¹ Vaho nanomboke nampianatse teo sisy ty ranomasy ndraeke Re, vaho nisy vahoake bey nivory nagnodidy Aze. nizilike tao an-tsambokele ze teo an-dranomasy Reke, vaho nitoboke tao amy zay. Ty vahoake iaby kea le nijano teo sisy ty ranomasy. ² Nampianatse aiereo zaka maro tamy ty alala ty fagnaohara Reke, vaho tao amy ty fampianarane, le zao ro nitaliliene tamy iareo. ³ Janjigno, nisy mpitoke handeha hitonge voa. ⁴ Vaho laha nitongy re, le nisy voa sasane nirarake tamy ty lala, le avy reo voro vaho nihina zay. ⁵ ty voa ilane nirarake tamy ty tane feno vatovato, ze tsy nisy tane fire, Avy le namake eo no ho eo iareo regne, satria tsy laike ty tane nisy aze. ⁶ te lafa niposake ty masoandro, le nalazo iareo, vaho satria tsy nisy vahane iareo, le maike. ⁷ Ty voa hafa nirarake tamy ty tane feno fatike. Vaho namake niha-bey reo fatike reo le nanery aze, le tsy namoa voa. ⁸ Ty voa hafa nirarake tamy ty tane soa le namokatse voa teo am-pitomboa vaho nihamaro, vaho ty ilane nitombo ty telopolo mihoatse, ty sasane enempolo, vaho ty ilane zato." ⁹ Bak'eo le nanao tihoe Reke: "ze manan-tsofy handesy mijanje, lonike re hijanje!" ¹⁰ Lafa arere Jesosy, le nagnontane Aze mikasike io fagnohara io reo ze marine Aze naho reo mpianane folo roa ambe. ¹¹ Nanao tihoe Reke tamy iareo: "Ho anareo ro nagnomeza ty zaka-mivone ty fanjaka ty Andragnahare. te ho ahy reo ze agne ambalike le fagnohahara iaby, ¹² soa amy ty fotoa hagnetea iareo, eka hignete iareo, feie tsy hahisake, vaho soa amy ty fotoa hijanjigna iareo, egne hahajanjy iareo, feie tsy hahay zay, na kea hiodike iareo le hamindra arofo amy reo Andragnahare." ¹³ Vaho nanao tihoe Re tamy iareo: "Tay azonareo vao zay fagnohara zay? Nanao akore avao ro hahazoanareo reo fagnohara hafa iaby? ¹⁴ Iaze mpambole ze mitoke ty voa le iaze raeke ze mamafe ty tsara. ¹⁵ Reto ro iazenirarake tegne an-dala, ze nitongise ty tsara, te lafa janjy iareozay, le avy Satana vaho hanagalatse ty tsara ze voatonge tamy iareo. ¹⁶ Reto ro iaze voatonge tamy ty tane feno vatovato, ze, lafa nahajanje ty tsara, le nandrambe zay eo no ho eo tami-pifalea. ¹⁷ Tsy misy vahane ao amy iareo reke, te maharitse fotoa fohike avao. Le avy ty fahoria na ty fagnenjeha noho ty tsara, le eo no ho eo le lavo iareo ¹⁸ Reo hafa ro iaze voatongy tamy ty tane feno fatike. Janjy iareo ty tsara, ¹⁹ te ty fisalasala zao tontolo zao, ty famitaha ty hanagna, naho ty fimpiava ty raraha hafa le tafilitse le nanery ty tsara, le tsy mamoa vokatse zay. ²⁰ Vaho reo ze voatongy tegny amy ty tane soa le reo ze mandre ty tsara vaho mandrambe zay, le namoa vokatse iareo_ telopolo, enempolo, na mihoatse zato ambone ze tinongy." ²¹ Jesosy nitsara tamy iareo tihoe: "Nao andesinao ao an-tragno vao ty jiro soa ho atao ao ambane haro, na ambane ty fandrea? Andesinao mizilike zay le hanoenao ambone ty fitobohan-jiro. ²² Te tsy misy zaka-mivone ze tsy ho hay, vaho tsy misy tsiambaratelo ze tsy hiboake. ²³ Laha misy manan-tsofy handesy mijanje, lonike reke hijanje!" ²⁴ Nanao tihoe Re tamy iareo: "Mitoa amy ty tsara ze janjinareo, te arakarake ty ohatse anoharanareo avao, ro anohara anareo, vaho ho amea aminareo zay. ²⁵ Satria na ia na ia mana, le hone maro vatane reke, vaho na ia na ia tsy mana, na ze anagnane kea hafaha amine." ²⁶ Vaho nanao tihoe avao Reke: "Ty fanjaka ty Andragnahare le manahake ty ndaty raeke hafa mitongy ty voane amy ty tane. ²⁷ Matory reke amy ty halike mifoha amy maraindray, vaho ty voa le mamake le mitiry, te tsy haine tihoe manao akore. ²⁸ Ty tane le mamoa amy ty vatane avao: Voalohane ty rantsane, bak'eo ty tahone, bak'eo ty voa matoe eo amy ty tahone. ²⁹ Vaho lafa matoe ty voa le lasa reke le handefa fijinjagna, te fa avy ty fotoam-pijinjagna." ³⁰ Vaho nanao tihoe ndraeke Reke: "Ino ro azontika ampitovize ty fanjaka ty Andragnahare, na ino ro fagnohara hampiasantika hagnazava zay? ³¹ Zane le manahake ty voatsinampe ze, lafa hitongy, le re ro voa kele loatse amy ty voa iaby etoy ambone ty tane. ³² Feie, lafa voatonge zay, le mamake vaho lasa bey noho ty hetae iaby, vaho mamoa rantsa befoloay, le azo ty voromitily hanaova ty tagnone eo amy ty alokalone." ³³ Vaho fagnaohara maro manahake zay ro nagnamabarane ty tsara tamy iareo aze, ³⁴ vaho tsy nitsara tamy iareo ankoatsy tamy ty fagnohara Reke. Feie lafa arere Reke, le nihazavaine tamy reo mpianane manoka ty raraha iaby. ³⁵ Tamy zay andro zay, lafa avy ty halike, le nanao tihoe Reke tamy iareo: "Ndao tika hiampita eroy am-pita." ³⁶ Le niala teo amy reo vahoake iareo, nanday ahy ndre Jesosy niarake tamy iareo, laha igny Reke, tao ampo ty sambokele igny. Nisy sambokele hafa nandeha niarake tamine. ³⁷ Bak'eo nanomboke nisy tafio-tioke bey vaho ty onjan-drano nanafotse ty sambokele le fa saike feno rano ty sambokele. ³⁸ Vaho Jesosy arere natory teo ambody ty sambokele, tambone ty onda. NIfohaze iareo Reke, nanao tihoe: "Mpampianatse, tsy mampanino Anao zao laha ho mate eto tika?" ³⁹ Laha nifoha Reke, le nitsara mafe tamy ty tioke, vaho nitsara tamy ranomasy tihoe: "Mitofa! milamina!" Vaho nitofa ty tioke, le nisy filamina bey. ⁴⁰ Vaho nanao tihoe Reke tamy iareo: "Nanao akore nareo ro matahotse? Mboe tsy manam-pinoa avao vao nareo?" ⁴¹ Feno tahotse iareo le nifampitsara tihoe: "Ia moa toy, te na ty tioke naho ty ranomasy kea magneke Aze?"