¹ Noho izay isika dra sy maisy mitandry bebe kokoa amize resika, ba sy hagnara-drenirano amizay isika. ² Fa raha mary gny hafasy ze nizaka tamigny alalan'ireo azely, dra gny fandika-dalana aby vo gny sy fakatoava dra mitakasy sazy ara-drariny, ³ dra ino amizay gny hafahasika mienga raha sy miraharaha anizay famozena lahibe loasy zay sika? Io gny famozena ze zinakanigny Topo volohany vo nihamafisin'ireo ze nahare anizay tamisika. ⁴ Tamin'io fotoa io avo Zagnahary dra nagnaporofo anizay tamigny famatara, fahagaga, dra asa mahery samihafa, dra tamigny fizara reo fagnomeza-pahasoavanigny Fagnahy Masy araky gny sitrapony. ⁵ Fa sy tamigny azely gny napagneken'Agnahary anizao totolo izao ho avy, momba ze zakasika. ⁶ Fa koa, nisy olo nizoro vavolombelo an'izay tagny ho agny, manao anizahoky ho: "Ino gny olo, gny mandiniky anazy hanao? Na gny zanak'olo, gny mikarakara anazy hanao? ⁷ Hanao dra nanao gny olo ambany noho reo azely; nisatrohinao satro-boninahisy tamigny voninahisy vo dera izy. [Fagnamariha: Gny dika-zaka ilany taloha dra miapy ho: "Dra hanao nametraky anazy agnabon'ireo asany tagnanao."] ⁸ Gny raha aby dra napagnekenao eo ambaninigny tombony." Fa ho anazy gny napagneken'Agnahary gny raha aby. Sy nagnenga na ino na ino izy dra sy napagneke anazy. Fa amizao isika dra sy bo mahita gny raha aby napagneke anazy. ⁹ Fa isika mahita gny raiky ze nataony ambany noho reo azely nandrisy gny fotoa siapy: Jesosy, ze nohonigny fizaliany vo gny fahafatesany, dra nisatrohy satro-boninahisy tamigny voninahisy vo dera. Dra amizao tamigny alalanigny fahasoavan'Agnahary, gny nagnandramany gny fahafatesa ho anigny olon'aby. ¹⁰ Fa mety amin'Agnahary zay, akory gny raha aby dra misy ho anazy vo amigny alalany, ba hinday zanaky maro ho agny amigny voninahisy. Mety aminazy gny hahaavy gny pitariky gny famoze anereo ho feno amigny alalanigny fizalia. ¹¹ Fa na gny olo ze magnamasy na reo ze voamasy dra mana loharano raiky. Noho izay dra sy megnasy mitoka anaereo ho rahalahy izy. ¹² Hoy Izy ho: " Hitalily gny agnaranao amireo rahalahiko zaho, hihira gny momba anao aboak'ao agnatinigny fivondrogna zaho." ¹³ Dra koa, " Hatoky anazy zaho." Dra: "Indro, andeso zaho vo reo zanaky ze namen'Agnahary anahy." ¹⁴ Noho izay, akory nofo aman-dio reo zanan'agnahary, dra nizara raha manahaky anizay nindray tamin'ereo avo koa Jesosy , ba ho amigny alalanigny fahafatesa gny fahafoagnany gny raiky ze mana gny herinigny fahafatesa, dra gny devoly zay. ¹⁵ Izay dra ba hagnafahany reo aby ze nohonigny tahosy gny fahafatesa dra niay gny fiegnan'izy aby reo Tao amigny fagnandevoza. ¹⁶ Fa mazava ho azy fa sy azely gny vozeny; fa koa, gny taranak' i Abrahama. ¹⁷ Noho izay dra mendriky anazy gny atao manahaky anireo rahalahy amigny fomba aby, ba ho pisorom-be feno famindra-po vo fahatokisa Izy amigny fifandresa amireo rahan'Agnahary, dra ba hinday momba gny famela reo fahotanigny olo. ¹⁸ Akory Jesosy mihisy gny nizaly vo nala fagnahy, dra afaky magnapy reo ze ala-pagnahyIzy.