¹ Vaho niavy tamy Jona fagnidroane ndraike ty tsara nanao tihoe: ² "Mitsangana, mandehana mba Ninive mbeo, iaze tana bevatay, vaho volagno amine ty hafatse ze andiliako anao." ³ Vaho le nitsanga ty Jona ka nimba Niniva mbeo tamity fagnekea ty tsara Yaveh. Vaho Ninive le tana bevata vatane, lalan-draike agnate ty telo andro. ⁴ nanomboke nilitse ty tana ty Jona vaho tafara ty lala andro raike le nikaike mafe re vaho nivola tihoe: "Horava ty Ninive agnate ty efapolo andro." ⁵ Nino an'Agnahare ty vahoake ta Ninive ao vaho nikaike fifalean-kane iereo. Nanao lamba fandala iaby iereo iaby, zisikamity bevata vatane ka zisikamity kele vatane amy gniereo. ⁶ Tsy ela le niavy tamity mpanjaka i Ninive eo i vaovaoy. Le nitsanga bakeo amity seza fiambenane re, nanosotse ty sikin-kasine, ka nandrakoke ty vatane tamity siky fandala, vaho nitoboke tan-davenokeo. ⁷ Nandefa fitalilia dreke nivola tihoe: "Eto Niniva, amity fahefa ty mpanjaka naho ndaty mana-kasy, ao tsy hisy ndaty na biby, agnombe na agnondry aman'ose, hampagneno raraha. Ao tsy hihina iereo, na hino rano. ⁸ Fa ao ty biby naho ty ndaty hisiky lamba fandala vaho ao iereo hitoreo mafe amy Nagnahare. Ao ty kiraidraike sambe hiala amity lalan-dratine naho amity hereloha ze an-tagnane eo. ⁹ Ia ty mahafantatse? Mete hanegne avao ty Zagnahare ka hiova hevetse vaho hiala amity siakene ka tsy lany tika." ¹⁰ Hisa Nagnahare ty nanoe gniereo, fa niala tamity lalan-dratine iereo. Naho izay le niova hevetse ty Zagnahare ty amity fagnafaiza ze vinolane hanoene amy gniereo, ka tsy nanoene zay.