¹ Kaadapatn Jubataba Yesus Karistus nang akan ngakimi' urakng nang idup ba nang mati, aku bapasatn sidi-sidi ka kao demi Kahadiran-Ne ba demi Karajaan-Ne: ² Baritaatnlah firman, siap sedialah baik gek ina' baik waktu e, padahatnlah ahe nang salah, tagurlah ba nasihati'klah ba kasabaran ba pangajaran. ³ Barang akan atakng waktu e, urakng ina' bisa agi'k narima'k ajaran sehat, tapi kabatnne akan ngomoan guru-guru sasuai kamaoanne untu' muasatn tarenyekngnge. ⁴ Kabatnne akan malekatn tarenyekngnge dari kabanaran ba muka ia untu curita dongeng. ⁵ Tapi kuasai'klah diri'k nyu daapm sagala hal, sabarlah menderita, baritaatnlah Injil ba tunaiatnlah tugas palayanannyu! ⁶ Kade'k soal diri'kku, darahku udah mulai ta tumpah untu jaji persembahan ba waktu kamatian ku udah samak. ⁷ Aku udah ngakiri'k pertandingan nang baik, aku udah nyampe ka garis ahir ba aku udah mihara iman. ⁸ Ampeatn udah tersedia untu' ku mahkota kabanaran nang udah dingaruniakan ka aku di Tuhan, Hakim nang adil, ka ari-E; tapi buke' kahe ka aku, tapi uga'k ka samua urakng nang ngarinduatn ka atangan-Ne. ⁹ Barusahalah biar bijak atakng ka aku, ¹⁰ barang Demas udah nyintai'k dunia nyian ba ningaatn aku. Ia udah barangkat ka Tesalonika. Krekes udah ampus ka Galatia ba Titus ka Dalmatia. ¹¹ Kahe Lukas nang diapm ba aku. Jemputlah Markus ba icaknglah ia kadian, barang palayananne penting bagiku. ¹² Tikhikus udah ku ngirim ka Efesus. ¹³ Kade' kao ka dian icakng ugak jubah nang ku ningaatn ka Troas ka rumah Karpus ba kitap-kitapku ugak, terutama perkamen koa. ¹⁴ Aleksander, tukang timaga koa, udah manyak babuat kajahatan ka aku. Tuhan akan maas sasuai pabuatanne. ¹⁵ Haruslah kao uga'k waspada ka ia, barang ia nantakng sidi ajaran diri'k. ¹⁶ Ka pembelaan ku nang doho'k ina' seko' urakng pun nolong aku, samuae ningaatn aku- kira e samua koa ina' ditanggongan ka atas kabatnne koa-, ¹⁷ tapi Jubata udah ngayukngi aku ba nguatatn aku, biar ba parantara aku Injil dibaritaatn sapanuhe ba samua urakng buke' Yahudi nangaratn ia. Untu koa aku akan lapas dari moot singa. ¹⁸ Ba Jubata akan ngalapasatn aku dari satiap usaha nang jahat. Ia akan nyalamatatn aku, biar aku taama'k ka daapm karajaan-ne ka saruga. Untu' Ia-lah kamuliaan salama-lamae! Amin. ¹⁹ Salam ka Priska ba Akwila ba ka kaluarga Onesiforus. ²⁰ Erastus diapm ka korintus ba Trofimus ku ningaatn daapm kaadaan sakit ka Miletus. ²¹ Barusahalah ka dian sanape munsim dingi. Salam dari Ebulus ba Pudes ba Linus ba Klaudia ba dari samua saudara. ²² Tuhan nyaratai' rohnyu. Kasih karunia-E nyaratai kao!