( Yesus Mengotos Para Rasol-Nye) ¹ Kemudion, Yesus memantou keduabelas mored-Nye lalu membori rombongon iye kuaso ngan otoritas atas roh-roh belis, ngan jugo menyombuhko penyaket. ² Enye mengotos rombongon iye untok memberitako tentang Kerajaon Allah ngan memolehko. ³ Ujo-Nye kepado rombongon iye, " Jengon ngundah apepon delom pejelononme, jengon ngundah tungkot, tas, roti, duet, apo bahkon beju salenon. ⁴ Ke rumah monepon nyo kowe masoki, tinggallah desane sampoi owe bejelon jak daman iye. ⁵ Bage rombongon nyo hopi endok menerimo kowe, tinggalkolah kota iye ngan kibaskolah debunye jak kakime sebagoi peringoton tehadop rombongon iye." ⁶ Kemudion, bejelonlah para rasol ngan bekelileng ke doson- doson sambel memberitako Injil ngan menyombuhko urang- urang saket demone-mone. ⁷ Herodes, sang rajo wilyah, mendongor tentang segelo hal nyo sedang tejedi ngan enye sajo bingung sabab beberape urang mengehatoko behwa Yohanes Pembaptes lah bangket jak entaro urang mati, ⁸ sedangko nyo loen bekehato behwa Elia lah moncol lagi, ngan adopula nyo bekehato behwa salahseurang jak para nabi nyo hidop pado zaman tekaloe sodah bangket. ⁹ Herodes bekehato," Ake sodah menyemboleh kepalo Yohanes. Jedi, siapekah urang nyo tentang-Nye kudongor kabar nyo sedemikion nie?" Mangko, Herodes sajo endok untok betomu Yesus. ¹⁰ Tekalo para rasol belek, rombongon iye menceritako kepado Yesus tentang segelo sesuatu nyo sodah rombongon iye lakuko ngan Enye mengajok rombongon iye untok menyendiri kesebuah kota benamo Betsaida. ¹¹ Hambok sebeleknye, urang lobot mengetahui hal iye ngan rombongon iyepon mehilui-Nye. Mangko, sambel menyambot rombongon iye, Yesus boek kepado rombongon iye tentang Kerajaon Allah ngan jugo rombongon nyo membotohko kesombuhon. ¹² Tekalo ari mulai malom, kedua belas mored Yesus jongok kepado-Nye ngan bekehato," Suruhlah urang- urang iye belek kedoson-doson ngan pedesaon desekitar sie untok ndelok daman temalom ngan makonon ulehnyo desie kite dang dedaman sajo jouh." ¹³ Hambok sebeleknye, Yesus bekehato kepado rombongon iye," Kowelah nyo bori rombongon iye makon." Simbot mored-mored-Nye, " Kamie hanyo mempunyoi lima roti ngan dua ikan, kecuali munye kamie bejelon boli makonon untok segelo urang nie." ¹⁴ Desane ado sekitar lima ribu urang jenton. Yesus bekehato kepado mored-mored-Nye, " Suruhlah rombongon dodok secaro bekelompok, kiro-kiro limapoloh urang per kelompok." ¹⁵ Mangko, rombongon iyepon melakuko sesuoi dengan nyo Yesus perentahko ngan menyuruh segelo uang iye dodok. ¹⁶ Lalu, Yesus ngambek lima roti ngan dua ikan iye, menengadah ke langet, memberkatinye, memacah-macahkonye, ngan memborikonye kepado para mored empoknyo rombongon iye menghidangkonye kepado urang lobot. ¹⁷ Ngan, rombongon iye segelo makon sampoi konyong. Kemudion, sisa- sisa totoon roti nyo dekompolko ado duabelas bekol ponoh. ¹⁸ Tekalo iye Yesus sedang bedoa dedewekon, mored- mored-Nye ado besamo dengan-Nye. Lalu, enye betanyo kepado rombongon iye," Siapekah Ake nie menorot urang lobot?" ¹⁹ Simbot rombongon iye, " Yohanes Pembaptes, nyo loen mengehatoko Elia, ngan nyo loen lagi mengehatoko Kowe adolah salah sikuk jak nab- nabi pado zaman tekaloe nyo bangket lagi." ²⁰ Kemudion, Yesus bekehato kepado rombongon