( Betina- betina nyo Menolung Yesus) ¹ Pepagi arinye, Yesus bejelon bekelileng ke kota-kota ngan doson-doson untuk memberitako ngan menyatako Injil Kerajaon Allah. Keduabelas rasol ado besamo-samo dengan enye, ² upa iye jugo beberape betina nyo lah de sombuhko Yesus jak segelo roh- roh jahat ngan bebagoi penyaket. De entaro rombongon iye adolah Maria, nyo de sobut Magdalena, nyo debebasko Yesus jak tojoh roh jahat. ³ Ado jugo Yohana bini Khuza bendahara Herodes, Susana, ngan maseh lobot betina loennye nyo memakoi kesugehonnye dewek untok mendokong Enye. ⁴ Tekalo urang lobot bekompol ngan urang- urang jak bebagoikota jongok kepado Yesus, Enye boek kepado rombongon iye dengan sebuah perumpamaon: ⁵ " Seurang petani bejelon menugalko beneh. Tekalo enye menugalko, ado sebagion beneh nyo titek de topi jelon ngan tetitak, sereta demakon borong- borong. ⁶ Sebagion lagi titek depocok lahan bebetu, ngan tekalo beneh iye mulai tombuh, beneh iye menjedi koreng uleh hopi beaek. ⁷ Sebagion loenye titek detangah-tangah unok somok ngan tombuh besamonye sehinggo somokiye mencekeknye. ⁸ Sisa beneh loenye titek de tanoh nyo sobor ngan tomboh sehinggo membori hasel seratos kalilipot lobotnye." Setelah mengakheri perumpamaon iye Yesus boek," Enye nyo mempunyoi telinga untok mendongor, hendoklah mendongorko beik- beik!" ⁹ Setelah iye, mored- mored Yesus betanyo kepado_Nye tentang arti perumpamaon iye. ¹⁰ Enye bekehato, " Kepadome deboritahuko rehesio Kerajaon Allah, hambok kepado urang loen deboritahuko delom perumpamaon empoknyo, ' Sekalipon memandong, rombongon iye hopi ngelek, ngan sekalipon mendongor rombongon hopi mengerti."" Yesaya 6: 9 Penjelason Yesus tentang Perumpamaon Beneh. ¹¹ Nielah arti perumpamaon iye: " Beneh iye adolah firman Allah. ¹² Beneh nyo titek topi jelon iye adolah mike nyo mendongor firman Allah. Kemudion, jongoklah beles ngan ngambek firman iye jak hati mike empoknyo mike jengon pecayo ngan deselamatko. ¹³ Beneh nyo titek depocok tanoh nyo bebetu adolah urang- urang nyo mendongor firman Allah ngan menerimonye dengan senanghati, hambok hopi beakor. Mike hanyo pecayo setegal,hambok kesengsarohon jongok, mike langsong meninggalko Allah. ¹⁴ Beneh nyo titek deentaro unok somok adolah urang- urang nyo mendongorko firman Allah, hambok sementaro mike betomboh, mike decekek uleh raso kuater, kesugehon, sereta kesenangon hidop sehinggo mike hopi menghaselko buah nyo masok. ¹⁵ Sedangko beneh nyo titek de tanoh nyo sobor iye adolah urang- urang nyo mendongorko firman Allah ngan menyimpannye delom hati nyo jojor ngan beik, sereta bebuah delom ketekonon." ¹⁸ ( Kelekkolah Cahayome) ¹⁶ " Hopi ado seurangpon nyo menghidopko lampu, kemudion menotopnye dengan gantang apo memotekonye debewoh bayang tidor. Sebeleknye, enye nak memoteko lampu iye depocok dampar empoknyo urang nyo masok kedelom rumah pacok ngelek cahayonye. ¹⁷ Sabab, hopi ado hal nyo hopi tekelek nyo hopi nak denyatoko, ngan hopi ado resio nyo hopi nak deungkap ngan deundah kepado tarang. Ulehnyo iye, perhatikolah upamone kowe mendongor uleh siape nyo mempunyoi nak debori lobeh lobot lagi. Hambok sebeleknye, siape