¹ Avy tagne andafy ty ranomasy iareo, tao amy ty faritse ndre Gerasena. ² Lafa niala bak'ao amy ty sambokele Jesosy, eo noho eo le nisy lehilhay raeke azo ty fagnahy maloto namonje Aze bak'egne amy ty valavato ³ Nitoboke tegne amy ty valavato toy lehilahy toy, Tsy nisy afake nitanjake aze sase, na le tamy ty silisily. ⁴ Voarohy imaro tamy ty gadra vy maho silisile re. Nitapahane reo silisile vaho potike reo gadra vy. Tsy nisy nana here narohy aze. ⁵ Sake halike naho san'andro tegne amy reo valavato naho tegnyam-bonevohitse, le nikoaikoaike reke vaho nadrasy ty vatane tamy ty vato maragnitse. ⁶ Lafa nahisake ahy ndre Jesosy bak'agne lavitse reke, le nilailay nandeha eo amine vaho nihohoke teo agnoloane. ⁷ Vaho nikoaike tamy ty feo mahere reke tihoe: "Ino moa ro ifandraisako aminao, ry Jesosy, Anagn'Andragnahare Ambone Loatse? Mangatake anao amy ty agnara ty Andragnahare raeke avao raho, ko mampijale ahike." ⁸ Te Reke nitsara tamine tihoe: "Miboaha amy io lehilahy io, fagnahy maloto." ⁹ Vaho Reke nagnontane aze tihoe: "Ia ty agnaranao? Le nivaleane tihoe: "Legiona ro agnarako, satria marobe zahay." ¹⁰ Vaho nangatake mafe tamine avao reke tsy handroake aiereo agne ambalike ty faritse. ¹¹ Vaho nisy antokon-kisoa niroake tegne ambone vohitse, ¹² vaho natangake tamine iareo, nanao tihoe: "Alefaso ao amy reo koso zahay; apoho zahay hizileke ao amy reo." ¹³ Le napone iareo; vaho niboake reo fagnahy maloto le nizilike tao amy reo koso, vaho lasa le nilay tegne amy ty hantsa ho agne andranomasy reo, vaho koso teo amy ty roa arivo teo ro mate an-dromasy. ¹⁴ Nitoake nilay reo namaha ty koso vaho nitatitse ty zaka-niseho tao an-tanà naho tane ambanevohitse vaho ndaty maro ro niboake hivamba ty zaka-niseho. ¹⁵ Bak'eo iareo nandeha eo amy ndre Jesosy vaho hisa iareo iaze lehilahy nitoboha ty demone, iaze raeke ze nitoboha ty legiona, nitoboke teo, nisike vaho vore say; le natahotse iareo. ¹⁶ Reo ze nahisake ty zaka-niseho tamy iaze lehilahy nitoboha ty demone le nitalily tamy iareo ty mikasike zay tamy ty fandeha ty raraha, vaho kea nitalily mikasike reo koso tamy iareo. ¹⁷ Le nanomboke nangatake Aze iareo soa hialane eo amy ty faritse iareo. ¹⁸ Lafa hiakatse tao amy ty sambokele Re, le nangatake tamine iaze lehilahy nitoboha ty demone soa hiarake amine. ¹⁹ Feie tsy nagnenga aze Jesosy, te nanao tamine tihoe: "Mandena moly agne amy ty tragnonao naho ty longonao vaho talilio amy iareo ze natao ty Tompo taminao, naho ty namindrane ty arofone taminao!" ²⁰ Le lasa noly reke vaho nanomboke nagnambara ty zaka-bey ze natao ndre Jesosy tamine tagne Dekapolisy, vaho vere ty iabe. ²¹ Vaho lafa nandeha tegne am-pita ndraeke Jesosy, tamy ty sambokele, le ndreo nisy vahoake lahiale nivore nagnodide Aze, laha teo sisy ty ranomasy igny Re. ²² Bak'eo avy ty raeke amy