iye, " Hambok, menorotme, siapekah Ake?" Simbot Petrus," Kowe adolah Kristus jak Allah." ²¹ Hambok sebeleknye, Yesus memperingotko rombongon iye dengan karas ngan memerentahko rombongon iye untok hopi nenelako siapepun tentang hal nie. Yesus Nenelako Kemation-Nye ²² Kemudion Yesus bekehato, ANak Mendesio haros saro lobot hal ngan detulak uleh tetuha nyawo, imam- imam kepalo, ngan ahli- ahli Torat, lalu debunoh ngan nak debangketko pado arinyo ketiga." ²³ Yesus bekehato kepado rombongon iye segelonye," Munye seseurang endok mehilu Ake, enye haros menyangkol awoknyo dewek, memikol salebnye tiap ar, ngan mehilu Ake. ²⁴ Sabab, siape pun nyo nak beusaha menyelamatko nyawonye, todo kesayauon nyawonye. Hambok sebeleknye, barangsiape kesayauon nyawonye uleh Ake, enye nak menyelamatkonye. ²⁵ Apekah ontongnye munye seseurang mendepotko segelo denia, hambok teelek apo kesayauon nyawonye dewek? ²⁶ Kepado urang nyo meraso malu uleh Ake ngan pekehatoon-Ke, Anak mendesio pun todo malu mengakui urang iye tekalo Enye jongok delom kemuliaon_Nye ngan kemuliaon Bepa-Nye, besereta padong meleikat kodos. ²⁷ Ake mengehatoko nyo sesonggohnye kepadome, ado beberape urang deentaro kowe nyo togok desie nyo hopi nak teteelek sebolum ngelek Kerajaon Allah." ²⁸ Kiro- kiro, 8 ari sesodah Yesus menyampoiko pengajoron_Nyeb iye, Enye ngajok Petrus, Yohanes, ngan Yakobus noek keegunong untok bedoa. ²⁹ Tekalo Yesus sedang bedoa, rupo moka-Nye berubah ngan beju-Nye menjedi puteh bekilouon. ³⁰ Kemudion, nampoklah dua urang sedang boek dengan-Nye. Kedua urang iye adolah Musa ngan Elia, ³¹ nyo menampokko diri delom kemuliaon ngan boek tentang kemation Yesus nyo nak secepatnye degonopi de Yerusalem. ³² Tekalo iye, Petrus ngan kanti-kantinye sedang dekuasoi uleh raso sajo en ngantok, hambok tekalo rombongon iye bonor- bonor tesadar, rombongon iye ngelek kemuliaon Yesus ngan dua urang nyo togok besamo-samo dengan Enye. ³³ Tekalo Musa ngan Elia nak meninggalko Yesus, Petrus bekehato," Guru, beiklah kite tetap desie. Kamie nak nogokko kemah, seholoi untok-Me, seholoi untok Musa, ngan seholoi untok Elia." Hambok sebeleknye, Petrys hopi menyadari apenyyo dekehatonye iye. ³⁴ Tekalo Petrus sedang mengehatoko hal iye, jongoklah awon menoungi rombongon iye sehinggo Petrus, Yohanes, ngan Yakobus menjadi takot tekalo rombongon iye masok kedelom awo iye. ³⁵ Kemudion, tedongorlah pemboekon jak awon iye, " Nielah Anak-Ke, Enyelah nyo Kupileh, dongorkolah Enye. ³⁶ Sesodah pemboekon iye berenti, Yesus hanyo tinggal seurang dewek. rombongon iye meresioko nye ngan hopi nenelakonye seurangpun pado ari- ari iye tentang ape nyo lah rombongon iyoi kelek. ³⁷ Pepagi arinyr, tekalo rombongon iye toron jak gunong, serombongon godong urang lobot jongok kepado Yesus. ³⁸ Seseurang jak urang lobot iye, tepekek," Guru, ake mohon kepado-Me, keleklah anakke sabab enye anakke sikuk-sikuknye. ³⁹ Keleklah, ado roh nyo menguasoinye, ngan tibo- tibo pepekeon. Roh iye jugo menggeguncangkonye sehinggo molotnye bebusa, roh iye teros menyaketinye ngan hopi endok meninggakonye. ⁴⁰ Ake lah memhohon kepado mored- mored-Me untok mengosernye, hambok rombongon iye hopi pacok melakukonye. ⁴¹ Simbot Yesus, " Hai, kowe generasi nyo hopi pecayo ngan sosot! Berape lamo lagi Ake haros tinggal