¹ Paoly, apostolin'i Kristy Jesosy tamigny alalanigny sitrapon'Agnahary, araky gny fapanatenanigny fiegna ze ao amin'i Kristy Jesosy, ² an'i Timoty, zanaky tia: Fahasoava, fiatra, dra fedagna boak'amin'Agnahary gny Ray vo i Kristy Jesosy Toposika. ³ Misaotra an'Agnahary zaho, ze Topoko boak'amireo razambeko, miaraky amigny feonigny fierisereta malio, manahaky gny hahasiarovako anao mandrakariva amigny fivavahako andro aman'aly. ⁴ Manahaky gny hahasiarovako reo ranomasonao, magniry fatrasy gny hahita anao zaho, dra mety ho feno hafalia zaho. ⁵ Napahasiahivy taminahy gny finoanao mary, ze niay volohany tao amigny renibenao Loisa vo gny reninao Eonisa, dra resy lahasy zaho zao fa miay ao aminao avo koa. ⁶ Izay gny tokony apahasiahiviho anao ba hapesanao ndraiky gny fagnomezan'Agnahary aminao amigny alalanigny fametrahako tagna. ⁷ Fa Zagnahary sy nagnome fagnahinigny tahisy asika, fa gny hary vo fitiava dra fifeheza-tegna. ⁸ Ka megnasy amigny fizoroa vavolombelo mombanigny Toposika, na aninahy, Paoly, gny gadrany. Fa koa, mizara amigny fahoria gny filazasara araky gny herin'Agnahary. ⁹ Fa Zagnahary gny namozy asika vo nitoka asika tamigny toka masy. Nanao anizay Izy, sy noho reo asasika, fa nohonigny drafisy ze fa nataony vo gny fahasoavany. Na dre bo sy niandoha aza gny fotoa dra fa nagnome asika anireo raha reo tao amin'i Kristy Jesosy Izy. ¹⁰ Fa amizao gny famozen'Agnahary dra zinaka tamigny alalanigny fesehoan'i Kristy Jesosy pagnavosy asika. Kristy ze nagnafoa gny fahafatesa vo nianday fiegna ze sy ho tapisy mandrakizay ba hagnazava amigny alalanigny filazasara. ¹¹ Noho izay, dra voatondro ho pitory teny zaho, ho apostoly, dra ho papianasy. [Fagnamariha: Reo dika zaka ilany dra magnapy ho: "Ho anigny Jentilisa."] ¹² Fa noho izay atony zay dra mizaly amireo raha reo avo koa zaho. Fa sy megnasy zaho, akory fataso Izy gny ninoako. Resy lahasy zaho fa afaky mita ze fa nakiniki taminazy Izy mandra-pahavian'izay andro zay. ¹³ Tano gny ohasy momba reo hafasy gny finoa ze rendrareo vo gny fitiava ze ao amin'i Kristy Jesosy. ¹⁴ Gny raha soa ze nataon'Agnahary taminao, ambeno amigny alalanigny Fagnahy Masy zay, ze miay ao amisika. ¹⁵ Fasao zay, fa ze nitoby tagny Azia aby dra nivadiky taminazy. Ao amin'io fikambagna io reo Fizelio vo reo Hermozena. ¹⁶ Enga anie gny Topo hagnome famindra-po amigny tokatragnon'i Onesiforo, akory namelombelo anahy matetiky izy dra sy megnasy tamigny gadrako. ¹⁷ Fa koa, gny fa tagny Roma izy, dra nitalia anahy fatrasy, dra nahita anahy izy. ¹⁸ Gny Topo anie haneho anazy dra hahita gny famindra-po boaky aminazy amizay andro zay. Reo fomba aby nagnapiany anahy tao Efesosy, dra fatandrareo soa.