¹ laha misy fampahereza ao amy ndre Kristy, laha misy fampionona bak'amy ty fitiavane, laha misy fiharoa ao amy ty Fagnahy, laha misy famindrampo bey naho feregnae, ² le ataovo feno ty fifaleako amy ty fisaigna manahake zay, amy ty fanagna fitiava mitove, amy ty fiharoa am-pagnahy, vaho amy ty fanagna vere mitove. ³ Ko manao na ino na ino amy ty fitiavan-tegna na fanandratan-tegna avao. Te amy ty fagnetren-tegna kea le madiniha ty hafa mihoatse ty vatagnareo. ⁴ Tokone tsy hipay ze mahasoa ty vatanareo avao ty kiraikiraike aminareo, te ze mahasoa ty hafa avao kea. ⁵ Mandiniha manahake ty fisaigna ze tao amy ndre Kristy Jesosy avao kea. ⁶ Fa nisy arake ty tarehe ndre Andragnahare Reke, te tsy nadinike zay fitoviane amy ty Andragnahare zay ho raraha hifikira Reke. ⁷ Ty mifanohitse amy zay, niravane ty vatane. Nangalake ty tarehe ty mpiasa Reke. Vaho nimboake hanahake ty ndaty Reke. Vaho hisake nitove tamy ty ondaty Reke. ⁸ Nanetre tegna Reke vaho lasa mpagnina hatramy ty fahafatesa, le iaze fahafatesa ty hazofijalea! ⁹ Noho zay le nasondrotse ty Nadragnahare ambone le ambone avao kea Reke. Nomeine iaze Tahina ze ambone ty tahina iaby Reke. ¹⁰ Nanoene zay soa ho amy ty Tahina ndre Jesosy ro handohaliha ty lohalike iaby, ty lohalike reoze agne an-dagnitse naho etoy an-tane vaho agne ambne ty tane. ¹¹ Nataone zay hagnina ty lela iaby te re Jesosy Kristy ro Tompo, ho asy ty Nadragnahare Rae. ¹² Noho zay, rahalahy, manahake ty agninanareo avao, tsy eo amy ty fagnatrehako avao te mihoatse lavitse kea henanezao lafa tsy eo raho, le asehoy amy ty tahotse naho titike ty famonjea anareo. ¹³ Satria Andragnahare ro miasa ao aminareo soa ho vonogne hanao ro sade hiasa ho ahy ty fifaleane nareo. ¹⁴ Ataovo tsy am-piraigna na fialian-kevitse ty raraha iaby. ¹⁵ Magnamboara manahake zay soa ho avy ana ty Andragnahare tsy misy tsikone naho to, tsy misy kilema nareo. Miasà manahake zay soa hamirapiratanareo manahake ty fahazava eo amy zao tontolo zao, eo agnivo ty taranake meloke naho mahere zaka. ¹⁶ Mipitiha mafe amy iaze Tsara ty fiaigna soa hanagnako antone hireharehà amy ty andro ndre Kristy. Te amy zay le ho haintso te tsy vere maigne ty nilailaisako vaho tsy vere maigne ty niasàko. ¹⁷ Te na le ahike ho fagnatitse eo amy ty soro naho fanompom-pinoa kea raho, le mifale raho, vah miara-mifale aminareo iaby raho. ¹⁸ vaho manahake zay kea ro hifaleanareo, vaho miara-mifale amiko nareo. ¹⁹ Te magnantegna ao amy ndre Tompo Jesosy raho te handefa ahy ndre Timoty agne aminareo malake, soa hahere avao kea raho lafa haintso ty raraha mikasike anareo. ²⁰ Te tsy mana ndaty hafa mitove toe-tsay amine raho, ze vantagne misalasala ty aminareo. ²¹ Te iareo iaby le mipay ty vokan-tsoane, te tsy ty raraha ndre Jesosy Kristy. ²² Te hainareo ty fahamatorane, satria manahake ty ajaja manompo ty raene, ro nanompoane niarake tamiko tao amy ty filazantsara. ²³ Kea magnantegna ty handefa aaze raho laha vao hisako tihoe manao akore ty fandehan-draha atoy amiko. ²⁴ Te matoke ty Tompo raho te ho avy agne malake kea ty vatako. ²⁵ Te mieretseretse raho te paiave avao kea ty mampimpole ahy ndre Epafrodito agne aminareo. Ralahiko reke naho mpiara-miasa ro mpiara-miale, sade mpanday hafatsareo reke ro mpiasa amy ze paiko. ²⁶ Te tra-pijalea mafe reke, vaho mane ty hiarake taminareo iaby reke, satria nareo te narare reke. ²⁷ Te vatane narere reke le saike mate. Te namindra arofo tamine Andragnahare, vaho tsy tamine arere, te tamiko kea, soa tsy hanagnako alahelo ambone ty alahelo. ²⁸ Kea le amim-paharisiha bey iaby ro handefasako aze, lafa hahisake aze ndraeke nareo le soa hifale le ho afake vatane amy ty fisalasalako raho. ²⁹ Rambeso ao amy ty Tompo Epafrodito miarake amy ty fifalea iaby. Iasio ty ndaty manahake aze. ³⁰ Te ho ahy ty asa ndre Kristy ro niariniane ty fahafatesa. Te nanao vy vere ty fiaine reke hanompoa ahike soa hagnatanterahane ze tsy afake nataonareo tamy ty fanompoa tamiko.