5 तियाल आमी ओ मा बाहाका दुन्या उबजा आगलो तो आरी मान जो मान पोन आथो तेहेंकीज तु आमी तो आरी मा नाव उचो के . 6 जे माहे दुन्यामन तुय मान देदेहे तियाहान मायुय तो नाव आखी देखाव्यो ते तोज आथेा आन ते तुय मान देदे आने तियाहान तो वचन पाल्यो. 7 आमी तियान होमजायो का तो काय तुय मान देदलो ते बादो तो इहिने दान हाय. 8 काहाका जे वचने तुय मान देदे ते मायुय तियाहान देदले हाय आन तियाहाय ते लेदे आय तो इहिने आलोहो इ तियाहाय आअखी लेदे आय तो इहिने आलोहो इ यिताहाय आअखी लेदो आन तुय मान मोकल्योहो एहेंकी भोरुचो केयो. 9 तियाहा खातोर आय प्रार्थना किहू आय दुनिया अविश्वासी लोकाहा खातोर प्रार्थना केता नाहा पेन जे माहे तुय मान देदेहे तियाहा खातोर आय प्रार्थरा किहू काहाका ते तोज हाय. 10 आन जो मा हाय तो तोहाय आन जो बादो तो हाय तो मा हाय तियाहाकी मा मान पान वादेहेच.
11 आन आमी आय दुनिया सोडीन जोहे पेन ते दुतियामुज री आय तोही आवुहू ओ पवित्र बाहाका जो नाव तुय मान देदलो हाय तिया नावाम तियाहान सांभाल इया खातोर की जेहेंकी आपु एक हा तेहेंकी जो भी एक वेरा जोजे. 12 आय तियाहा आरीज आथो, ताहा तुयू तो नाव मान देदलो तियाकी मायुय तियाहान सांभाल्या आन तियाहान कावीज नाह वेरा देदो, तिया बोद्दल शास्त्रलेख पुरो वेरा जोजेतलो तिया खातोर नाश वेअनु मार्ग जियाय निवड्यो तिया केडाज नाश वेअयो नाहा. 13 पेन आमी आय तोही आवुहू आन मा चेलाहाम मा आन पुरो वेरा जोजे तियाल आय दुनियाम ए गोठ्या आख्या. 14 मायुय तो वचन तियाहान देदलो हा जेहेकी आय दुनियानाहा तेहेकी ते भी दुनिया नाहा तियाल दुनिया अविश्वासी माहाय तियाहा विरुध्द केयोहो. 15 तु तियाहान दुनियामेने काडी ला जोजे एहेंकी प्रार्थना कता नाहा पेन तु तियाहान पापामने बाचावज एहेकी प्रार्थना केहू. 16 जेहेंकी आय दुनिया नाहा तेहेंकी ते भी दुनिया नाहा. 17 तु तियाहान खेरा पणाकी पवित्र के काहाका तो वचन इज खेरोपण हाय. 18 जेहेंकी तुय मान इया दुनियाम मोकलुलो तेहेकी आय तियाहान दुनियाम लोकहाम मोकलुहू. 19 तियाहान खातोर आय सोवताहा होपाय जाहु तो इया खातोर का ते भी खेरापणा की पुरेपुर होपाय जा जोजे. 20 आन आय तियाहा खातोर प्रार्थना नाहा केतो पेन ते जो वचन आखी तिया वचनाकी जे मापे भोरुसो केरी तियाहा खातोर भी आय प्रार्थना किहू. 21 इया खातोर का तियाहाय बादाहाय एक वेरा जोजे ओ होरग्या बाहाका आय प्रार्थना केहू का जेहेंकी तु माआम आन आय तोम होय तेहेंकी तियाहायभी आपूहूम एक वेरा जोजे. 22 आन जो मान मान तुय मान देदो तो मायुय तियाहान देदलो हाय इया खातोर का जेहेंकी आपु एक हा तेहेंकी तियाहाय भी एक वेरा जोजे. 23 आय तियाहाम आन तु माम एहेंकी ते बादे एक वेरा जोजे तियापनुज दतिया माहे होमजा जोजे का तुय मान मोकल्योहा आन जेहेंकी तुय मापे माया केयी तेहेकी मायुय भी तियाहापे माया केयी. 24 ओ मा बाहाका जे लोक तुय मान देदलो तियाहाय जिही आय हाय तिही मा आरी रा जोजे एहेकी मा मोरजी हाय इया खातोर का जो मान पान तुया मान देदलो हाय तो तियाहाय वेरा जोजे काहाका देवांय उबजावा पेहलाज तुय मापे माया केयी. 25 ओ पवित्र बाहाका दुनियामने माहाय तुल ओख्यो नाहा पेन मायुय तुल ओख्योहो आन तूय मान मोकल्योहो एहेंकी इयाहाय ओखी लेदोहो. 26 मायुय तियाहान तो बोद्दल आख्योहो आन तो बोद्दल आय आखतोज रेहे इया खातोर का जी माया तुय मापे केयाी ती माया तियाहाम रा जोजे आन आय तियाहाम रा जोजे.