( Panggelon Untok Menjedi Penjelo Mendesio) ¹ Pado waktu tekalohe, Urang lobot bekompol de sekelileng -Nye untok endongor ko firman Allah. Tekalo iye, Yesus togok de topi denou Genesaret ² ngan, ngelek dua bidok nyo sedang menopi de topi denou iye, hambok tukang delok ikan sodah keluor jak bido-bidok iye ngan sedang membesoh jelonye. ³ Yesus noek kesalah sikuk bidok, iyelah milek Simon, ngan menyaro Simon untok ngayuh ko bidoknye lelamboton menjouh jak tobeng derot. Kemudion, Yesus dudok ngan mengajor urang lobot jak pocok bidok. ⁴ Sesodah eomongon, Yesus bekehato Simon," Bejelonlah ke deman aek nyo delom ngan tebarko lah jelome untok menangkop ikan." ⁵ Simon menyimbot," Guru, kamie lah begwe nenihan sepanjong malam, hambok hopi buleh apo- apo!Hambok ulenyo Kowe nyo menyuruhkonye, ake nak menebarko jelo niye. " ⁶ Ngan, tekalo mike melakukonye, mike menangkop ikan en lobot sehinggo jelo mike mulai teseget. ⁷ Lalu, mike memboriko tando kepado kanit-kanti mike de bidok nyo loen untok jongok ngan nolungi mike. Kemudion, jongok lah kanti- kanti mike ngan mengisi kedua bidok iye dengan ikan hinggo bidok mike hamper tenggolom. ⁸ Tekalo Simon Petrus ngelek hal niye, enye besojud de depan Yesus ngan bekehato," Larilah jakke, Tuan, sabab ake adolah urang nyo bedoso!" ⁹ Petrus bekehato demikion sabab enye ngan segelo urang nyo besamonye meraso en teheran atas lobotnye ikan nyo mika tangkop. ¹⁰ Demikion jugo ngan Yakobus ngan Yohanes, anak- anak Zebedeus, nyo bekanti dengan Simon, " Jengon takot. Mulai kinie, kowe nak menjedi penjelo mendesio." ¹¹ Sesodahnye narek bidok-bidoknye ke derot, beroyot iye meninggal ko segelo sesuatu ngan mehilu Yesus. ¹² Suatu Ari, Yesus sedang ado de sebuah kota. De kota iye, ado seurangnyo badannye ponoh kusta. Tekela urang iye ngelek Yesus, enye besujud hinggo mukanye menyontuh tanoh ngan memohon kepado-Nye," Tuan, munye Kowe endok, Kowe pacok ngubat i ake." ¹³ Lalu, Yesus mengolorko tangon-Nye ngan menyontuh urang iye. Ujo-Nye, " Ake endok, jedilah sombuh." seketika iye jugo, penyaket kusta urang iye sayau. ¹⁴ Hambok, Yesus memerentahko urang iye untok hopi memboritahu siapepun ngan bekehato," bejelon ngan tunjokkolah dirime kepado imam. Persembahko lah kurban atas kesembuhonme upa nyo deperentah ko uleh Musa sebagoi beketi bage mike." ¹⁵ Berita tentang Yesus maken tesebar sehinggo lobot urang jongok bekompol untok mendongorko Enye ngan untok de sombuh ko jak penyaketnye. ¹⁶ Hambok, Yesus recap bejelon menyelinop ke daman- daman sunyi untok bedoa. ¹⁷ Pado suatu ari, tekela Yesus sedang ngajor, urang- urang Farisi ngan ahli- ahli Taurat nyo jongok jak segelo kota de wilayah Galilea, Yudea, ngan Kota Yerusalem jugo dodok de sane. Ngan, kuaso Tuhan menyeretai Yesus sehinggo Enye pacok menyombuh ko urang lobot. ¹⁸ Lalu, nampoklah beberape urang memikul seurang lopoh de pocok daman tidornye, ngan enye berusaha ngundahnye masok ngan moteko urang iye de depan Yesus. ¹⁹ Hambok sebeleknye, ulenyo rombongon iye hopi menomuko jelon untok ngundah urang iye masok akibat kerumunon urang, noek lah rombongon iye