¹ Sesodah segelo iye, ado perayaon hari rayo urang Yahudi ngan Yesus noek ke Yerusalem. ² De Yerusallem, de parok Pintu Gerbang Domba ado sebuah kolam nyo delom beheso Ibrani desobot Betesda, nyo memeleki lima serambi. ³ De serambi-serambi iye, ado neman urang saket tebereng: urang buta, urang timpang, ngan urang lumpoh (mike menungguko aek de kolam iye bergolak. ⁴ Sabab, podo saat-saat tetentu, melekat Tuhan nak turun ke kolam ngan menggoroko aeknye. Urang nyo pertamo kali masok ke kolam sesodah aeknye bergolak, nak desembuhko deri penyaket ape pon nyo dederitanye). ⁵ De sane, ado urang nyo lah saket selamo 38 tahon. ⁶ Ketiko Yesus ngelek enye tebereng de sane ngan mengetahui bahwa enye lah sajo lamo menderita saket, Yesus betanyo kepodonye, "Apekah kowe endok desembuhko?" ⁷ Urang saket iye menjawab, "Tuan, hopi ado urang nyo menoronko ake ke delom kolam saat aeknye begolak, cuma sementaro ake beusaha urang loen lah turon mendehuluike." ⁸ Yesus boek kepodonye, "Togoklah! Angketlah kasorme ngan bejelonlah." ⁹ Saat iye jugo, urang iye desembuhko, enye ngangket kasornye, ngan bejelon. Hambok, ari iye adolah ari Sabat. ¹⁰ Ulenyo iye, urang-urang Yahudi boek kepodo urang nyo desembuhko iye, "Sari nie adolah ari Sabat, kowe hopi boleh mengangket kasorme." ¹¹ Cuma hambok, enye menjawab, "Urang nyo menyembuhkoake, Enyelah nyo boek kepodoke, 'Angketlah kasorme ngan bejelonlah.''' ¹² Mike bentanyo kepodonye, "Siapekah Urang nyo boek kepodome, 'Angketlah kasorme ngan bejelonlah'?" ¹³ Hambok, urang nyo lah desembuhko iye hopi tahu siape Enye ulenyo Yesus lah mehintep jak urang lobot de tempat iye. ¹⁴ Sesodah iye, Yesus betomu lagi ngan urang iye di Bait Allah ngan boek kepodonye, "Dongor, kowe lah beik. jengon bebuat doso lagi empoknyo hopi tejedi hal nyo lobeh borok kepodome!" ¹⁵ Urang lari ngan menceritoko kepodo urang-urang Yahudi bahwa Yesuslah nyo lah menyembuhkonye. ¹⁶ Ulenyo iye, urang-urang Yahudi menganiaya Yesus ulenyo enye melakuko segelo iye podo hari Sabat. ¹⁷ Cuma hambok, Yesus boek kepodo mike, "Bepa-Ke lagi begawe sampoi saat nie, mengka Ake pon maseh begawe." ¹⁸ Jawabon iye membuat urang-urang Yahudi beusaha lobeh kuat lagi untok membunoh Yesus, bukon hanyo karena Yesus melanggar hari Sabat, meloenko jugo ulenyo menyobot Allah sebagai Bepa-Nye dewek,nyo bearti menyamoko diri-Nyo dewek ngan Allah. ¹⁹ Kemudion, Yesus menjawab mike, ujo-Nye, "Sesunggohnye, sesunggohnye, Ake boek kepodome, Anak hopi depot menggaweko sesuatu deri diri-Nyo dewek, Munye Enye hopi ngelek Bepa gawekonye; ulenyo ape nyo degaweko Bepa, iye jugo nyo degaweko Anak. ²⁰ Sabab, Bepa mngasehi Anak ngan ngolehko kepodo Anak segelo sesuatu nyo Enye dewek lakuko, ngan Bepa jugo nak ngolehko kepodo-Nye gaweon-gaweon nyo lobeh godong lagi empoknyo kowe takjub. ²¹ Sabab, samo upa Bepa membangketko urang mati ngan membori mike kehidupon, demikion jugo Anak membori kehidupon kepodo siape nyo Enye endoko. ²² Bepa hopi menghakemi siape pon, cuma lah memboriko segelo penghakemon iye kepodo Anak, ²³ empoknyo segelo urang nak menghormati Anak samo upah mika menghormati Bepa. Urang nyo hopi menghormati Anak, hopi menghormati Bepa nyo