¹ Noho izay Agripa nizaka tamin'i Paoly ho: "Afaky mizaka ho anigny vatanao hanao." Dra nagnisy gny tagnany Paoly dra nanao gny ferova-tegnany. ² "Maneho gny vatako manahaky gny lafy zaho, ry Agripa pazaka, ba hinday gny raha mahazo mahazo anahy eto anoloanao androany manohisy reo fiapanganigny Jiosy aby; ³ indrindra, akory hanao fa matihany amigny fomba ama-panao vo fagnotanianigny Jiosy aby. Noho izay dra mangataky anao zaho hiteno anahy apahareta. ⁴ Marina fa, gny Jiosy aby dra mahafatasy gny fomba fiegnako hatramigny fahatanorako tagny amigny fireneko manoka vo tao Jerosalema. ⁵ Ereo dra nahafatasy anahy boaky ambolohany dra tokony hagneky ereo fa Fariseho fiegna zaho, gny hala indrindra amigny atokigny fivavahasika. ⁶ Dra mizoro eto zaho ba ho sara akory te hapanategna ze nataon'Agnahary tamireo razasika zaho. ⁷ Fa tihoky gny fapanatena natenanigny fokosika roambinifolo ho takary raha nanopo an'Agnahary andro aman'aly vatany ereo. Ho an'Izay fanatena zay, ry Agripa pazaka, gny hiapangan'ireo Jiosy anahy. ⁸ Nagnino handrareo gny mihevisy fa sy azo inoa fa mananga gny maty zagnahary? ⁹ Nisy fotoa zaho nihevisy tamigny vatako fa tokony hanao raha maro manohisy gny agnaran'i Jesosy boak'agny Nazareta zaho. ¹⁰ Nanao anizay tagny Jerosalema zaho. Nagnily maro tamireo pino tagny apiza tamigny fahefa nitakariko boaky tamireo lohanigny pisoro zaho, dra gny fa voavono ereo dra nandasaky gny vatoko hanohisy anereo zahoo. ¹¹ Nisaziko imaro ereo tagny amireo Synagoga aby dra niezaky gny hanery anereo ba hizaka rasy zaho. Nasiaky fatrasy tamin'ereo zaho vo nagnitriky anereo na dre tagny amireo tana lavisy agny aza. ¹² Gny bo nanao anizay zaho, dra nandeha tagny Damaskosy niaraky tamigny fahefa vo reo lily boaky amireo lohanigny pisoro; ¹³ dra nizaka an-dala nagnagny, tamigny mitataovovogna, ry pazaka, dra nahita hazava noho gny masoandro zaho ze namirasy noho gny masoandro vo izay dra namirasy nagnodidy anahy vo reo lelahy ze niara-dia taminahy. ¹⁴ Gny fa nezera tamigny tany zahay aby, dra nahare feo nizaka taminahy zaho ze nizaka tamigny zaka Hebreo ho: 'Saoly, Saoly, nagnino hanao gny magnitriky anahy? Sarosy ho anao gny hidaka fagnindro.' ¹⁵ Boak'eo nizaka zaho ho: 'Iza hanao, Topo moa?' Gny Topo namaly ho: 'Izaho gny i Jesosy ze ezehinao. ¹⁶ Amizao miheregna dra misangana amigny tombokao; akory noho izao totolo izao gny nisehoako taminao, ba hanendry anao ho panopo vo ho vavolombelo mahakasiky reo raha ze fatasao momba anahy amizao vo reo raha ze hanehako anao ao afara kely; ¹⁷ dra hagnavosy anao ao amigny vahoaky vo reo Jentilisa ze hagnirahako anao zaho, ¹⁸ ba hanokaky gny mason'ereo dra hapitoliky anereo hiala amigny mezy hagnagny amigny fahazava dra amigny herinigny Satana hagnagny amin'Agnahary, ba hafahan'ereo mitakasy boaky amin'Agnahary gny famela-keloky gny fahota vo gny lova ze ameko anereo ze nihamasigny tamigny finoa anahy. ¹⁹ Noho izay, ry Agripa pazaka, nakatoa gny fitahia boak'agny andagnisy zaho; ²⁰ fa, gny anireo ze tagny Damaskosy aloha, dra boak'eo tagny a Jerosalema, dra nanera gny taninigny Jodia aby, dra tamireo Jentilisa, nagnome anereo gny fahatra zaho fa tokony hibebaky vo hitoliky amin'Agnahary ereo, hanao gny asa mendry gny fibebaha. ²¹ Noho izay atony zay gny nanamboranigny Jiosy anahy tao atepoly vo niezaky hamono anahy. ²² Nagnapy anahy hatram'izao magnisy, noho zay dra misanga zaho dra mizoro zaho dra mizoro vavolombelo amigny olo-sotra vo amireo mana-kaza sy hiizaka na ino na ino mihoasy ze nizakan'ireo paminany vo Mosesy fa hitranga; ²³ fa sy maisy hiiizaly krity, dra Izy gny ho volohany hisanga amireo maty ba hisanga vo hisanga vo hitory fahazava ho anireo vahoaky Jiosy vo reo Jentilisa." ²⁴ Gny fa vitan'i Paoly gny ferova-tegnany, dra nizaka tamigny feo fatrasy Festosy ho: "Paoly, very say hanao; gny fenaranao be loasy gny nahavy anao ho very say." ²⁵ Fa hoy i Paoly ho: "Sy very say zaho, ry Festosy, fa amigny fahavania zaho mizaka zakanigny fahamarigna vo fahamatora. ²⁶ Fa gny pazaka mahafatasy gny momba anibzay raha zay; dra noho izay, mizaka akalalaha aminazy zaho, fa resy lahasy fa sy nisy tamizay navony taminazy; akory sy natao tagny amigny tako anizay. ²⁷ Mino gny paminany ra hanao, ry Agripa pazaka? Fataso fa mino hanao." ²⁸ Agripa nizaka tamin'i Paoly ho: "Ao agnatinigny fotoa fohy ra gny handresena lahasy anahy vo hanovanao anahy ho Kristiana?" ²⁹ Hoy Paoly ho: "Mivavaky amin'Agnahary zaho, ba ho ao agnatinigny fotoa fohy na fotoa lava, sy hanao avo, fa gny mahare anahy androany aby, dra hitovy aminahy, fa sy miaraky anireo ravaky reo." ³⁰ Boakb'eo nisanga gny pazaka, vo gny governora, vo Berenika avokoa, vo reo ze nipetraky niaraky tamin'ereo; ³¹ gny fa nagnenga gny tragno fivoria ereo, dra nifapizaka dra nizaka ho: "Ty lelahy tihoky sy manao raha mendriky gny fahafatesa na famotora." ³² Hoy Agripa tamin'i Festosy ho: "Ty lelahy tihoky dra afaky nalefa raha sy tonoka tagny amin'i Kaisara izy.