¹ Aoky hitohy gny fitiava ara-pirahalahia. ² Ka magnaligno gny fapiatragnoa reo vahiny. Fa tamigny alalan'izay, gny naharezanigny ilany fapiatragnoa reo azely nefa sy fatany zay. ³ Tadidio reo voafoza, manahky gny ho nindray nifehy tamin'ereo handrareo. Sarovy reo ze napahoria, manahaky gny ho ereo avo koa handrareo amigny vatany. ⁴ Aoky ho hazanigny sirairay gny fanambalia. Aoky gny fandrianigny fanambalia ba halio, fa Zagnahary dra hisara reo pangala-balin'olo vo reo pizangazanga. ⁵ Angao gny fitondra-tegnandrareo ho afaky amigny fitiavam-bola. Mifalia amireo raha ze hanagnandrareo, akory Zagnahary vatany dra nizaka ho: "Izaho dra sy handoa andrareo mihisy, na hahafo andrareo koa." ⁶ Aleo isika ho faly ba hahavany hizaka ho: " Gny Topo gny pamoziko; dra sy hatahosy zaho. Ino gny azonigny olo atao aminahy?" ⁷ Hevero reo pitariky andrareo, reo ze nizaka gny Zakan'agnahary tamindrareo, dra hevero gny vokasigny fihesik'ereo. Aleo manahaky gny finoan'ereo. ⁸ Jesosy Kristy dra sy miova omaly, vo amizao, vo ho mandrakizay. ⁹ Ka magneky toniny amireo karaza fapenara hafahafa. fa soa raha tokony hamafisy amigny ze fahasoava gny fo, fa sy amigny hany ze sy magnapy reo ze mandeha miaraky amin'ereo. ¹⁰ Isika dra mana alitara ze sy anagnan'ireo ze manopo gny tabernakely fahefa hihinana. ¹¹ Fa gny lionigny biby nivono atao fagnatisy ho anigny ota dra nandesiny pisorombe tao amigny toera masy, nandris'izay gny vatan'ereo dra noroa tagny ivelany toby. ¹² Noho izay Jesosy avo koa dra nizaly tagny ivelanigny tana. ba hagnamasy reo vahoaky amigny alalanigny liony manoka. ¹³ Andeha isika noho izay ho agny aminazy agny ivelanigny toby, hinday gny fahafaham-baraka. ¹⁴ Fa sy mana tana maharisy isika eto. Fa kosa, mandigny gny raiky ze ho avy isika. ¹⁵ Amigny alalany, dra andao isika hanolosy reo fagnati-pidera ho an'Agnahary hatrany, fidera vokasy gny maloto ze magneky gny agnarany. ¹⁶ Aleo sy alignosika gny manao gny soa vo magnapy gny olon'isany, fa amigny fagnatisy manahaky anizay gny tena mahafaly an'Agnahary. ¹⁷ Makatoava vo magneke reo pitariky andrareo, fa ereo gny miahy gny fagnahindrareo, manahaky reo ze hanao tatisy. Makatoava ba hanao anizay apifalia reo pitondra andrareo, fasy apisetoy, ze lasa sy misy dikany. ¹⁸ Mivavaha ho anay, fa izahay dra nino fa mana feonigny fierisereta malio dra magniry hiay apahamarigna gny raha aby. ¹⁹ Manosiky andrareo bebe kokoa aza zaho ba hanao anizay, dra ba hihery malaky amindrareo zaho. ²⁰ Dra gny Zagnahary gny fiadagna, ze nananga tamigny maty gny piamby agnondry lahibe, gny Toposika Jesosy, taminigny alalanigny ranigny fagneke mandrakizay, ²¹ dra hagnasoa andrareo amigny asa soa ba hanova gny sitrapony aby. Izy anie hiasa ao agnatisika ze tena akasitrahany eo agnatrehany, amigny alalan'i Jesosy Kristy, ze hame gny voninahisy mandrakizay. Amena. ²² Dra makahery andrareo zaho, ry rahalahy, ba hiarisy gny zakanigny fapahereza ze nisoratiko bory ho andrareo. ²³ Fataro fa nahafahy Timoty rahalahisika, ze hindray aminahy hagnety andrareo raha avy aloha izy. ²⁴ Atovy veloma reo pitariky andrareo aby vo reo pino aby. Reo ze boak'agny Italia dra manao veloma andrareo. Ho amindrareo aby anie gny fahasoava.