reo mpitarike ty synagoga, atao tihoe Jairo, le laha vao nahisake Aze, Le niantorake teo an-tombone. ²³ Nitalaho avao reke, nanao tihoe: "Marare mafe fa ho mate ty anak'ampelako. Misoloho aminao raho, avia vaho apoho amine ty tagnanao soa ho afake naho velo re." ²⁴ Le lasa niarake tamine Reke, vaho vahoake lahilahy ro nagnarake naho nanere nagnodide Aze. ²⁵ Vaho nisy ampela raeke teo azo ty fahaverezan-dio agnate ty folo roe ambe tao. ²⁶ NIjale bey vatane re vaho nitsetsike mpitsabo maro naho nandane ty fanagnane iaby, feie tsy nahisake fahasitragna te vao nihalotse niharate. ²⁷ Lafa nahare reo tatitse mikasike andre Jesosy reke, le nandeha tao farane tao ampo vahoake reke vaho nikasike ty fisikinane. ²⁸ Satria nanao tihoe reke: "Laha mahakasike ty lambane avao raho, le ho afake." ²⁹ Lafa nikasike Aze re, le nijano ty fahaverezan-dio, vaho tsapane hatragny ampone te afake tamy ty aretine reke. ³⁰ Hay ndre Jesosy niarake tamy zay te nisy here niala bak'amine. Nitolike tagne amy ty vahoake Reke vaho nitsara tihoe: "Ia ro nikasike ty fisikinako?" ³¹ Le namale Aze reo mpianane tihoe: "Vambanao reo vahoake lahiale mifanosike aminao reo, kea nanao tihoe Riha: " Ia ro nikasike Ahike." ³² Te nivamba magnodide Aze Jesosy soa hahisahane ze nanao zay. ³³ Iaze ampela, nahay ze niseho tamine, le natahotse naho nititike. Nandeha reke vaho niantorake teo agnoloa ndre Jesosy le nitalily tamine ty to iaby. ³⁴ Le nanao tihoe Jesosy tamine: "Anake, ty finoanao ro nahaafake anao. Mandena amy ty fiadagna vaho Afake amy ty aretenao." ³⁵ laha mboe nitsara Rek, le avy ty ndaty sasane bakagne amy ty mpitarike ty Synagoga, nanao tihoe: "Fa mate ty anagnao. Nanao akore ro mboe manahira ty mpampianatse avao?" ³⁶ Te lafa nahajanje ze nitalily iareo Jesosy, le nanao tihoe Reke tamy iaze mpitarike ty synagoga: " Ko matahotse. Minoa avao." ³⁷ Vaho tsy nisy napone hiarake amine, ankoatsy Petera, Jaoba, vaho Jaona, rahalahy ndre Jakoba. ³⁸ Avy tagne an-tragno iaze mpitarike ty synagoga iareo vaho nahisake ndaty nikorakorake bey teo Reke; nitomagne naho nigogogogo mafe iareo. ³⁹ Lafa nizilike ty tragno Reke, le nanao tihoe Reke tamy iareo: "Nanai akore nareo ro mikorakorake naho mitomagny? Tsy mate ty ajaja te matore." ⁴⁰ Nihehy aze iareo. Feie naboakine tagne ambalike iareo iaby vaho nangalake ty raeke naho rene ty iaze ajaja naho reo ze niarake tamine, vaho nizilike tao amy ty efitse nisy iaze ajaja Reke. ⁴¹ NIraisine ty tagna iaze ajaja vaho nitsara tamine tihoe: "Talita, komy!" ze laha adika le tihoe: "Ajaj'ampela, mitsara aminao Raho, mitsangàna." ⁴² Avy hatragne le nitsanga ajaj'ampela vaho nandeha(satria folo roa ambe tao reke). Vere avy hatragne iareo. ⁴³ Niraràne mafe iareo soa tsy hisy na ia na ia hahay ty mimkasike zao. Bak'eo le nangatahine nomea hane ajaj'ampela.