¹ Yesus Neeatn Dirie Ka Tujuh Urakng Murid-Te Lalu Yesus neeatn diri-E agi ka murid - murid-Te ka samak dano Tiberias, Ia neeatn diri-E carae ayanyian: ² Simon Petrus, Thomas nang di saru' uga' Didimus, Natanael dari Galilea, anak Zebedus, lalu dua murid nang lain agi' bakom'. ³ Simon Petrus bakata ka kabatne," Aku mao' ampus naapa' ikatn." Kabatne bakata ka ia," Kami mao uga' ampus ba kao," Kabatne samua ampus ka uwas lalu naik ka parahu, tapi maam koa, kabatne samua ina' namu ikatn. ⁴ Waktu abut udah dini ari, Yesus badiri ka tapi sunge, murid - murid ina' nahui' kade' koa Yesus. ⁵ Ia bakata ka kabatne," Anak - anak ada kita ba ikatn?" Kabatne nyawab," Ina'." ⁶ Ia bakata ka kabatne," Tebaratnlah jala kita' ka sabalah kanan parahu, pasti kita' namu." Lalu kabatne nebaratn jalae, tapi ina' bisa ditarik ka daapm parahu soale bainsi' ikatn. ⁷ Maka dari koa, murid nang dikasihi' Yesus bakata ka Petrus, "Koa Jubata!" Waktu Simon nangar kade' koa Jubata, ia langsung makeatn pakeanne soale ia muka' waktu bakaraja, lalu tarajutn ka daapm dano. ⁸ Murid - murid nang lain atakng ba parahu lalu narik jala nang bainsi' ikatn. Soale, ina' jauh dari tabikng, kira-kira 200 hasta. ⁹ Waktu kabatne nyampe ka tabikng, kabatne nee' bara api ba ikatn nang udah di manggang ka atase ada roti uga'. ¹⁰ Yesus bakata," Icaknglah sangahe eko' ikatn nang barahu kita' namu koa," ¹¹ Simon Petrus naik ka parahu ba narik jala nang bainsi' ikatn nang aya'-aya' koa ka tabikng, jumbalahe 153 eko' , Tapi biar manyak ikatn koa jalae ina' rantak ¹² Yesus bakata ka kabatne," Ije' diri' makatn." Seko'pun murid - murid koa ina' barani batanya ka Ia," Sae me Kita'?" soale kabatne nahui' kade' Iacadalah Jubata. ¹³ Yesus atakng lalu naap roti koa lalu dimareatn ka kabatne. Ayakoa uga' ikatn koa dimagiatn. ¹⁴ Nyianlah ka talu kaiye Yesus neeatn diri-E ka para murid-murid-Te aka' Ia dibangkitatn dari antara urakng mati. Yesus minta' Petrus Ngambalaatn Domba-Domba-E ¹⁵ Aka' makatn kabatne,Yesus bakata ka Simon Petrus," Simon anak Yohanes, ahe ge' kao ngasihi' Aku labih dari samua nyian?" Petrus nyawab," Banar Jubataa,ita' nahui' kade' aku ngasihi' Kita'." Lalu, Yesus bakata ka ia, " Gambalaatnlah domba - doma-Ku !". ¹⁶ Yesus batanya' agi' nang kadua kalie ka ia," Simon ,anak Yohanes, ahe ge' kao ngasihi' Aku?" Petrus nyawab agi'," Banar Jubataa, Kita' nahui' kade' aku ngasihi' Kita'." Yesus bakata ka ia," Gambalaatnlah domba-domba-Ku!" ¹⁷ Yesus bakata ka ia untuk nang ka talu kaiye," Simon anak Yohanes, ahe ge' kso ngasihi' Aku?" Ati Petrus jaji sadih soale Yesus batanya' untuk ka talu kaiye," Ahe ge' kao ngasihi' Aku?" lalu, Petrus ka Ia," Jubata kita' nahui' sagalae. Kita' nahui' kade' Aku ngasihi Kita'!" Yesus bakata ka ia," Gambalaatnlah domba-domba-Ku!" ¹⁸ Aku bakata nang sabatole ka kao, waktu kao masih muda', kao babaro nang ngikatatn ikat pinggangnyu ka pingakngnyu, ba bajaatn kamae kao mao', tapi waktu kao udah tuha, kao ngangkat kokotnyu lalu urakng lain nang ngikatatn ikat pinggangnyu ka pingakngnyu, ba maba kao ka tampat nang ina' kao sukai' ¹⁹ Yesus ngataatn hal nyian untu' nojokatn ba kamatiatn nang ayamae Petrus mao' muliaatn Jubata Panampa'. Aka' ngataatn hal koa, Ia bakata ka Petrus." Tunaan Aku!" Ahe nang mao' Tajadi ka Murid nang Sidi Dikasihi' Yesus? ²⁰ Petrus mamalek lalu nee' murid nang sidi dikasihi' Yesus agi' nunaan kabatne. Ia adalah murid nang duduk samak dada Yesus waktu parjamuan maam lalu batanya'," Jubata, sae me urakng nang mao' ngianati' Kita' koa?" ²¹ Waktu nee' Ia Petrus batanya'ka Yesus," Jubata, ayamae ba ia?" ²² Yesus nyawab," Saandaiye Aku mao' ia tatap idup sampe Aku atakng kambali, ahe urusannyu? Kao, tunaan Aku!" ²³ Maka pakataatm Yesus nyian tasabar ka antara ayukng-ayukng koa kade' murid koa ina' akan mati, padahal Yesus ina' ngataatn ka ia kade' ia ina' akan mati, malainkan kahe bakata," Saandaiye Aku mao' ia tatap idup sampe Aku atakng agi', ahe urusannyu?" ²⁴ Ialah murid nang basaksi manganai' samua hal nyian, ba nulis samua nyian, lalu diri' nahui' kade' kasaksianne koa banar. ²⁵ Masih manyak hal lain agi' nang Yesus ngarajaan, nang lain ditulisatn sote'-sote, aku rasa dunia nyian pun ina' akan cukup untu' samua kitab nang arus ditulis koa