¹ Ka mirehareha aminigny apiso, fa sy fatasao ze mety handesinigny anio. ² Aoky olo-kafa gny handoka anao fa sy gny vavanao avo; gny vahiny fa sy gny molosao avo. ³ Saino gny havesasy gny vato vo gny lazanigny fasy__gny fihasihanigny mola dra mavesasy vatany noho reo ro reo. ⁴ Misy gny habibianigny haoria vo gny fandriaky gny haoria, fa iza gny afaky hizoro eo anoloanigny hasarota-piaro? ⁵ Aleo anasy apahibemaso toy zay fitia avony. ⁶ Mahatoky gny rasy ataonigny nama, fa gny fahavalo dra mety hagnoroky mitafotafo anao. ⁷ Gny olo ze nihina mandra-pahavisiny dra manda na dre gny toho-tately aza, fa ho anigny olo resy koa, dra mamy gny raha mafaisy aby. ⁸ Manahaky gny voro ze mirenireny miala aminigny akaniny gny olo ze maniasia miala aminigny fonegnany. ⁹ Gny ranomagnisy vo emboky magnisy dra mapifaly gny fo, fa gny hamamianigny namany dra avy boak'aminigny torohevisy ami-kisi-po. ¹⁰ Ka mahafo gny namanao vo gny ranigny namanao, dra ka magnagny aminigny tragnonigny rahalahinao amigny andro-hahavoazanao. Soa vatany gny nama ze akaiky noho gny rahalahy ze lavisy. ¹¹ Hendre, ry zanako, dra apifalio gny foko; dra hamaly anigny maneso anahy zaho. ¹² Gny lelahy malio dra mahatalaky gny loza dra mivony, fa gny olo babo dra mandroso avo dra mizaly noho izay. ¹³ Alao gny akazon'ize nagnome atoky aminigny vahiny, dra tano ho atoky zay gny fa magnome atoky aminigny apela rasy fitondra-tegna izy. ¹⁴ Na iza na iza magnome sondrano gny namany aminigny feo abo vo maraindraim-be, dra raisy hanahaky gny ozo ze sondrano zay! ¹⁵ Gny valy pifalisy dra manahaky gny ora-mikiza aminigny andro fahavarasy; ¹⁶ gny mihazon'anazy dra manahaky gny mihazo rivosy, na miezaky mamihina dililo aminigny tagnanao akavana. ¹⁷ Gny vy mandragnisy vy; manahaky anizay, gny lelahy mandragnisy gny namany. ¹⁸ Ze mikarakara gny hazon'aviavy dra hihina gny tegnany, dra ze miaro gny topony dra homem-boninahisy. ¹⁹ Manahaky gny tarasy gny rano aminigny endriky gny olo, gny tarasy gny fonigny olo amigny olo. ²⁰ Manahaky gny Fiegna-sy hita vo gny Fandringana sy afapo mandrakizay, dra manahaky anizay gny masonigny olo sy ho afapo mandrakizay. ²¹ Gny memy ho anigny volafosy dra gny fatagnafo fandrendreha ho anigny volamena; dra aminigny fidera anazy gny hisapa gny olo. ²² Na dre lisaninao aminigny fandisana aza gny mola__miaraky aminigny vary__dra bo sy hiala aminazy avo gny hamolany. ²³ Atovy azo atoky fa fatako gny toetry gny agnondrinao dra diniho gny momba reo biby tezanao, ²⁴ fa gny harena dra sy mandrakizay. Maharisy ho anigny taranaky aby ra gny satro-boninahisy? ²⁵ Gny fa miala gny ahisy dra misiry gny solofony, dra avory boak'egny aminigny havoa gny ahisy ho an'ireo agnondry aman'osy. ²⁶ Reo zanak'agnondry reo gny hagnome gny fitafianao dra reo osy gny hagnome gny saranigny saka. ²⁷ Hisy rononon'osy ho anigny sakafonao__sakafo ho anigny tokatragnona__dra sakafo ho anigny panoponao apela.