¹ Nitsara tamy ndre Mosesy Yaveh, nanao tihoe: ² "laha misy ndaty manao raty vaho mandika ty lalàgna manohitsy ahy Yaveh, manahake ty tihoe mifagnarake ambalike miarake amy ty namane mikasike ty raraha ze nankiny tamine, laha mamitake re na mandrava aze, na nampijaly aty namane, ³ na nahisake raraha zensria ty namane le mavandy ty amy zane, vaho mifanta amy ty vande, na ty amy reo raraha manahake ty nanaovane rate ty ndaty, ⁴ le, laha manao raty re le meloke, le tsy maintse hampimpoly zay iaby nalaine tamy ty alala ty fandrava na fampijalea na nangalake zay nankiny tamine na raraha zery la hisake ndraike. ⁵ Na navande ty amy ty zaka-iaby re, le tsy maintse hampimpoly iaby zane vaho tsy maintse hagnampe raike am-pahadimy hagnavaha amy ze tompo zane, amy ty andro zay naha meloke aze. ⁶ Le tsy maintse handay ty fagnati-pagnavahane ho ahy Yaveh re: aondre lahy tsy misy hnadra bak'amy ty aondre amy ty aose zay maeva ty vatovato ty viline, ho fagnati-pagnavaha ho ahy ty mpisoro. ⁷ Hanao fagnavota ho aze eo agnoloa Yaveh ty mpisoro, vaho voavela amy zay iaby nahaavy azy ho meloke amy ty nataone re." ⁸ Le nitsara tamy ndre Mosesy Yaveh, nanao tihoe: ⁹ "Lilio re Arona naho reo anane talilio tihoe: 'Zao ro lalàgna ty fagnatitse oroa: Tsy maintse eo ambone toko ty alitara agnate ty halike iaby zisike maraindray ty fagnatitse oroa, vaho ty afo ty alitara le havela hirehitse avao. ¹⁰ Hanao ty akanjo rongone fote ty mpisoro, vaho hanao ty atin'akanjo rongone fotine kea re. Hankalgakae reo lavenoke zay tavela tafara ty nandevagna ty afo ty fagnatitse oroa eo ambone alitara re, vaho hametrake reo lavenoke eo agnila ty alitara. ¹¹ Hangalake reo fisikina re vaho hampizilike reo akanjone hafa soa handay reo lavenoke hiboake ty kianja ho agne amy ty toera zay malio. ¹² Ty afo eo amy ty alitara le hapoke hirehitse avao. Loniek tsy hiboake zane, vaho reo mpisoro le hagnoro hetae eo ambony zane sake-maraimdray. handamy ty fagnatitse oroa arake ze take amy zay re, vaho hagnoro ty sabora ty fagnati-pilongoa re. ¹³ Apoke hirehitse eo ambone alitara zisikam-parane ty afo. Lonike tsy hiboake zane. ¹⁴ Zao ro lalàgna ty fagnatitse voa. Hagnomey zane eo agnoloa Yaveh magnoloa ty alitara anandahy ndre Arona. ¹⁵ Hangalake koba soa lisa feno ty tagna amy ty fagnatitse voa naho amy ty menake vaho liten-ketae magnitse zay eo amobone ty fagnatitse voa ty mpisoro, vaho hangnoro zane eo ambone alitara soa hampiboake fofo magnitse manahake ty fagnati-pahatiarova zane. ¹⁶ Hitava ze sisa amy ty fagntitse ndre Arona naho reo anandahine. Tsy maintse hotavae tsy misy lalivay ao amy ty fitoera masy zane. Hitava ao amy ty kianja ty ajomba-lay fiahaogna iareo. ¹⁷ Lonike tsy handrahoe miarake amy ty lalivay zane. Nomeiko ho anjara iareo amy ty fagnatitso natao tamy ty afo zane. Masy loatse zane, manahake ty fagnatitse noho ty haratia vaho fagnati-pagnavaha zane. ¹⁸ Te agnate reo fotoa iaby hiavia reo taranakao fara mandimby, reo taranake lahy sasane bak'amy ndre Arona le lonike hitava zane manahake ty fizaràne, nala bak'amy reo fagnatitsy Yaveh natao tamy ty afo. Na ia na ia mikasike zane le ho lasa masy."' ¹⁹ Le nitsara tamy ndre Mosesy ndraike Yaveh nanao tihoe: ²⁰ "Zao ro fagnatitse ndre Arona naho reo anandahine, zay homey iareo ahy Yaveh amy ty andro zay hagnosora reo anandahy iaby: ty ampahafolo ty efaha raike amy ty koba soa lisa ho fagnatitse voa fatao mahazatse, antsasane amy zane amy ty maraindray vaho ty antsasane amy zane amy ty hariva. ²¹ Ho vita amy ty menake agnate lasitse mofo zane. Lafa vonto menake zane, le ho andesinao mizilike. Voaende ro hagnomezanao ty fagnatitse voa soa hamoake hagnitse mora mora ho ahy Yaveh. ²² Ty anandahy ty mpisorobey zay lasa ho mpisorobey vaovao amy reo anandahine ro hagnomezane zane. Arake ty fa nandilia nanomboky zay, le horoa ho ahy Yaveh iaby zane. ²³ Ty fagnatitse voa ty mpisoro le ho oroa iaby. Lonike tsy hotavay zane." ²⁴ Nitsra tamy ndre Mosesy ndraike Yaveh, nanao tihoe: ²⁵ "Mirehafa amy ndre Arona naho reo anandahine, manao tihoe: "Zao lalàgna ty fagnatitse noho ty haratia: Ty fagnatitse noho ty haratia le tsy maintse vonoe eo amy ty toera zay namonoa ty fagnatitse oroa eo agnolo Yaveh. Zane ro masy loatse. ²⁶ Ty mpisoro zay hagnomey zane ho ahy ty haratia le hitava zane. Tys maintse ao amy ty kianja ty ajomba-lay fihaogna zane. ²⁷ Na ia na ia mikasike ty hena zane le ho lasa masy, vaho laha misy lio mipitsike amy ty akanjo, le tsy maintse sasa agne amy ty toera masy ty farirse ze nipitihane. ²⁸ Te ty valagny tanimanga zay nampandeveze zane le hovakine. Laha nampandeveze tampo valagne saba zane, le lonike hokosehy naho hosasa malio amy ty ranozane. ²⁹ ty lehilahy sasane amy reo mpisoro le mahazo moitava amy zane satria masy loatse zane. ³⁰ Te laha misy fagnatitse noho ty haratia le andesy ao amy ty ajomba-lay fihaogna soa hanaova fagnavaha ty lione le lonike tsy hotavae. Lonike horoa zane.