¹ Gny vali-zaka malefaky dra mamily gny fahatezera, fa gny zaka masiaky magnesiky fahasosora. ² Gny lelanigny mola koa mandraraky fahadala. ³ Fa amizao aby zao gny mason'i Yaveh, mandiniky gny rasy vo gny soa. ⁴ Gny lela magnasitriky dra hazon'ay, fa gny lela pamitaky dra manorotoro gny fagnahy. ⁵ Gny mola magnamavo gny fagnanara-ndrany, fa ze mandray gny fanisia gny malina. ⁶ Ao atragnonigny olo-mary gny misy harena be, fa fidiram-bolanigny rasy fagnahy magnome fahorian'anazy. ⁷ Gny molisy gny hendry magnaparitaky fahalala, fa sy ba manahaky anizay koa gny fon'ireo olo rasy fagnahy Yaveh, fa fahafinaretany koa gny vavaky gny olo mahisy. ⁹ Malaiky gny fomban'ireo olo rasy fagnahy Yaveh, fa tia gny raiky magnaraky gny marin'Izy. ¹⁰ Mandigny gny olo ze mahafo gny lala gny sazy fatrasy dra ze malaiky famaiza dra ho maty. ¹¹ Gny fiegna-sy hita vo fandringan'aza misokaky ao agnatrehan'i Yaveh; koa maiky fa gny fonigny zanak'olombelo? ¹² Gny paneso sososy aminigny fagnanaran'anazy; sy handeha agny aminigny hendry izy. ¹³ Gny fo ravoravo mahamira gny tarehy, fa gny areti-po koa manorotoro gny fagnahy. ¹⁴ Gny fonigny mana-say mitalia fahalala, fa gny vavan'ireo mola homa fahamolan'avo. ¹⁵ Fadiranova avokoa reo andronigny ory aby, fa gny fo miramira dra fanasa sy mana-petra. ¹⁶ Aleo kely aminigny tahosy an'i Yaveh manahaky ze harem-be aminigny ahiahy. ¹⁷ Aleo kokoa sakafo misy agna ze misy fitiava manahaky ze agnomby mifaly aroso ami-pakahala. ¹⁸ Gny olo mora ory magnesiky aly, fa gny olo ze mahasindry fo mapisahasy fifandira. ¹⁹ Gny lalanigny kamo dra manahaky gny toera misy fefy silo, fa gny lalanigny mahisy dra lalam-be voavoasy soa. ²⁰ Gny zanaky hendry dra minday fifalia ho anigny rany, fa gny olo mola manao sinosino gny reniny. ²¹ Mahafinarisy gny olo sy apy say gny hamola, fa ze mana fahazava-say mandeha aminigny lala-mahisy. ²² Mandamoka reo tetiky gny fa sy misy torohevisy, saingy gny fa mindray aminigny panolo-say maro dra nahomby reo. ²³ Mahita hafalia gny olo raiky gny fa magnome valiny mahafa-po izy; endrey gny hasoanigny zaka ze voazaka ara-potoa! ²⁴ Minday miakasy ho anigny olo-kendry gny lelanigny fiegna, ba helan'ereo aminigny Fiaigna-sy hita agny ambany. ²⁵ Ho potehin'i Yaveh gny lovanigny pirehareha, fa miaro gny fanagnanigny pitondrategna koa Izy. ²⁶ Malaiky gny fisaignan'ireo olo rasy fagnahy Yaveh, fa reo zakanigny fahasoa fagnahiny dra malio. ²⁷ Minday olo ho anigny fianakaviany gny pangalasy, fa gny olo ze malaiky solosy dra ho velo. ²⁸ Gny fonigny mary dra misaitsay melohanigny hamaliany, fa gny vavanigny rasy fagnahy koa miboiky gny rasy ao aminazy. ²⁹ Lavisy reo rasy fagnahy Yaveh, fa mahare gny vavaky gny olo-mary koa Izy. ³⁰ Gny fahazavanigny maso minday fifalia ho anigny fo dra gny vaovao soa dra fahasalama ho anigny vata. ³¹ Raha makato hanao gny fa magnisy gny fomba fiegnanao gny olo, dra hitoby eo amireo olo hendry hanao. ³² Ze manda famaiza dra manao sinosino gny zakany, fa ze miteno anasy koa dra mahazy fahazava-say. ³³ Mapianasy fahendrena gny tahosy an'i Yaveh vo fanetre-tegna gny mialoha gny voninahisy.