¹ Dra tamizay andro zay, dra nandefa lily mibaiko ze mibaiko eto amizao totolo izao Aogosto Kaisara. ² Izay gny fagnisaham-bahoaky natao volohany tamin'i Kyrenio gny panapaky tagny Syria. ³ Noho izay gny olon'aby dra nagnagny amigny tana niaviany aby ba hisorasy agnara ho anigny fahasolam-bahoaky. ⁴ Dra nandeha niakasy boaky a Galilia agny koa, boaky a tanananigy Nazareta agny, ho agny Jodia, tanan'i Davida ze tokavy ho Betlehema, akory izy boaky amigny tragno vo fianakavian'i Davida. ⁵ Nandeha tagny izy ba hanorasy agnara niaraky tamin'i Maria, ze fofom-baliny dra nivesasy izy. ⁶ Dra raha bo tagny ereo , dra avy gny fotoa hiterahany gny zanany. ⁷ Niteraky zaza lahy izy, zanany volohany, dra izy nandrokoky lamba-zaza Anazy vo nampandry Anazy teo amy fihinanam-bilo, satria sy nisy toera ho anazy reo tao amy hotely. ⁸ Nisy mpiaraky agn'ondry tamin'izay farisy zay ze nizano tagny an-tanimboly, niamby gny andianagn'ondry tamy hariva. ⁹ Nisy azely gny Topo niseho tamin'ereo, dra gny voninahisy gny Topo namirapirasy magnodidy anazy, dra feno tahosy lahibe ereo. ¹⁰ Dra nizaka tamin'ereo gnmy azely nanao ho:''Ka matahosy, fa hinday vaovao soa ze hinday hafalia lahibe ho an'gny olo aby zaho. ¹¹ Androany dra nisy mpagnavosy ze teraky ho andrareo agny an-tanan'i Davida! Izy gny kristy Topo! ¹² Zao gny famatara ze home andrareo:Hahita zazakely mirakosy lamba-zaza dra mandry eo amy fihinanam-bilo andrareo.'' ¹³ Tapoky teo niaraky tamin'gny azely,dra nisy tafiky gny lagnisy lahibe nidera anagn'Agnahary nanao ho:'' ¹⁴ Voninahisy ho an'Agnahary agny amy avo indrindra, dra hisy fiadana seky eto an-tany eo amy olo ze ankasitrahany.'' ¹⁵ Dra gny fa niala teo amin'ereo nagnagny an-dagnisy gny azely, gny mpiamby agn'ondry nifampizaka ho:''Andeha isikazao ho agny Betlehema, dra hagnety anizay raha-niseho zay, zay nampahafatarin'gny Topo asika zay.'' ¹⁶ Nandeha malaky tagny ereo dra nahita an'i Maria vo Josefa, dra nahita gny zazakely nandry teo amy fihinanam-bilo. ¹⁷ Tafaran'gny nahitan'ereo Anazy,dra nampahafatarin'ereo gny raha aby nizaka anazy gny momba io zaza io. ¹⁸ Zay aby nahare anizay dra gaga gny amy nizakan'gny mpiaraky agn'ondry tamin'ereo. ¹⁹ Fa Maria koa nanohy nieriserisy momba gny raha aby ze reny,dra nitahiry anio tao am-pony. ²⁰ Nihery gny mpiaraky agn'ondry, nagnome voninahisy vo nankalaza na'Agnahary noho gny raha aby ze ren'ereo vo hitan'ereo, araky ze nizakany tamin'ereo. ²¹ Gny fa tapisy gny andro fahavalo, gny fa nofora Izy,dra nome agnara ho Jesosy , gny agnarany nomen'gny azely Anazy talohan'gny nametraha Anazy tao an-trony. ²² Dra gny fa dila gny isan'gny andro nitakiny hiliovany, araky gny lalan'i Mosesy, dra ninday Anazy niakasy ho agny am-piangona tao Jerosalema i Maria vo Josefa ba hanolosy Anazy eo amy Topo. ²³ Araky ze voasorasy ao amy lalan'gny Topo hô:''Gny lahy aby ze voaloha-teraky dra hatoka ho an'gny Topo.'' ²⁴ Noho zay dra nanolosy soro araky ze voazaka ao amin'gny lalan'gny Topo ereo,''damohina rô dre zanaky voromailala rô.'' ²⁵ Dra indro, nisy lelahy tagny Jerosalema, Simona gny agnarany, dra zay lelahy zay dra mary vo mafana fo. Nitalia gny fampionogna an'Israely izy, dra tao aminazy gny Fanahy Masy. ²⁶ Nagnambaran'gny Fanahy Masy taminazy fa sy