¹ Gny fa tapaky fa tokony hitikisy sambo ho agny Italia zahay, dra natobin'ereo i Paoly vo reo gadra hafa ho eo ambaninigny fiahianigny kapiteny raiky atao i Jolio zay anigny rezimatany Aperora. ² Nilisy tagnaty sambo raiky boak'agny Adramytena zahay, ze hiondra magnaraky gny sisi-taninigny Asia. Dra nandeha an-dranomasy zahay. Aristarko boak'agny Tesalonika agny Mekedonia dra nandeha niaraky taminay. ³ Gny andro magnaraky dra avy tao amigny tanananigny Sidona zahay, nandesan'i Jolio an'i Paoly tamigny hasoafagnahy vo nagnenga anazy handeha ho agny amireo namany hitakasy gny fikarakaran'ereo. ⁴ Boak'agny zahay gny nandeha andranomasy vo nitikisy sambo nagnaraky gny moron'i Kyprosy, nagnariny gny nosy, akory nanohisy anay gny rivosy. ⁵ Boak'eo nitikisy sambo namakivaky gny ranomasy zahay dra nagnariny gny sisitaninigny kilikia vo i Pamfilia, Boak'ao Myra zahay, tananigny Lykia. ⁶ Tagny gny Kapiteny dra nahita sambo raiky boak'agny Aleksandria ze hitikisy sambo hagna Italia agny. Napetrany tao amizay zahay. ⁷ GNy fa nitikisy sambo niada nandrisy gny andro maro zahay dra gny farany avy tapahasahiragna teo agnilanigny kinidio, dra sy nagnenga anay handeha tamizay lala zay sasy gny rivosy, dra nitikisy sambo nagnaraky gny ilany tako-drivosy gny Kreta zahay, mifanandrify amigny Salmona. ⁸ Nagnaraky morony tapahasahiragna zahay, mandrapahavianay tagny amigny toera raiky atao a soa-fitolia-sambo zay, agnilanigny tananigny Lasea. ⁹ Dra nandany fotoa maro zahay, fa dila avo koa gny fotoa fifaliakanin'ireo Jiosy, dra fa lasa napidi-doza gny miondra sambo. Dra napitandry anereo Paoly, ¹⁰ dra nizaka ho: "Ry lelahy, hitako fa ty lia hataosika tihoky dra hisy faharata vo fatiatoky maro, sy ho anigny eta vo gny sambo avo, fa ho anigny aisika koa." ¹¹ Fa gny kapiteny nagnome laza kokoa gny pinday vo gny toponigny sambo noho reo raha zinakan'i Paoly. ¹² Akory ao amigny sera dra sy mora raha hizano mandrisy gny ririny, dra maro tamireo pitikisy sambo gny nanoro hevisy gny hiondra hiala eo, dra ba afaky hihazo gny tananigny Foinikasa amigny fomba aby zahay, ba hitoby agny mandrisy gny ririny. Foiniksa dra serana agny Kreta, dra magnatriky gny magnavaras-andrefa vo gny magnasomo-andrefa zay. ¹³ Gny fa nanomboky nisioky malemy gny andro boaky asimo agny, dra nihevisy reo tasambo fa nana ze nitaliavin'ereo. dra napakasy gny vatofasiky dra niondriky nagnaraky an'i Kreta ereo, nagnariny gny moron-dranomasy. ¹⁴ Fa afaky fotoa fohy dra nisy tafion-drivosy mahery, natao ho Eoraklydona, nanomboky nameli fatrasy boak'agny amigny nosy. ¹⁵ Gny fa trasy gny tafiosy gny sambo sasy, dra sy maisy nagnome lala gny tafiosy zahay dra nandesinigny rivosy tegny aby. ¹⁶ Nitikisy sambo nagnaraky gny maronigny nosy kely raiky atao ho Kaoda zahay, dra tami-pahasahiragna gny nahafahanay niaro gny laka famozen'ay. ¹⁷ Gny fa napekarin'ereo gny laka famozena ay, dra napesan'ereo gny talin'izay ba hamahea gny vatanigny sambo. Natahosy ereo fa tokony handeha amboninigny fasy mandrevony Syrtiso, dra nalasak'ereo gny vatofasiky gny ranomasy dra nandeha ho azy tegna. ¹⁸ Trasinigny fameleza mahery vaikanigny tafiosy zahay hany ka gny andro magnaraky io dra nanomboky nagnary reo eta tagny ivelanigny sambo ereo. ¹⁹ Tamigny andro fahatelo gny tasambo dra nagnary gny etanigny sambo tagny ivelanigny sambo tamigny tanan'ereo manoka. ²⁰ Gny fa sy namirasy taminay nandrisy gny andro maro gny masoandro vo gny kita, dra bo namely anay gny sioky lahibe, dra levo avokoa gny fanatena gny