ke pocok hatop ngan menoronko urang lompoh iye besamo dengan daman tidornyr ke tangah- tangah de hadopon Yesus. ²⁰ Tekela ngelek imannye, Yesus bekehato, " Hai dolor, dosome sodah deampuni." ²¹ Ahli-ahli Taurat ngan urang- urang Farisi mulai betanyo-tanyo," siapekah urang nyo menghujat Allah nie? Siape pacok mengamponi doso-doso kecuali Allah bae?" ²² Tekela Yesus mengetahui pekeron rombongon iye, Enye bekehato, " Mengka kowe betanyo upa iye delom hatime? ²³ Mone nyo lobeh ungai, mengehatoko' Doso-dosome sodah deamponi' apo jego ngan bejelonlah'? ²⁴ hambok sebeleknye, empoknyo kowe mengetahui behwa Anak Mendesio bekuaso de behumi untok mengamponi doso,"Yesus bekehato kepado urang lopoh iye," Ake bekehato kepadome: Jegolah, angketlah daman tidorme ngan belek lah." ²⁵ seketiko iye jugo, urang iye langsung togok dedepan segelo iurang ngan ngambek damannyo bereng, lalu bejelon belek sambel memuji Allah. ²⁶ Segelo urangiye meraso heran ngan memuji Allah. Dengan deponohi raso takot nyo gede tehadop kuaso Allah, beroyot iye bekehato," Sari nie kamie ngelek hal-halnyo luar biaso!" ²⁷ Setelah iye, Yesus keluor ngan ngelek seurang pemalak pajak benamo Lewi nyo sedang dodok de daman pemongoton pajak. Yesus bekehato kepadonye, " Hilulah Ake." ²⁸ Mangko Lewi pon togok, meninggalko segelonye,ngan mehilui Yesus. ²⁹ Kemudion, enye mengadoko pesta gede untok Yesus de rumahye. Lobot urang pemalak pajak ngan urang- urang loen nyo makon besamonye. ³⁰ Hambok sebeleknye, urang- urang Farisi ngan ahli-ahli taurat mulai mehege kepado mured- mured Yesus,"Mengka kowe makon ngan minom besamo rombongon pemalak pajak ngan urang-urang bedoso?" ³¹ Yesus menyimbot ngan bekehato kepado rombongon iye," Bukon urang- urang sehat nyo memereluko deetor, hambok urang-urang saket. ³² Ake jongok bukon untok mantou urang bonor, hambok untok mantou urang- urang bedoso emponyo enye betobat." ³³ Rombongon iye bekehato kepado Yesus," Mored-mored Yohanes Pembaptis recap bepuaso ngan bedoa, upa iye jugo mored-mored urang Farisi. Hambok sebeleknye, mored-mored-Me selalu makon ngan minom." ³⁴ Yesus bekehato kepado rombongon," pacokah kowe nyuruh rombongon pengireng penganten enton untok bepuaso tekala penganten jenton iye maseh besamo-samo ngan mike? ³⁵ Hambok, ari- ari iye nak jongok, tekela penganten jenton iye de ambek jak mike, ngan pado sari iyelah mike nak bepuaso." ³⁶ Yesus jugo menceritako perumpamaon nie kepado rombongon iye," Hopi seurangpun nak nyeyeget sehelai koen jak beju beheru untok menampol bejunyo lah borok. Ulehnyo demikion, urang iye nak merosak bejunyo beheru, ngan koen penampol jak koen nyo beheru iye hopi akon cocok dengan bejunyo borok. ³⁷ Demikion jugo hopiado seurangpunnyo menuangko anggor beheru kedelom kantong kuletnyo lamo. Anggor beheru iye todo menyegetko kantong kulet nyo lamo sehinggo anggor iye todo tetumpah ngan kantong kuletnye hancor. ³⁸ Anggor nyo beheru haros de simpan de delom kantong kulet nyo beheru. ³⁹ Hopi seurangpun nyo lah minom anggor lamo, endok meminom anggor beheru sabab enye bekehato, 'anggor nyo lamo iye lobeh enak.""