¹ Nizaka tmin'i Moosesy i Yaveh dra nanao anizahoky ho: ² '' Didio gny vahoak'Israely dra zakao ereo ho:' Gny hisisy gny tany Kanana handrareo vo gny farisy gny taniny, ³ hihitasy hatragny agnefis'i Zina magnaraky gny sisiny asignana aminigny sisiny asimo dra ho eo aminigny sikiky ze mifaran'ao amigniny fiafarany asimonigny Ronomasy Sira. ⁴ Gny faritandreo dra hihody magnasimonigny havoan'i Akrabima dra mandeha mamakivaky gny afis' i Zina. Boak'agny, gny mandeha magnasimon'i Kadesi-barnea zay dra mitohy agnagny Hazara-adala dra magnagny Azmona. ⁵ Boak'agny, gny sisitany dra hialoky boak'ao Azomona magnagny aminigny lohasakan'driak'i egypta dra magnaraky anizay gisikany andranomasy. ⁶ Gny morosiraky andrefa gny ho sisitaninigny Ranomasy lahibe. Io gny ho fari-tany andrefandrareo. ⁷ Gny faritanindreo avarasy hihitasy magnaraky gny sipiky ze havahandrareo hatragny aminigny Ranomasy lahibe dra hatragny aminigny tendrambohisy Hora, ⁸ Dra ko boak'agny aminigny tendrombohisy Hora dra hatragny Lebo-hamata, boak'eo dra hatragny Zedada. ⁹ Boak'eo gny fari-tany hitohy hatragny Zifrona dra mifaran'ao Hazar-Enana. Zay gny ho fari-tany avarandrareo. ¹⁰ Boak'eo mariho gny fari-taninao asignana hatragny Hazar-enana asimo dra hatragny Sefama. ¹¹ Afaranizay gny faritany asignana hiziso boak'agny Sefama dra hatragny Rible, ao aminigny farisy asignanan'i Aina. Gny fari-tany hitohy magnaraky gny farisy asignananigny Ranomasy Kinereta. ¹² Boak'eo gny fari-tany dra hitohy magnasimo magnaraky gny Ony Jordana dra hatragny aminigny Ranomasisira. Zay gny ho tanindrareo, magnaraky gny sisiny magnodidy aby.''' ¹³ Dra nandidy gny vahoakn'Israely i Mosesy dra nanao ho:'' Itiho gny tany zay ho azondrareo aminigny filokagna, ze fa nididin'i Yaveh home ho an'ereo foko sivy vi gny asasaky gny foko. ¹⁴ Gny fokonigny taranak'i Robena, araky gny fanendrem-panagna ho anigny fokon-drazanereo, dra gny fokonigny taranak'i Gada, araky gny fanendrem-panagna ho anigny fokondrazanereo, dra gny asasa fokon'i Manase aby fa nitakasy gny zakandreo. ¹⁵ Reo foko ro vo gny asasa foko fa nitakasy gny azaratany gny andafinigny Jordana magnasignan'i Jeriko, manandrify gny fiposahanigny masoandro.'' ¹⁶ Nizaka tamin'i Mosesy i Yaveh ka nanao ho: ¹⁷ '' Tahoky aby gny agnaran'ereo lelahy ze hizara gny taninigny lovandrareo: Eleazara pisiro vo Jospa zanak'i Nona. ¹⁸ Ao hanao hifily pitariky raiky isaky gny foko ba hizara gny tany ho anigny fianakaviamben'ereo. ¹⁹ Tahoky aby agnaran'ereo lelahy reo: Boak'aminigny fokon'i Joda, dra Kaleba zanak'i Jefone. ²⁰ Boak'aminigny fokonigny taranak'i Simeona, dra Semoela zanak'i Amihoda. ²¹ Boak'aminigny fokon'i Benjamina, dra Elidada zanak'i Kislona . ²² Boak'aminigny tanarak'i Dana pitariky raiky, dra boky zanak'i Jogly . ²³ Boak'aminigny taranak'i Josefa, boak'aminigny fokonigny taranak'i Manase pitariky raiky , dra Haniela zanak'i Efoda. ²⁴ Boak'aminigny fokonigny taranak'i Efraima pitariky raiky, dra Kemoela zanak'i Siftana. ²⁵ Boak'aminigny fokonigny taranak'i Zebolona pitariky raiky, dra Elifaza zanak'i Parnaka. ²⁶ Boak'aminigny fokonigny taranak'Isakara pitariky raiky , dra Paltiela zanak'i Azana. ²⁷ Boak'aminigny fokony taranak'i Asera pitariky raiky, dra Ahihody zanak'i Selomy. ²⁸ Boak'aminigny fokony taranak'i Naftaly pitariky raiky, dra Pedahela zanak'i Amihoda. '' ²⁹ Yaveh nandidy reo lalahy reo ba hizara gny tany Kanana vo hagnome gny isam-pokon'Israely gny azaranereo.