nyo hopi mempunyoi, jak enye nak deambek, bahkon ape nyo enye kiro depunyoinye." ¹⁹ Lalu, indok Yesus ngan dolor- dolornye jongok menomui-Nye, habok rombongon iye hopi pacok maroki-Enye uleh kerumonon urang. ²⁰ Jedi, deboritahukolah kepado_nye," Indok ngan dolor- dolor-Me sedang togok deluor, rombongon iye endok betomu dengan Kowe." ²¹ Hambok sebeleknye, Yesus menyimbotnye, "Indok -Ke ngan dolor- dolor-Ke adolah mike nyo mendongorko firman Allah ngan melakukonye." ²² Tekalo iye, Yesus noek kedelom bidok besamo mored- more-Nye ngan Enye bekehato kepado rombongon iye, " Marolah kite menyeberang ketopiloen denou nie." Mangkonye, bejelonlah rombongon iye keseberang. ²³ Hambok, tekalo rombongon iye sedang menyemberang, Yesus e tetidor.Lalu, betioplah angen ribot kedenou iye ngan bidok rombongon iye demasoki aek sehinggo rombongon iye delom behayo. ²⁴ Kemudion, para mored jongok kepado Yesus ngan menjegoko-Nye sambel bekehato," Guru! Guru! Kite nak benaso!" Lalu, Yesuspon tejego ngan membentak angen ribot sereta gelumbang nyo begelora iye. Angen ribot iyepon berenti ngan denou iye menjedi tenang. ²⁵ Ngan, Enye bekehato kepado rombongon iye, " Demonekah imanme?" rombongon iye ketakoton ngan heran sambel bekehato seurang kepadonyo loen, " Siapekah urang nie? Enye bahkon membori perentah kepado angen ngan aek, ngan enye mematohi-Nye. " ²⁶ Lalu sampoilah Yesus ngan mored-mored-Nye de wilayah urang Gerasa, de seberang Galilea. ²⁷ Pado saat Yesus toron ke derot, enye detomui uleh seurang jenton jak kota iye nyo derasoki uleh roh- roh belis. Urang iye sodah lamo hopi bebeju ngan hopi tinggal de rumah, meloenko de koboron. ²⁸ Tekalo urang iye ngelek Yesus, enyepon tepekek ngan sojod de hadopon-Nye. Dengan suaro nyo lantang enye bekehato," Apekah uroson entaro Kowe ngan ake, hai Yesus, Anak Allah Nyo Mahotinggi? Ake mohon kepado-Me, jengon sikso ake!" ²⁹ Hal nie tejedi ulehnyo Yesus memerentahko roh belis iye keluaor jak urang iye. Belis iye recap meheret urang iye sehinggo enye derantoi, deberegol, ngan dejego urang, hambok enye pacok memotosko rantoinye ngan de undah uleh belis ke daman-damannyo sepi. ³⁰ Kemudion, Yesus betanyo kepado urang iye," Siape namome?" Simbot urang iye," Legion" ule ado lobot belis nyo merassokinye. ³¹ Belis-belisiye memohon kepado-Nye empoknyo Enye jengon memerentahko rombongon iye untok lari kejurang mout. ³² De daman iye, ado serombongon godong bebi nyo sedang delok makon de buket. Belis- belis iye memohon kepado Yesus untok menguyuko rombongon iye masok kedelom rombongon bebi iye, ngan Yesus mengejenko rombongon iye. ³³ Mangko, belis- belis iyepon keluor jak urang iye ngan masok kedelom bebi- bebi, Lalu rombongon bebi iye belarion menuroni lereng buket nyo tajom menuju kedenou ngan tenggolom. ³⁴ Tekalo para tuan ingunon bebi ngeleknye, rombongon iye melariko diri ngan menceritako kejedion iye dekota ngan de doson sekitarnye. ³⁵ Jadi, urang lobot jongok untok ngelek ape nyo tejedi. Rombongon iye jongok kepado Yesus ngan mendepoti urang nyo lah debebasko jak belis- belis iye sdang dodok parok kaki Yesus, sodah bebeju, ngan sodah waras pekeronye. Hal nie