrus: "Nuan Mesias, Anak Allah te idup!" ¹⁷ Saut Yesus ngau Ya: "Gaga mih Simon bin Yunus, empadai bukai mensia te madah ke yak ngau mih, tapi Apai Ku te de surga. ¹⁸ Ku banai ngau mih: Mih yak Petrus, datau batu karang tuk Aku niri ke jemaatKu, ngau sebayan ndai dapat ngempu yak. ¹⁹ Ngau mih, Ku berik kunci kerajaan surga. Nama te mih kebat de denia tuk, tekebat de surga, ngau nama te delepas de denia, telepas ugak de surga." ²⁰ Udek Yesus ndai nyagi sidak madah sapa-sapa kalau Ya yak Mesias. ²¹ Rama yak Yesus mulai madah ngau bala murid Ya kalau Ya kalah angkat ke Yerusalem ngau nangung mayuh penisa re pihak tuai-tuai, imam kepala, ngau ahli Taurat, udek debunuh ngau debangkit ke ari ketiga. ²² Tapi Petrus ngentun Ya ke sisi, ngerara Ya: "TUhan, sekira Allah nyauh ke hal tuk! Hal tuk ndai bakal kenak Nuan." ²³ Yesus nempenang, banai ngau Petrus: "Tungkal kau Iblis. Mih yak senangkan bagi Aku, empadai mih bukai mikir ke te depikir Allah, tapi te depikir mensia." ²⁴ Udek Yesus banai ngau bala murid Ya: "Setiap urang te kak tamai Aku, Ya kalah nyangkal dirik ya, ngesan salib ya, tamai Aku. ²⁵ Sapa te kak nyelamat ke nyawa, ya ayap nyawa; tapi sapa te ayap nyawa empadai Aku, ya bulih nyawanya agik. ²⁶ Nama guna urang bulih seluruh denia tapi ayap nyawa? Nama te tau deberik ke ya nganti nyawa ya? ²⁷ Empadai anak mensia datai alam kemuliaan ApaiYa, diring malaikat-malaikatYa; rama yak Ya malas setiap urang sesuai pempulah ya. ²⁸ Aku madah ngau kitak: Dentara kitak te bisik dituk, bisik te ndai mati sapan sidak medak Anak Mensia datai sebagai raja alam kerajaanYa."