¹ Zao ro lalàgna amy ty fagnatitse noho ty heloke. Zane ro masy loatse. ² Lonike iareo hamono ty fagnatitse noho ty heloke eo amy ty toera famonoa zane, vaho lonike iareo hanaparitake ty lio sake ty lafy ty alitara. ³ Ty Sabora iaby eo amy zane le ho omea: ty rambo vodrake, ty sabora zay magnodidy ty ao ampone, ⁴ ty voa roe naho ty sabora eo amy zane, ze marinike ty valahane, vahi zay mandrakotse ty aty, miarake amy reo voa__le lonike ho afaha iaby zane iaby zane. ⁵ Lonike hagnoro reo faritse reo eo amy ty alitara ty mpisoro soa ho fagnatitse natao tamy ty afo ho ahy Yaveh. Zane ro fagnatitse noho ty heloke. ⁶ Ty lehilahy kiraikiraike eo amy ty mpisoro le lonike hitava ty ampahane amy io fagnatitse io. Lonike hotavae eo amy ty fitoera nasy zane satria masy loatse. ⁷ Manahake ty fagnatitse noho ty heloke ty fagnatitse noho ty haratia. Mitovy ty lalàgna mihatse amy iareo. Reo le ahy ty mpisoro zay manao fagnavaha amy iareo. ⁸ Ty mpisoro zay magnomey fagnatitse oroa ty ndaty le tokone hana ty ankozy zane soro zane ho aze. ⁹ Ty fagnatitse voa iaby zay niketrehy tao ampo laforo, naho ty fagnatitse manahake zane iaby zay nandesy tamy ty lasitse fagnendasa na niketrehy tamy ty lasitse fiketreha le ho ahy ty mpisoro zay namey zane. ¹⁰ Ty fagnatitse voa iaby, na maike na nafangaro tamy ty menake, le ho ahy ty tarana ndre Arona iaby avao kea. ^{11 11} Zao ro lalàgna amy ty soro ty fagnati-pilongoa zay hamea ty ndaty ho ahy Yaveh. ¹² Laha misy magnatitse zane soa ho fagnomezam-pisaora, le lonike re hagnomey zane miarake amy ty soro ty mofo tsy misy lalivay feie nafangarao tamy ty menake, yty mofo tsy misy lalivay, feie mihosotse menake, vaho ty mofo natao tamy ty koba soa lisa zay nilaroy tamy ty menake. ¹³ Ao ampo ty tanjo ty fagnomezam-pisaora avao kea, le lonike re hagnomey ampempa-mofo nasia lalivay miarake amy ty fagnati-pilongoane. ¹⁴ Loniek re hagnomey karazane raike bak'amy reo soro reo ho fagnatitse haseho eo amy Yaveh. Ho ahy ty mpisoro zay nanaparitake ty lio ty fagnati-pilongoa teoa amy ty alitara zane. ¹⁵ Lonike iaze ndaty zay maneho ty fagnati-pilongoa soa ho fagnomezam-pisoro hitava ty hena ty fagnatitsine amy ty andro ty soro. Lonike tsy hapipoke sisa amy zane mandra-pahamaraindray ty andro re. ¹⁶ Te laha ho amy ty sareke ty soro ty fagnatsine, na ho ahy ty fagnatitse an-tsitrapo, le lonike hohany amy ty andro zay hagnaterane ty sorone ty hena, te na ino na ino mete ho sisa amy zane le azo hane ty hamaray igny. ¹⁷ Na zane kea, na ino na ino hena ty soro taveka amy ty andro fahatelo le lonike ho oroa. ¹⁸ Laha misy hena ty soro amy zay fagnati-pilongoa nihane amy ty andro fahatelo, le tsy ho inay zane, na ho tagna zay nagnomey zane. Ho zaka mamparihy zane, vaho ty ndaty ze mihina zane le handay ty heloke ty otane. ¹⁹ Zay hena mikasike raraha maloto le lonike tsy hohane. Lonike horoa zane. Ty amy ty sisa ty hena, le azo reo