¹ Telitih Yesus Kristus, anak Daud, anak Abraham. ² Abraham apai Ishak, Ishak apai Yakub. Yakub apai Yehuda semenyadik. ³ Yehuda apai Peres ngau Zerah, Inai sidak yak Tamar. Peres apai Hezron. Hezron apai Ram. ⁴ Ram apai Aminadab. Aminadab apai Nahason. Nahason apai Salmon. Salmon apai Boas, inai ya Rahab. ⁵ Boas apai Obed, inai ya Rut. Obet apai Isai. ⁶ Isai apai Raja Daud. Daud apai Salomo, Inai ya bekas bini Uria. ⁷ Salomo apai Rehabeam. Rehabeam apai Abia. Abia apai Asa. ⁸ Asa apai Yosafat. Yosafat apai Yoram. Yoram apai Uzia. ⁹ Uzia apai Yotam. Yotam apai Ahas. Ahas Apai Hizkia. ¹⁰ Hizkia apai Manasye. Manasye apai Amon. Amon apai Hosia. ¹¹ Yosia apai Yekhonya semenyadik, kemprah dusir ke Babel. ¹² Udah de Babel, Yekhonya apai Sealtiel. Sealtiel apai Zerubabel. ¹³ Zerubabel apai Abihud. Abihud apai Elyakim. Elyakim apai Azor. ¹⁴ Azor apai Zadok. Zadok apaai Akhim. Akhim apai Eliud. ¹⁵ Eliud apai Eleazar. Eleazar apai Matan. Matan apai Yakub. ¹⁶ Yakup apai Yusuf, laki Maria. Ari Maria adai Yesus, te detelah Kristus. ¹⁷ Kecampuk kenturun Abraham sampai ke Daud bisik empat belas , ari Daud sampai ke Babel bisik empat belas kenturun, ari Babel sampai ke Kristus adai bisik empat belas kenturun. Pengadai Yesus Kristus ¹⁸ Upa tuk pengadai Kristus Yesus. Rama Maria, inai ya udah betunang ngau Yusuf, apan sengkalik, ya udah nganung ari Roh Kudus. ¹⁹ Tapi empadai Yusuf laki ya urang te antus, ndai kak bemalu ke Maria dadap mua urang, Yusuf bamuk kak ngelecut nyarak Maria belubah-lubah. ²⁰ Tapi rama Yusuf ketengah bepikir, malaikat Petara mansut ngau Ya alam mimpi ngau banai, "Yusuf, anak Daud, nang takut ngamik Maria jadi bini mih empadai anak te dekanung ya berasal ari Roh Kudus. ²¹ Ya bakal beranak bakas, udek mih merik nama nemiak yaak Yesus, empadai ya te kak nyelamat ke Umat-Ya ari bala dosa sidak." ²² Semua yak isak ke genap te udah depadah Petara ngelalu bala nabi, ²³ "Pedak ke, urang dara bakal nganung ngau beranak bakas. Sidak nelah nama Ya Imanuel," reti nama yak: "Allah beserta kita". ²⁴ Rama Yusuf teruas tinuk, Ya mulah upa te depadah malaikat Petara ngau ya, udek ya ngamik Maria jadi bini, ²⁵ tapi ndai suah ngeraru Maria sampai ya beranak. Yusuf merik nama nemiak yak Yesus.