¹ vaho tao afara zane raraha zane, le nisy nitalily tamy ndre Josefa tihoe: "Ingo, marary babanao." Le nandesine niarake tamine ty anane mirahalahy, Menase naho Efraima. ² Lafa nitalilia Jakoba tihoe: "Ingo, Josefa anandahinao avy hivamba anao," le namory here Israely le nirene nitoboke teo am-pandreane. ³ Nanao tihoe Jakoba tamy ndre Josefa: "Andragnahare Tsitoha fa niseho tamiko tagne lozy tagne amy ty tane Kanana. Nitsi-pirano ahike Re ⁴ le nanao tamiko tihoe: "Ingo, hampamokatse, naho hahamaro anao Raho. hahaavy firenana maro bak'aminao Raho. Le homeiko ty taranagnao toy tane toy ho fanagna zisikam-parane.' ⁵ Vaho reo anagnao mirahalahy, zay terake ho anao teto Egypta taloha ty namonjeako anao ho eto Egypta, le ahike. Efarima naho Manase le ho ahike, manahake ty ahike andre robena naho Simeona. ⁶ Ajaja terake afara iareo ro ho anao; ho isafy iareo ty agnara reo rahalahine arake ty lova iareo. ⁷ Vaho iraho, laha raho bak'agne Padana-Arama, le mate teo agnatrehako tegne an-dala tagne amy ty tane Kanana re Rahely, laha kele sisa ro ty nahaavy anay tao Efrata. Naleveko tegne an-dala ho agne Efrata reke" (zay atao tihoe, Betlehema). ⁸ Kea lafa hisa ndr'Israely reo anagne ndre Josefa, le nanao tihoe re: "Nao gnan'ia reto?" ⁹ Le nanao tihoe Josefa tamy babane: " Anako reo zay nomey Andragnahare ahike tatoy." Le nanao tihoe Israely andeso magn'amiko atoy iareo, soa honipaziko rano aze." ¹⁰ Vaho fa nanjavo ty maso ty Israely noho ty hahantitsine, le tsy afake mahisake re. Le nampamonje ndre Josefa aze iareo noho zane, le nagnoroke naho nandrakoke aiereo reke. ¹¹ Nanao tihoe Israely tamy ndre Josefa: "Tsy nieretseretse ty hahisake ty vatagnao ndraike raho, feie napon'Andragnahare ho hisako na ty anagnao." ¹² Le nafaha ndre Josefa teo ampagnivoa ty ongone ty Israely iareo, vaho nandohalike tamy ty tane reke. ¹³ Le nafa ndre Josefa ie mirahalahy, Efraima teo an-tagnan-kavanane ho eo an-tagnan-kavia ty Israely, vaho Manase teo an-tagnan-kaviane magnatrike ty tagnan-kavana ty Israely, le nanday aiereo soa harine aze. ¹⁴ Le navelatsy ty Israely ty tagnane havana le napone teo ambony ty loha ndre Efraima, iaze zaine, vaho ty tagnane havia teo ambony ty loha ndre Manase. nafamadine ty tagnane, satria Manase ro taolagnolo. ¹⁵ Le nitsi-piranoandre Josefa Israely, le nanao tihoe: " Iaze Andragnahare zay nandeha tro aolo ndre Abrahama naho Isaka, iaze Andragnahare zay nitahy ahike zisik'amy henanezao, ¹⁶ iaze anjele zay niaro ahike tamy ty rate iaby, hitahy reto ajaja lahy reto. Ho tonogne ao amy iareo vatagne ty agnarako, vaho agnara ndre Abrahama naho Isaka razako. Holahialy eto an-tane vatagne iareo." ¹⁷ Kea lafa hisa ndre Josefa te napo ty babane teo amy ty loha ndre Efraima ty tagnane an-kavana, le tsy tea zane reke. Le nafahane tsy ho eo amy ty loha ndre Efraima ty tagna ty babane le nafalone teo ambony ty loha ndre Manase. ¹⁸ Le nanao tihoe Josefa tamy ty babane: "Tsy zao ro ie, babako; te itoy ro taolagnolo. apoho eo ambony ty lohane ty tagnanaop an-kavana." ¹⁹ Le tsy nagnina ty babane le nanao tihoe: "Haintso, ty anako, haintso. Ho avy firenena, naho ho avy befolay avao kea re. Vaho ty zaine kea le ho befoloay noho re, vaho ho avy firenena maro ty taranagny." ²⁰ Zao tsara zao ro nitsaza Israely rano aiereo tamy zane andro zane: "Amay ty agnaranareo ro hanognona ty vahoagn'Israely fitahia hanao tihoe: 'Andragnahare vatagne hahaavy anareo manahake andre Efraima naho Manase.'"Zane ro fomba, nametraha Israely andre Efraima ho eo aolo ndre Manase. ²¹ Nanao tihoe Israely tamy ndre Josefa: "Ingo, fa ho mate raho, feie Andragnahare hiaro anao, vaho handay anao himpoly agne amy ty tane reo razanao. ²² Ho anao, zay ambone noho re rahalahinao, le omeiko anao ty zaratane ze nalako tamy ty Amorita tamy ty mesako naho ty kiditsiko."