mengutos-Nye. ²⁴ Sesungguhnye Ake melabehko kepodome, urang nyo mendongor perkataon-Ke ngan pecayo kepodo Enye nyo mengotos Ake menuhani kehidopon kekal, ngan hopi masok ke delom penghakemon ulenyo enye lah pendah deri kemation ke kehidopon. ²⁵ Sesungguhnye Ake boek kepodome, waktunye lah sampoi ngan lah sampoi kinie, ketiko urang-urang mati nak mendongor suaro Anak Allah ngan mike nyo mendongor iye nak hidop. ²⁶ Ulenyo upamone Bepa memeleki hidop de delom diri-Nye dewek, demikion jugo Enye memboriko kepodo Anak hidop de delom diri-Nye dewek, ²⁷ ngan Bepa membori kuaso kepodo Anak untok menjelonko penghakemon ulenyo Enye adolah Anak Mendesio. ²⁸ Jengon heran akan hal nie ulenyo saatnye nak sampoi ketiko segelo urang nyo ado de delom kobor nak mendongor suaro-Nye ²⁹ ngan mike nak keluor, yaitu mike nyo lah bebuat beik nak menuju kebangketon hidop. Sedangko mika nyo bebuat jahat, menuju kebangketon penghakemon. ³⁰ Ake hopi depot bebuat ape-ape deri diri-Ke dewek. Ake menghakemi sesuoi nyo Ake dongor ngan penghakemon-ke adel ulenyo Ake hopi delok kehendak-Ke dewek, meloenko kehendak Enye nyo mengotos Ake." (Kesaksion tentang Yesus Beasal deri Allah Bapa) ³¹ "Munye Ake besaksi tentang diri-Ke dewek, kesaksion-Ke hopi bonor. ³² Cuma hambok, ado nyo loen nyo besaksi tentang Ake, ngan Ake tahu bahwa kesaksion nyo deboriko-Nye tentang Ake iye bonor. ³³ Kowe sodah mengotos kepodo Yohanes ngan enye lah memboriko kesaksion tentang kebonoron. ³⁴ Cuma hambok, kesaksion nyo Ake terimo bukon deri mendesio. ake melabehko hal nie empoknyo kowe deselamatko. ³⁵ Yohanes adolah pelita nyo menyala ngan becahayo, ngan kowe endok besukacita sesaat delom cehayonye. ³⁶ Cuma hambok, kesaksion nyo Ake meleki lobeh godong deripado kesaksion Yohanes. Sabab, gaweon-gaweon nyo deserahko Bepa kepodo-Ke untok kusodahko, yaitu gaweon-gaweon nyo edang Kulakuko kinie, memboriko kesaksion tentang Ake bahwa Bepalah nyo mengotos Ake. ³⁷ Ngan, Bepa nyo mengotos Ake iye dewek lah membori kesaksion tentang Ake. Cuma hambok, kowe hopi perenah mendongor suaro-Nye ataupon ngelek rupa-Nye. ³⁸ Ngan, firman-Nye hopi tinggal delom hatime ulenyo kowe hopi pecayo kepodo Enye nyo deutos-Nye. ³⁹ kowe mempelajori Kitab Suci ulenyo kowe menyangko bahwa de delom Kitab Suci kowe nak mendepotko hidop nyo kekal; ngan Kitab Suci iye jugo memboriko kesaksion tentang Ake, ⁴⁰ cuma kowe hopi endok jongok kepodo-Ke empoknyo kowe hidop. ⁴¹ Ake hopi menerimo kemuliaon deri mendesio. ⁴² Hambok, Ake mengenal kowe, bahwa kowe hopi mempunyoi kaseh Allah de delom dirime. ⁴³ Ake jongok pucok namo Bepa-Ke, cuma kowe hopi menerimo Ake. Munye urang loen jongok pocok namo mike dewek, kowe nak nerimonye. ⁴⁴ Upamonekah kowe depot pecayo, munye kowe nerimo pujion deri seurang akan nyo loen ngan hopi delok pujion nyo jongok deri Allah nyo Esa? ⁴⁵ Jengon menyangko bahwa Ake nak mendakwame de hadopon Bepa; nyo mendakwa me adolah Musa, yoiye urang nyo kepodonye kowe beharop. ⁴⁶ Sabab, munye kowe pecayo kepodo Musa, kowe harosnye pecayo kepodo-Ke ulenyo Musa menoles tentang Ake. ⁴⁷ Cuma hambok, munye kowe hopi pecayo podo ape nyo Musa tules, upamone mungken kowe pecayo podo perkataon-Ke?"