¹ Gny fa avy eo aminao zao raha aby zao, reo fitahia vo reo ozo ze napetrako teo anoloanao, dra gny fa mahasiaro anereo hanao eo amireo firenena hafa aby ze nindesan'i Yaveh zagnaharinao anao, ² dra gny fa mihery amin'i yaveh zagnaharinao hanao dra makato gny feony, magnaraky ze handidiako anao zao aby__hanao vo reo zanakao__amigny fonao manotolo vo amigny fagnahinao manotolo, ³ dra hagnova gny fahababoanao vo hanafamindrapo aminao i Yaveh zagnaharinao; hihery izy dra hamory anao amireo olon'aby ze naparitan'i Yaveh zagnaharinao. ⁴ Raha misy raiky amireo olonao natao sesitany agny amireo toera lavisy faratapony ambaninigny lagnisy, agny amizay gny hamorian'i Yaveh zagnaharinao anao, dra agny amizay gny hindesany anao. ⁵ Yaveh zagnaharinao hinday anao amigny tany ze nanagnanigny razambenao, dra ho lasa fanagnanao ndraiky zay; hanao soa anao izy dra hapitombo anao mihoasy noho gny nataony tamireo razambenao. ⁶ Ho foran'i Yaveh zagnaharinao gny fonao vo gny fon'ireo taranakao, dra ho tiavinao amigny fonao manotolo vo amigny fagnahinao manotolo i Yaveh Zagnaharina, ba ho velo hanao. ⁷ Yaveh zagnaharinao dra hametraky reo ozon'aby reo eo amireo fahavalonao vo eo amireo malaiky anao, reo ze nagnezehan'anao. ⁸ Hihery vo hakato gny feon'i yaveh hanao, dra hanao reo didiny aby ze handidiako anao zao. ⁹ Hapahomby anao i yaveh zagnaharinao amigny asanigny tagnanao aby, amigny vokasy gny vatano, vo amigny vokasy gny biby tezanao, dra amigny vokasy gny taninao, ho fandrosoa; fa i Yaveh hifaly aminao ndraiky nohonigny fandrosoa, manahaky gny nifaliany tamireo ranao. ¹⁰ Hanao anizay izy raha hakato gny feon'i Yaveh zagnaharinao hanao, ba hitandry reo didiny vo reo fisipiky ze voasorasy tao amizay bokinigny lalana zay, raha mihery amin'i Yaveh zagnaharinao hanao amigny fony vo gny fagnahinao manotolo. ¹¹ Fa ty didy ze handidiako anao zao tihoky dra sy fatrasy loasy aminao, na lavisy loasy gny hanakaranao anazy. ¹² Sy agny andagnisy zay, dra tokony hizaka hanao ho: 'Iza gny hiakasy agny andagnisy ho asika vo hinday anizay mizoso amisika atiky dra magnome fahafaha sika hahare anizay, ba hanovasika anizay?' ¹³ Sy agny apitan-dranomasy zay, dra tokony hizaka hanao ko: 'Iza gny hisaky gny ranomasy ho asika vo hinday anizay amisika dra mapahare anizay asika, ba hanovasika anizay?' ¹⁴ Fa agnilanao gny gny zaka, ao amigny vavanao vo gny fonao, ba hahafahanao manao anizay. ¹⁵ Ingo, nataoko teo anoloanao gny fiegna vo gny soa, dra gny fahafatesa vo rasy amizao. ¹⁶ Raha makato reo didin'i Yaveh Zagnaharinao hanao, ze handidiako anao amizao ba hitia an'i Yaveh zagnaharinao, handeha amireo lalany, dra hitandry reo didiny, reo fisipiny, vo reo lalany, dra ho velo vo hitombo hanao, dra Yaveh zagnaharinao hitahy anao agny amigny tany ze hidiranao ho fanagnanao. ¹⁷ Fa raha mivily lalana foa, dra sy miteno handrareo fa koa voasariky lavisy vo mekohoky amireo zagnahary hafa dra manopo anereo, ¹⁸ dra nambarako anao amizao fa ho maty hanao; sy hagnalava reo androndrareo handrareo agny amigny tany ze hitanao an'i Jordana ba hilira vo ho fanagna. ¹⁹ Mitoka gny lagnisy vo gny tany zaho ba ho vavolombelo manohisy anao amizao ze fa napetrako teo anoloanao dra gny fiegna vo gny fahafatesa, reo fitahia vo reo azona; noho zay filio gny fiegna ba ho velona, hanao vo reo taranakao. ²⁰ atovy zay ba ho fitiavan'an'i Yaveh zagnaharinao, ba hakatoavy gny feony, dra hifikiran'aminazy. Akory izy gny fiegnanao vo halavan'ireo andronao; atovy zay ba hiegnanao agny amigny tany ze niegnan'i Yaveh tamireo razambenao, tamin'i Abrahama, Isaka, vo i Jakoba ba hame anereo."