¹ Fa tsy nahafale andre Jona zay ka naha meloke mafe aze. ² Naho izay le nivavake tamy Yaveh ty Jona vaho nanao tihoe: "Oh gea Yaveh, tsy izao vao rie ro fa vinolako taminao lahafa tafahere tagne amity fireneko raho? Izay ro antone nihetsehako voalohane naho niezahako hilay ta Tarsisy agne-satria haiko fa Zagnahare manan-kanagnam-pahasoava, mahare-po, malay nko meloke, feno fahatokia, vaho manegne amity fandefasa loza riha. ³ Kea amizao are, Yaveh, mangatake aminao raho, afaho amiko ty aiko, fa soa ho ahy ty ho mate toy izay ho velo. ⁴ Hoe Yaveh tihoe: "Mete vao ze siakenao losotse zao?" ⁵ Le niboake ty tana ty Jona vaho nitoboke tegne amy iaze antignana ty tanaay. Tane ro nanovane fialofa ka nitoboke tambane ty alo gnizay ze mba hahisahane ze mete hahazo ty tana. ⁶ Nagnoma hetae ty Yaveh Zagnahare ka nampitiry izay tambone i Jona hagnaloke ty lohane mba hagnamaiva ty fijaleane. Tena fale vatane ty Jona naho ty amy hetaey. ⁷ Feie nagnoma soko ty Zagnahare tamity tsirikandro ty hamaray maraindray. Namango ty hetae zay ka le maike i hetaey. ⁸ Vaho lahafa niboake ty masoandro ty hamaray maraindray, le nagnoma tio-may bak'antignana ty Zagnahare. vaho kea, namango ty loha i Jona ty masoandro kale lane here re. Le nagniry ty himatezane ty Jona. Hoe re tamity vatane tihoe: "Aleoko mate toy izay ho velo." ⁹ Vaho hoe ty Zagnahare tamy Jona: "Mete vao ze siakenao bevata ty amy hetaey zao?" Le hoe ty Jona tihoe: "Mete ty siakenao, na ho amity fate aza." ¹⁰ Hoe Yaveh tihoe: "Niferenay i hetaey riha, ze tsy niasagnao, na nampagnirienao. Nagniry tagnate ty hale ndraike zay vaho mate tagnate ty hale ndraike. ¹¹ Manahake izay kea ty amiko, tsy tokone hiferenay ani Ninive, iaze tana bevatay, ze misy vahoake mihoatse ty zato naho roa ale ze tsy mahay ty mahasambe hafa amity tana ankavana eo naho ty tana ankavia gniereo, naho reo biby fihare maro avao kea vao raho?"