hahita fahafatesa mialohan'gny ahiatany gny kristian'gny Topo izy. ²⁷ Nitarihin'gny Fanahy , nagnagny am-piangona Simona. Fa gny ninday an'i Jesosy zazakely nilisy gny ray aman-dreniny, ba hanao anazy araky gny fomba ao amy lala, ²⁸ dra nirambesiny ho egny asandriny Izy sady nidera an'Agnahary dra nanao ho: ²⁹ ''Amizao angao andeha am-piadana gny mpanomponao, ry Topo, araky gny zakanao. ³⁰ Fa gny masoko nahita gny famozenao, ³¹ zay namaninao teo amy fanatrehan'olo aby:'v 32 Dra fahazava ho fagnambara ho an'gny zetilisa dra voninahisy ho an'Israely olonao.'' ³³ Gny ra vo gny renon'gny zaza dra kamo tamin'gny raha nizakany mahakasiky Anazy. ³⁴ Niso-drano anazy gny Simona dra nizaka tamin'i Maria reniny ho:''ingo, itiho zaza itihodra voatendry ho amin'gny fandavoa vo fanandrata gny olon'Israely maro dra ho famatara ze nandagnany ³⁵ dra hisy sabasy handoaky gny fagnahinao ba ho voambara gny hevisy gny fo maro.''' ³⁶ Nisy mpaminany vavy raiky tokavy ho Ana teo. Zanakapelan'i Fanoela laha tamin'gny foko Asera izy. Tena atisy izy . Nipetraky niaraky tamin'gny valiny fito tao tafaran'gny nahaviriziny anazy izy, ³⁷ dra mpinday vata naharisy gny efasy amby valopolo taona. Sy nanga gny tempoly marina izy vo manompo tamign' ny fifadian-kanina vo vavaky, andro aman'alino. ³⁸ Taminizaho lera izaho dra nagnato mariny anazy ereo izy vo nanomboky nagnome fisora an'agnahary vo nizaka gny mombanigny zaza tamigny olon'aby ze nandigny gny fagnavota an'i Jerosalema. ³⁹ Gny fa nahavita gny raha aby napanoviny araky gny lalanigny Topo ereo, dra nihery ta Galilia agny, agny amigny tanan'ereo a Nazareta agny. ⁴⁰ Nihalahibe gny zaza dra nihanatazaky, nitombo fahendrena, dra gny fahasoavan' Agnahary dra tao aminazy. ⁴¹ Gny ray aman-dreniny dra nagna Jerosalema agny isatao hamozy gny firavoravoanigny Paska. ⁴² Gny fa ro ambinigny folo tao izy, dra nandeha nagnagny araky gny fomba fanao amigny fety ndraiky ereo. ⁴³ Dra gny fa boaky nitoby tagny nandrisy gny andronigny fety manotolo ereo, dra nanomboky nihery noly ereo. Fa Jesosy zazalahy nizano ta Jerosalema agny nefa sy fatasy gny ray aman-dreniny zay. ⁴⁴ Nataon'ereo fa niaraky tamigny olo niara-dia tamin'ereo izy, dra nandeha nandrisy gny andro raiky manotolo ereo. Dra boakeo dra nanomboky nitalia anazy tagny amireo havany vo reo namany ereo. ⁴⁵ Gny fa sy hitan'ereo Izy, dra nihery ta Jerosalema agny ereo dra nanomboky nitalia anazy tagny. ⁴⁶ Gny fa ny afaky telo andro, dra hitan'ereo tao atepoly izy, nipetraky teo agnevon'ireo papianasy, niteno anereo vo nametraky fagnotania tamin'ereo. ⁴⁷ Ze nahare anazy aby dra gaga tamigny fahalalany vo reo valizakany. ⁴⁸ Gny fa nahita anazy ereo, dra talazo. Gny reniny nizaka taminazy ho: "Zanako, nagnino hanao gny nanao manahaky anizao anahy? Tenoy, izaho vo gny babanao nitalia anao tami-tebiteby." ⁴⁹ Izy nizaka tamin'ereo ho: "Nagnino handrareo gny nitalia anahy? Sy fatandrareo ra fa sy maisy ho ao atragnonigny Rako zaho?" ⁵⁰ Fa sy azon'ereo ze tiany hizaka tamin'izay zaka zay. ⁵¹ Dra noly niaraky tamin'ereo tagny Nazareta Izy sady nankato anazy reo. Gny reniny dra nitahiry anizay raha aby zay tao am-pony. ⁵² Fa Jesosy nihanitombo fahendrena vo nitombo vata, dra nitombo fitia tamin'Agnahary vo gny olo.