¹ Amizao dra tahoky aby reo baiko, reo didy, dra reo lalana ze nandidian'i Yaveh Zagnaharinao anahy ba hapenary anao, dra ba hahafahanao mitandry reo agny amigny tany ze handehananao tandrifin'i Jordana ze ho fanagnanao; ² ba hahafahanao magnome voninahisy an'i Yaveh Zagnaharinao, amigny fitandrema reo lalana vo gny didy aby ze handidiako anao__hanao, reo zanakao, dra reo zanaky gny zanako, amigny andro aby hiegnanao, ba hitombo gny andro hiegnanao. ³ Noho zay tenoy reo, ry Israely, dra tandremo reo, ba hahasoan'anao zay, ba hitomboanao fatrasy, agny amigny tany tondra-dronono vo tately, araky ze fa napanatenan'i Yaveh, gny Zagnaharinigny razambenao taminao hatao. ⁴ Tenoy, ry Israely: Yaveh zagnaharisika dra raiky. ⁵ Hitia an'i Yaveh zagnaharinao amigny fonao manotolo hanao, amigny fagnahinao manotolo, dra amigny herinao manotolo. ⁶ Reo zaka ze handidiako anao amizao dra ho ao amigny fonao; ⁷ dra hapianasy soa an'ireo amigny zanakao hanao; hizaka momban'anireo hanao gny fa mipetraky ao atragnonao, gny fa mandeha egny andala, gny fa mandry, dra gny fa mifoha. ⁸ Hamotosy anireo hanao ba ho fametrahan'eo amigny tagnanao, dra atao manahaky gny fehi-kandrinao eo agnelagnelanigny masonao reo. ⁹ Hanorasy anizay eo amigny tolam-batrangarany gny tragnonao vo gny vavahadinao hanao. ¹⁰ Gny fa minday anao agny amigny tany ze napanatenan'i Yaveh Zagnaharinao tamireo razambenao, Ebrahama, Isika vo Jakoba, fa hameny anao hanao, mindray amigny tana lahibe vo tena soa ze sy nahorinao, ¹¹ vo tragno maro feno karazandraha soa ze sy nataonao, famorian-drano ze sy nihalinao, dra tanim-boaloboky vo hazon'oliva ze sy nanganao, hihina hanao dra ho afa-po__ ¹² dra mitandrema hanao ba sy hagnaligno an'i Yaveh, ze ninday anao hiala tao amigny tany Egypta, hiboaky gny tragno fanandevoza. ¹³ Hagnome voninahisy an'i Yaveh Zagnaharinao hanao; izy gny ho toponao, dra hiania amigny agnarany hanao. ¹⁴ Sy hanopo zagnahary hafa hanao, reo zagnaharny gny olo ze magnodidin'anao aby__ ¹⁵ akory Yaveh zagnaharinao ze eo agnevonao dra zagnahary saro-piaro__fa raha manao anizay hanao, dra hirehisy aminao gny fahorian'i Yaveh zagnaharinao, dra handringan'anao amigny tany aby Izy. ¹⁶ Sy hisapa an'i Yaveh zagnaharinao manahaky gny nisapanao anazy tagny Masaha hanao. ¹⁷ Hanao dra hitandry soa reo baikon'i Yaveh Zagnaharinao, reo didiny, vo reo lalany, ze nandidiany anao. ¹⁸ Hanao mary vo soa eo amason'i Yaveh hanao, ba hahasoan'anao zay, dra ba hahafahanao milisy vo mana gny tany soa ze fa nianianan'i Yaveh tamireo razanao, ¹⁹ ba hangala reo fahavalonao aby sy ho eo anoloanao, araky gny fa nizakan'i Yaveh. ²⁰ Gny fa magnotany anao gny zanadahinao amigny fotoa ho avy, manao anizahoky ho: 'Ino aby reo lalana hafa ze nandidian'i Yaveh Zagnaharisika hanao?' ²¹ dra hizaka gny zanadahinao hanao ho: 'Andevon'i Farao tagny Egypta isika; ninday asika niala gny tany Egypta tamigny tana mahery Izy, ²² dra napiseho famatara vo fahagaga, lahibe vo mahery vaiky, tamin'i Egypta, tamin'i Farao, dra tamigny tragnony aby, teo amasosika Izy; ²³ dra ninday asika niala tagny, ba hindesany asika hilisy ao, ba hagnomezan'asika gny tany ze fa napanatenany an'ireo razasika. ²⁴ Yaveh dra nandidy asika mandrakariva ba hitandry reo lalana aby, ba hatahosy an'i Yaveh zagnaharisika hahasoa asika, ba hahavelon'asika hatragny, manahaky asika amizao. ²⁵ Raha mitandry reo didy aby reo eo agnatrehan'i Yaveh Zagnaharisika isika, araky ze nandidiany asika, dra ho fahamarignasika zay.'