ndaty malio hohane zane. ²⁰ Na zane kea nefa, ze ndaty maloto mihina hena bak'amy ty soro ty fagnati-pilongoa ze ahy Yaveh__le lonike zane ndaty zane afaha eo amy ty vahoakine. ²¹ Laha misy ndaty mikasike raraha maloto__na fahalotoa ty ndaty, na biby maloto, na raraha maloto na mamparihy hafa, vaho laha mitava tamy iaze soro ty fagnati-pilongoa zay ahy Yaveh re bak'eo, le lonike zane ndaty zane ho afaha eo amy ty vahoakane.'" ²² Vaho nitsara tamy ndre Mosesy Yaveh, nanao tihoe: ²³ "Mirehafa amy ty vahoagn'Israely vaho talilio tihoe: 'Lonike nareo tsy hihina ty sabora ty aomby na aondre na aose. ²⁴ Ty sabora ty biby zay maty tsy tamin-tsoro, na ty saboro ty biby nirasarasa ty bibily, le azo ampisay amy ty raraha hafa, te lonike nareo tsy hihina zane vantane. ²⁵ Na ia na ia ndaty mitava ty sabora ty biby zay mete atao ty ndaty ho soro natao tamy ty afo ho ahy Yaveh, le lonike hafaha amy ty vahoakane zane ndaty zane. ²⁶ Lonike nareo tsy hitava lio na bak'amy ino na bak'amy ino ao ajombanareo, na bak'amy voro zane na biby, ²⁷ Na ia na ia mihina lio, le lonike ho afaha eo amy ty vahoakane zane ndaty zane.'" ²⁸ Kea niresake tamy ndre Mosesy Yaveh vaho nitsara tihoe: ²⁹ " Miresafa amy ty vahoagn'Israely vaho talilio tihoe: 'Lonike handay anjara soro ho ahy Yaveh zay magnatitse ty fagnatitsy sorom-pilongoa ho ahy Yaveh. ³⁰ Ty fagnatitse ho ahy Yaveh zay hatao amy ty afo, le lonike ty tagnane avao ro handay zane. Lonike re handay ty sabora miarake amy ty aragnane, le lonike hahelahela ho fagnatitse ahelahela eo agnoloa Yaveh zane. ³¹ Lonike ty mpisoro hagnoro ty sabora eo amy ty alitara, te ty tratrane le ahy ndre Arona naho reo taranane. ³² Lonike homeinareo ty mpiosro ty feine havana ho fagntitse aseho ao amy ty soro ty fagnati-pilongoanareo. ³³ Ty mpisoro, raike amy reo tarana ndre Arona, ze magnomey ty lio ty fagnati-pilongoa naho ty sabora__le hahazo ty feine havana re hanahake ty anjarane amy ty fagnatitse. ³⁴ Te fa nira,besiko tamy ty vahoagn'Israely, ty tratra ty fagnatitse ahelahela, naho ty feine zay fandrambesa anjara, vaho reo le nomea ahy ndre Arona mpisoro naho reo anandahine ho anjara mahazatse ho aiereo. ³⁵ Zane ro anjara ho ahy ndre Arona naho ty taranane bak'amy ty fagnatitse natao tamy ty afo ho ahy Yaveh, tamy ty andro zay nagnomeza ndre Mosesy aiereo soa hanompo ahy Yaveh amy ty asa maha mpisoro. ³⁶ Zane ro anjara zay nandilia Yaveh homey aiareo bak'amy ty vahoagn'Israely, tamy ty andro nagnosorane ty mpisoro. Zane avao ro ho anjara iareo hatrammy ty tarana fara-mandimby. ³⁷ Zane ro lalàgna amy ty fagnatitse oroa, amy ty fagnatitse zoa, amy ty fagnatitse noho ty haratia, amy ty fagnatitse noho ty heloke, ty fagnati-pilongoa, ³⁸ zay fa nagnomeza Yaveh lily ahy ndre Mosesy teo am-bohitse Sinay tamy ty andro zay nandiliane ty vahoagn'Israely soa hagnomey ty soro iareo ho ahy Yaveh tagne an-tane tsy misy raraha ndre Sinay.'"