1
Waktu ari Sabat, pas Yesus bajaatn ka uma gandum, murit-murit-E mebet egek gandum lalu dimakatn, pas samintara koa kabatne ngisar pake kokot.
2
Tapi sangahe urakng Farisi bakata: " Ngahe kao minjawat hal nang ina di muihan kade ari Sabat?"
3
Tarus Yesus nyahuti kabatne koa: "Ina me kao maca ahe nang dingarajaan di Daud, pas ia ba dangan nang nunaan ia kaparatn,
4
aya mae ia taama' ka Rumah Jubata lalu naap roti sajian, ia makatn lalu ia mareatn ka pangikut-pangikute, padahal roti koa ina muih di makatn, kacuali di na' imam-imam?"
5
ja Yesus agik ka kabatne koa: "Anak Manusia koa Jubata atas ari Sabat".
6
Pas ari sabat nang lain, Yesus taama' ka rumah sambayang, lalu ngajar. Dikoa ada urakng nang mati kokot kanane.
7
Ahli-ahli Taurat ba urakng-urakng Farisi maratiatn Yesus, kade-kade Ia nyamuhan urakng ari Sabat agik, biar kabatne koa namu alasan untu' nyalahatn Ia.
8
Tapi ia nauan pikiran kabatne koa, lalu bakata ka urakng nang kokote mati koa: "Umpat, badirilah ka tangah!" Lalu umpatlah urakng koa badiri.
9
Lalu Yesus bakata ka kabatne koa:"Aku batanya ka kao: Mae gek nang dimuihan ka ari Sabat, babuat baik gek babuat jahat, nyalamatatn nyawa urakng gek munuh urakng?"
10
Apas koa ia nee bakuliling ka kabatne koa samua, lalu bakata ka urakng sakit koa: " jooatn lah kokotnyu!" Urakng koa minjawat yakoa ngihan, lalu samuhlah kokote.
11
Lalu manas lah ati kabatne, tarus barunding ahe nang maok di pinjawat ka Yesus.
12
Pas waktu koa ampuslah Yesus ka bukit mao' badoa, Ia samaam-maaman badoa ka Jubata.
13
Waktu abut siakng, Ia nyaru' murit-murit-E atakng ka Ia, lalu milih ka antara kabatne koa dua balas urakng, nang Ia nyabut rasul:
14
Simon nang Ia mare dama Petrus, ba Andreas kamaru' Simon, Yakobus ba Yohanes, Filipus ba Bartolomeus,
15
Matius ba Tomas, Yakobus anak Alfeus, ba Simon nang disabut urakng Zelot,
16
Yudas anak Yakobus, ba Yudas Iskariot nang tarus ana jaji penghianat
17
Lalu Ia turutn ba kabatne, tarus baranti ka tampat nang datar: dikoa bakomo' sajumbalah ayak dari murit-murite ba manyak urakng lain nang atakng dari saluruh Yudea ba umpat ka Yerusalem ba daerah pantai Tirus ba Sidon.
18
Dangan koa atakng untu nangaratn Ia ba untu di samuhan dari panyakit-panyakit; ugak dangan nang dingarasuki di roh-roh jahat namu kasamuhan.
19
Samua urakng manyak koa barusaha nyantuh Ia, barang ada kuasa nang muok dari Ia lalu samua urakng koa tomo di-He.
20
Lalu Yesus nee murit-murit-E tarus bakata: Bahagialah, hei kao nang misikin, barang kaolah nang punya karajaan Jubata.
20
Bahagialah, hei kao nang angkitn kaparatn, barang kao ana di puasatn. Bahagialah hei kao nang angkitn nangis, barang kao ana gaak.
22
Babahagialah kao, kade di Anak Manusia urakng teget ka kao, ba kabatne koa ngucilkan kao, ba nyaci kao, ba nolak damanyu aya jukut nang jahat.
23
Basukacitalah pas waktu koa bagambiralah barang sasidie, upahnyu ayak ka saruga; barang aya nyianlah ugak na' enek moyang kabatne koa udah memperlakukan nabi-nabi.
24
Tapi cilakalah kao, hei kao nang kaya, jukute daapm kakayaatn nyu kao udah namu pangiburatn.
25
Cilakalah kao nang angkitn kanyang, barang ana kao kaparatn. Cilakalah kao, nang angkitn gaak, barang kao ana nangis badukacita.
26
Cilakalah kao, kade samua urakng muji kao; barang aya nyian lah ugak enek moyang kabatne udah memperlakukan nabi-nabi palsu."
