अध्याय - 5
1
वे हाथी तुमा देवाआ मोयाला पोयरा होस तिईयापाचला चालणारे वेअेरा.
2
आने ख्रिस्ताही जेहेकी आपोपे मोया केअेयी आने देवाल सतोषविणारे सुंगंध मिला जोजे तिईयाल, आपोखातोर अर्पण आने बलिदाने अेहेकी तिईयाई सोताल दिटाक्यो, तेहकी तुमा मोयाकी चाला.
3
हीकल्यागोठ्या केल्लाबी प्रकारा खोठ्यागोठ्या आने आलाई ईया तुमाम नाव आने विचार आवा नाहा जोजे, ई पवित्र लोकाखातोर हारो नाहा.
4
तेहकीज केल्लीबी लाजवुनारी गोठ्या मुर्खाहोस गोगणु आने माठ्या गोठ्या तुमाम रा नाहा जोजे, पेन तिईयाही ने उलटो तुमाम उपकार स्तुती रा जोजे.
5
काहाका तुमा ई होमजा का, जो केडो माआहू सीणालो , मोठो आने लोभी तेहकीज मुर्तिलपुजणारो हाय तिइ्रयाल ख्रिस्ताआ आने देवा राजाम वतन नाहा.
6
पोकला भाषणाकी केडो तुमान फोसाडा नाहा जोजे काहाका ई गोठीकी आज्ञा मुडणारा पोयराप देवा क्रोध वेअनारे हाय.
7
तिईल तुमा तिईया भागीदार वेअेरा नाहा,
8
काहाका एकटाईम अेहेडो आथो का तुमाआ आंधाराम आथे, पेन तुमाआ आमी प्रभु उजावाडाम हाय, ते आमी उजवाडाम चालणारा लोकाहारके वेअेरा.
9
काहाका उजवाडा फाेलवे हारोपोन, जोमिनरोबुलो आने खेराई देखाय आवेहे.
10
प्रभुल केहडाकी संतोष वेअेरी ई तुमाआ पारखी ल्या. आने आंधारामेने जी फोलवे नाहा देणारो काम हाय तिया भागीदार वेअरा नाहा.
11
ते तुमाआ तिईया उगाडी केअेरा.
12
काहाका ज्या दोबालयागोठ्या तिईयाई केअेलयाहाय तिगोठी आखनुबी लाजवानु सारखी हाय.
13
होग्गो उजावाडाकी उगाडो वेअेहे,
14
काहाका तिईया होग्गाप तो उजवाडो चोमकेहे तिईयाल अेहकी आखालो हाय, “हे हुवणारा उठा जो , आने मोअलामने उठ, आने ख्रिस्त तोप उजवाडी.”
15
तिईयालातुमाआ केअेहेडो जीवतेहे ईयाखातोर कालजी केअणारे वेअेरा, मुर्ख लोकाआहारखे वेअेरा नाहा, ते हारा लोकाहारखे वेअेरो.
16
टाईमा हारो उपयोग केअरा काहाका ज्या दिहाम तुमाआ रिई रिईले हाय ते माठा दिही हाय.
17
तिइयाल मुर्खाहोस वागा नाहा ते उलओ परमेश्वरा इच्छा काय हाय ई होमजीन ल्या.
18
आने होरो पिईन साकल्याहोस नाहा ऱ्याआ, तीईयाल तो नाशहोवे जाई पेन उलट तुमाआ पवित्र आत्माकी पुरीरीती पोराय जा.
19
होग्गा रिती स्तोत्रे, गीते आखा आने आत्मिक गिताकी तिईया स्तुती केअेरा, एकबीजाआरी गोठ्याकेअेरा गीत आखा आने आपो मोनाकी परमेश्वरा स्तुती केअेरा.
20
आपो प्रभु येशु ख्रिस्ताआ नावम देव जो ओपो बाहाको हाय, तिईया होग्गा गोठी उपकार माना.
21
ख्रिस्ताल बीईन एकविजाल आदर किन आपुल नम्रपणाकी तिईया आधीन ऱ्याआ.
ख्रिस्ती कुटूबा जिवनक्रम
22
थेईही जेहकी तुमाआ प्रभुल मानीन रेत्याहा, तेहकीज आपो माट्याल बी मानीन ऱ्याआ.
23
काहाका ख्रिस्त जेहकी मोडली मुनको हाय, तेहकीच माटी थेई मुणको हाय आने ख्रिस्त विश्वास थोवणारा शरीरा तारणारो हाय.
24
जेहकी मंडळी ख्रिस्ताल शरण जाआये, तेहकीच थेईय होग्ग्या गोठीम आपो माट्याल मानीन राआ जोजे.
25
माटींही, जेहकी ख्रिस्त मोडलीप प्रेम केहे, तेहकीच तुमा आपो थेईप निस्वार्थ प्रेम केरा तिईयाई तिईयो खातोर सोमाल दिदेदो.
26
ईयाखातोर का तीईयाइ तिईयोल देवाआ वचनरुपी पाआयाकी ताेविन साफ किईन पवित्र केअेरा जोजे.
27
ईयाखातोर का तो मोंडलील सोता केअेता गौरवी अेहकी केअरी , तिईयोल केअेहेडोच डाग नेय रेहे आने चेमटाली आने केअेलाच प्रकाराआ आरदी नाय रेहे ते ती पवित्र ओन निर्दोष रिई.
28
ई रितीकी माट्यांयबी आपो थेईप अहकीच प्रेम केअेरा जोजे, जेहकी ते आपो शरीराप प्रेम केअेतेहे जो केडो तिईया आपो येईप प्रेम केअेहे, तो आपोप प्रेम केअेहे.
29
काहाका आमी लुगी केअेडाईच आपो शरीराल द्वेश केअेयो नाहा, उलटो तो तिईया पोषण केअेहे ओन कालजी लेअेहे. जेहकी ख्रिस्त मंडळी पोषण केअेहे ओन कालजी लेअेहे.
30
काहाका आपो तिईया शरीरा अंग हाय,
31
तिईयाल ईयाकेअेता माआहु तिईया बाहको आने याहाकी ईयान सोडीदी आने तिईय थेई आरी जोडाई जाई आने ते बेनी एकजीव वेअेरी.
32
ई दोपलो खेरो खुप कामा हाय आने माअयु ई आखुहू का तो ख्रिस्त आने मोडलील लागु पोडी.
33
तेहकीच , तुमामने होग्गाही तिईया थेईप प्रेम केअेरा जोजे आने थेईही आपो मान राखा जोजे.