besamome ngan besabar terhadop kowe? Bewolah anakme iye kemai." ⁴² Tekalo budakiye sedang memaroki kepado Yesus, roh belis iye membantengnye ke tanoh ngan menggeguncangkonye. Hambok sebeleknye, Yesus membentak roh nejes iye, menyombuhko budak jenton iye, lalu membelekkonye kepado bepaknye. ⁴³ Segelo urang meraso kagom atas kuaso Allah, hambok tekalo rombongon iye maseh teheran- heran tehadop segelo hal nyo delakuko Yesus, Enye bekehato kepado mored-mored-Nye, ⁴⁴ " Dongorklah pekehatoon nie bebeik: Anak mendesio nak serahko ke tangon mendesio." ⁴⁵ Hambok sebeleknye, padong mored hopi memahami maksud pekehatoon iye, ngan hopi pacok memahaminye. Hambok, rombongon iye takot betanyo kepado Yesus mengenai reti pekehatoon iye. ⁴⁶ Suatu tekalo, sebuah petengkaron tejedi deentaro mored- mored Yesus mengenai siape nyo teutamo deentaro rombongon iye. ⁴⁷ Hambok sebeleknye, Yesus mengetahui pekeron hati rombongon iye, lalu ENye ngambek seurang budak kecik ngan ngajoknye togok desampeng-Nye. ⁴⁸ Lalu, Enye bekehato kepado mored- mored," Setiap urang nyo menerimo budak kecik nie delom namo-Ke, enye menerimo Ake. Ngan, siapepun nyo menerimo- Ake, enye jugo menerimo Enye nyo mengotos Ake. Sabab, nyo paleng hino deentaro kowe, enyelah nyo teutamo." ⁴⁹ Yohenas menyimbot_Nye ngan bekehato," Guru, kamie ngelek seseurang nyo mengoser roh belis delom namo-Me ngan kamie beusaha merentikonye ulehnyo enye hopi temasok delom kelompok kite." ⁵⁰ Hambok sebeleknye, Yesus bekehato kepadonye," Jengon merentikonye ulehnyo siapepun nyo hopii melawonme, enye memihakme." ⁵¹ Tekalo waktunye semaken parork bage Yesus untok de tinggiko, Enye menoguhko hati untok bejelon ke Yerusalem. ⁵² Enye menyuruh beberape urang otoson mendohuli-Nye. Lalu, otoson- otoson iyepun bejelon ngan masok kesebuah doson de deerah Samaria untok menyiapko segelo sesuatu bage Enye. ⁵³ Hambok sebelknye, urang -urang de daman iye hopi menerimo yesus ulehnyo Enye sedang menuju ke kota Yerusalem. ⁵⁴ Tekalo mored- mored Yesus, iyelah Yakobus ngan Yohanes, ngelek hal nie, rombongon iye bekehato, " Tuhan, apekah Kowe mengendoko kamie untok memerentahko api toron jak langet ngan mengahosko rombongon iye?" ⁵⁵ Hambok sebeleknye, Yesus gerelek kebelakong ngan menegor rombongon iye. ⁵⁶ Lalu, Yesus ngan mored- mored-Nye bejelon ke doson nyo loen. ⁵⁷ Tekalo rombongon iye sedang delom pejelonon, ado seurang bekehato kepado Yesus," Ake nak mehilu Kowe kemonepun Kowe bejelon. " ⁵⁸ Yesuspun bekehato bekehato kepadonye," Musong mempunyoi lubang untok tinggal ngan borong- borong de langet mempunyoi sarongnye. Hambok sebeleknye, Anak Mendesio hopi mempunyoi daman untok singgah." ⁵⁹ Yesus bekehato kepado seurang nyo loen," Hilulah Aku!"Hambok sebeleknye, urang iye bekehato," Tuhan, Ejenko ake belejelon ngan ngoborko bepakke dehulu." ⁶⁰ Hambok sebeleknye, Yesus bekehato, "Uyulah urang teelek mengoborko urang teelek, hambok kowe haros bejelon ngan memberitako tentang kerajaon Allah." ⁶¹ Ngan, ado surang lagi bekehato, " Ake nak mehilui Kowe, Tuhan, hambok ejenko ake bepameton telobeh dehulu dengan keluargoke." ⁶² Yesus bekehato kepadonye, " Hopi ado seurangpun nyolah memoteko tangonnye pado bajak, hambok maseh gerelek ke belakong, nyo hopi pantas bage kerajaon Allah."