membuat rombongon iye ketakoton. ³⁶ Rombongon nyo ngelek kejedion nie menceritako kepado urang loen upamone urang nyo kerasokon belis iye desombuhko. ³⁷ Lalu,segelo urang nyo tinggal de deerah sekitar Gerasa meminta Yesus untok meninggalko rombongon iye sabab rombongon iye dehantui ketakoton nyo godong. Uleh iye, Yesus noek ke bidok ngan belek ke Galilea. ³⁹ Hambok sebeleknye, urang nyo sodah debebasko jak belis- belis iye memohon kepado Yesus empoknyo enye buleh besamo- samo dengan Yesus. Hambok, Yesus menyuruhnye belek, ujo-Nye, ³⁸ " Beleklah ke rumahme ngan ceritokolah hal- hal godong nyo lah Allah perbuat bageme." Urang iyepon bejelon kesegelo hujong kota ngan menceritoko ape nyo lah Yesus perbuat bagenye. ⁴⁰ Tekalo belek ke Galilea, urang lobot menyambot_Nye uleh rombongon iye segelo sodah menunggu-Nye. ⁴¹ Desane ado seseurang benamo Yairus nyo jongok kepado-Nye, enye adolah seurang kepalo sinagoge. Sambel sojod menyembah de kaki Yeus, Yairus memohon empoknyo Enye jongok ke rumahnye ⁴² ule enye mempunyoi seurang anak betina tunggal nyo kiro- kiro beomor duabelas tahon, ngan anak iye hamper teelek. Ngan, tekalo Yesus menuju kiyone, urang lobot bedesak-desakon desekelileng_Nye. ⁴³ Desane ado seurang betina nyo sodah menderito penderohon berat selamo 12 tahon, ngan hopi seurangpon nyo pacok menyombuhko enye. ⁴⁴ Beina iye maroki Yesus jak belakong ngan menyontuh hojong jubah-Nyee, mangko seketika iye jugo penderohonnye berenti. ⁴⁵ Lalu, Yesus bekehato, " Siape nyo menyontuh-Ke?" ule segelo urang hopi ngaku, Petrus bekehato, " Guru, urang lobot bekompol desekelileng-Me ngan bedesak- desakon dengan-Me!" ⁴⁶ Hambok sebeleknye, Yesus bekehato, " Seseurang menyontuh-Ke ulehnyo Ake meraso ado kuaso nyo keluor jak-Ke." ⁴⁷ Tekalo betina iye ngelek behwa enye hopi pacok ngerawoko diri, enye jongok kepado Yesus dengan gemitek ngan besojod dehadopon_Nye. De depan segelo urang, enye menceritako mengka enye menyontuh Yesus, ngan upamone enye dengan seketika desombuhko. ⁴⁸ Kemudion, Yesus bekehato kepadonye, " Anak-Ke, imanme lah menyombuhkome. Bejelonlah delom damai sejahtera." ⁴⁹ Tekalo Yesus dang boek, seseurang jak rumah kepalo sinagoge iye jongok ngan bekehato kepado Yairus," Kupekme sodah teelek. jengon lagi merepotko Guru." ⁵⁰ Hambok sebeleknye, mendongor hal iye Yesus bekehato kepado Yairus," Jengon takot. Pecayo bae ngan anakme nak selamat." ⁵¹ Tekalo Yesus sampoi derumah Yairus, Enye hopi memperbulehko siapepon masok besamo-Nye kecuali Petrus, Yohanes, Yakobus, sereta bepak ngan indok budak iye. ⁵² Segelo urang meratop ngan meratopi budak betina iye, hambok Yesus bekehato, " Jengon meratop, enye hopi teelek cuma tidor." ⁵³ Urang lobot iyepon menetawoko-Nye ulehnyo rombongon iye tahuko budak betina iye sodah teelek. ⁵⁴ Hambok sebeleknye, yesus memogong tangon budak iye ngan memantounye," Jegolah, kupek!" ⁵⁵ Manko, beleklah roh budak iye ngan seketiko iye jugo enye togok. Lalu Yesus memerentahko empoknyo budak iye debori sesuatu untok demakon. ⁵⁶ Kedua urang rayo budak iye temanga, hambok Yesus melarong rombongon iye untok memboritahu siapepon tentang ape nyo la tejedi.