27
"Tapi ka kao, nang nangaratn Aku, Aku bakata: kasihi'klah munsuhnyu, babuatlah baik ka urakng nang negetatn kao;
28
mintalah barakat untu urakng nang ngutuk kao; badoalah untu urakng nang nyaci kao.
29
Barangsae nang nampar koo'k nyu nang sete, bareatn ugak koo'k nyu nang lain, ba sae nang naap silobongnyu biaratn ugak ia naap bajunyu.
30
Bare'klah ka satiap urakng nang minta ka kao; amelah minta pabaasatn ka urakng nang naap kapunyaan nyu.
31
Ayamae nang kao maoan urakng pinjawat ka kao, pinjawatlah ugak aya koa ka dangan.
32
Ba kade kao ngasihi'k urakng nang ngasihi'k kao, ahe gek jasanyu? Barang urakng-urakng badosa pun ngasihi'k ugak urakng-urakng nang ngasihi'k ia.
33
Barang kade kao babuat baik ka urakng nang babuat baik ka kao, ahe gek jasanyu? urakng-urakng badosa pun babuat yakoa ugak.
34
Ba kade kao minyaman barang ka urakng, jukute kao ba arap ana narima sesuatu dari ia, ahe gek jasanyu? Urakng-urakng badosa pun minyaman ka urakng-urakng badosa, biar kabatne narima pabaasatn nang sama manyak.
35
Tapi kao, kasihi'k lah munsuhnyu babuat baiklah ka dangan pinyapmi'k tampa ngarapatn pabaasatn, upahnyu ana aya'k ba kao ana jaji kamuda-kamuda Jubata Nang Siditingi, barang Ia baik ka urakng-urakng nang ina nauan batarima' kasih ba urakng-urakng nang jahat.
36
Harus lah kao murah ati, sama aya Apaknyu murah ati."
37
"Amelah kao ngakimi, kao pun ina di hakimi'k. Ba amelah kao ngukum, kao pun ana ina akan di ukum: ampuni'klah kao pun diampuni'k.
38
Bare'lah kao pun ana dibare': sete' takaran nang baik, nang dimadatatn, nang dingoncang, ba nang tumpah ka uwar ana di bubuhatn ka daamp pangkoatnyu. Barang ukuran nang kao make untu' ngukur, ana diukuratn ka kao ugak.
39
Yesus pun ngataatn ugak sote' parumpamaan ka kabatne: "Bisa me urakng buta' ngejengan urakng buta? Buke' me badua koa ana bisa jantu ka daapm ubakng.
40
Seko'k murit ina labih dari gurue, tapi saepun nang dah tamat palajarane ana sabaya ba gurue.
41
Ngahe gek kao nee salubong ka daapm mata kamaruknyu, padahal balok ka daapm matanyu babaro ina kao tauanan?
42
Ayamae kao bisa bakata ka kamaruknyu: Kamaru'k, dian aku muokatn dohok salubong nang ada kamatanyu, padahal balok nang kadaapm matanyu ina kao tee'? Hei urakng munafik, kauwasatn doho' balok ka matanyu, kao pun ana nee jelas untu' ngauwasatn salubong koa dari mata kamaru' nyu."
43
Jukute ina ada puhutn nang baik nang ngasilatn buah nang ina baik ba ina ada ugak puhutn nang ina baik nang ngasilatn buah nang baik.
44
Barang satiap puhutn dikanal dari buahe. Jukute dari tompoatn duri urakng ina mebet buah ara' ba dari duri-duri ina mebet buah anggor.
45
Urakng nang baik muokatn barang nang baik dari perbendaharaan atie nang baik ba urakng nang jahat muokatn barang nang jahat dari perbendaharaan ne nang jahat. Barang nang di ngataatn moote, ngaoompe dari atie."
46
"Ngahe kao nyarui' Aku, Jubata, Jubata padahal kao ina minjawat ahe nang Aku matakatn?
47
Satiap urakng nang atakng ka Aku ba nangaratn pakataatn-Ku ba ngalakukan iya- Aku mao matakatn ba sae ia bisa disamaan-,
48
ia sama ba urakng nang madiriatn rumah: Urakng koa menggali' daapm-daapm ba minjawat dasare ka atas batu, Waktu atakng aik baha ba banjir ngatakngi rumah koa, rumah koa ina runtuh, barang rumah koa dimangun kukuh.
49
Tapi sae pun nang nangar pakataatn-Ku, tapi ina ngalakukan iya, ia sama ba urakng nang madiriatn rumah ka atas tanah ina badasar. Pas banjir ngatakngi, rumah koa langsung rorok ba ayak sidi karusakane koa.