hahavoavozy anay. ²¹ Gny fa lasa lavisy sy nisy hany ereo, dra nisanga teo amireo tasambo Paoly boak'eo dra nizaka ho: "Ry lelahy, tokony niteno anahy handrareo, dra sy niondra boak'agny Kreta, ho trasin'izao faharata vo fatiatoky zao. ²² Amizao dra mapirisiky andrareo zaho ba hahery, fa sy hisy fahaverezan'ay eo agnevonireo, fa ba ho gny sambo avy. ²³ Fa tamigny hariva dra nisy azelin'Agnahary ze topoko, ze topoko avo koa_ nisanga teo agnilako gny azeliny ²⁴ dra nizaka ho: 'ka matahosy, ry paoly. Sy maisy hisanga eo agnatrehan'i Kaisara hanao, dra ingo, Zagnahary ao amigny hasoafagnahiny gny nagnome anao reo miasambo aby miaraky aminao.' ²⁵ Noho izay mionogna, ry lelahy! Fa mahatoky an'Agnahary zaho fa hitranga araky ze voazaka taminahy zay. ²⁶ Fe seky sy maisy hidodo aminy nosy maromaro sika." ²⁷ Gny fa avy gny hariva faha-efasy ambiny folo, fa gny natopatopa tesy sy eroa tao amigny ranomasinigny Adrea zahay, Tokony ho tamigny sasal'aly dra nihevisy reo tasambo fa nagnariny tagny ereo. ²⁸ Dra nangalaky refin-drano ereo dra nahita fa efapolo metasy gny halaliny; tafara kelin'izay, dra bo nangalaky refin-drano ndraiky ereo vo nahita fa telopolo metasy gny halaliny. ²⁹ Natahosy ereo so hidodo amireo vato reo zahay, dra nandasaky vatofasiky efasy boa'ao afaran'ereo dra nivavaky ba hiavianigny mary sy ho ela. ³⁰ Reo tasambo dra nitalia fomba handoza gny sambo nandasaky gny laka famoze ay tagny an-dranomasy, dra noly nandasaky gny vatofasiky boak'eo andoha-sambo ereo. ³¹ Fa i Paoly nizaka tamigny kapiteny vo reo maramila ho: "Raha sy mizano agnaty sambo reo lelahy reo, sy ho voavozy handrareo." ³² Boak'eo reo maramila reo nanapaky gny talinigny laka dra vo nagnenga anizay ho rendriky. ³³ Gny fa nanomboky nihazava gny andro, dra napirisiky anereo aby i Paoly ba hangalaky hany maromaro. Hoy izy ho: "Ty andro tihoky gny andro faha-efasy ambiny folo ze handignisandrareo dra sy hitenoandrareo; sy nihina na ino na ino handrareo. ³⁴ Noho izay dra mapirisiky andrareo zaho ba hahavelo andrareo. Fa sy hisy na raiky amindrareo ze ho levo dra gny singam-bolon-dohany aza." ³⁵ Gny fa boaky nandesiny zay izy, dra nangalaky mofo dra nisaotra an'Agnahary teo amasonigny olo aby. Boak'eo izy nizarazara gny mofo dra nanomboky nihinana. ³⁶ Boak'eo dra nahery izy aby dra nangalaky hany avo koa. ³⁷ Olo 276 zahay gny tao agnaty sambo. ³⁸ Gny fa nihina soa ereo, dra nihamevagnin'ereo gny sambo tamigny agnaran'ereo vary tagnaty ranomasy. ³⁹ Gny fa avy gny andro, dra sy fatas'ereo gny tany, fa nahita helon-drano raiky nisy tora-pasy ereo, dra nifadiniky ereo raha afaky hinday gny sambo tegny. ⁴⁰ Dra nitapahin'ereo vatofasiky dra nangan'ereo tagny an-dranomasy. Niaraky tamize nalasak'ereo gny taly teo amigny famarota vo nasangany gny lay ho eo amigny rivosy; dra niroso nagneo amigny pisy fasy ereo. ⁴¹ Fa boak'eo amigny toera raiky ze nisy ranomasy nifanapaky ereo, dra nizoso tamigny tany gny sambo. Dra gny loha-sambo dra nirekisy teo vo nizano sy afa-nihesiky, fa gny foriny koa nanomboky vaky nohonigny herinigny rano. ⁴² Gny tetik'ireo maramila dra gny hamono reo gadra ba sy ho afaky mienga ereo. ⁴³ Fa gny kapiteny te-hamozy an'i Paoly, dra nazanony gny tetik'ereo; dra nameny baiko reo mahay misiha ba hilasaky ivelanigny sambo aloha vo ho egny angroanga. ⁴⁴ Boak'eo tokony hagnaraky gny ambinigny lelahy, gny ilany agnabo hazo, dra gny ilany agnabo raha hafa boak'ao amigny sambo. Manahaky anizay gny nitranga dra gny taminay aby dra avy soa ama-sara tegny androanga.