¹ Vaho ty menarana le mahihitsy loatse noho ty bibili iaby teo amy ty baibo zay namboary Yaveh Andragnahare. Vaho nanao tihoe re tamy ty ampela: "Vantane nitalily vao Andragnahare tihoe: 'Tsy azonareo hitava ty hetae iaby ao amy ty baibo?'" ² Le nanao tihoe ampela igny tamy iaze menarana: "Azonay hitava ty voa ty hetae ao am-baibo, ³ te momba ty hetae zay eo ampagnivoa ty baibo kea, le nanao tihoe ty Andragnahare: ' Tsy azonareo ataoa ty mitava zane, na mikasike zane, sao ho maty nareo.'" ⁴ Nanao tihoe iaze menara tamy ty Ampela: "Tsy ho maty zane nareo. Tsy ho maty zane nareo. ⁵ Te hay ty Andragnahare te amy ty andro hitavanareo zane le hahirayse ty fajonareo, mahay ty soa naho ty raty." ⁶ Lafa hisagny ty ampela te soa ho hany ty hetae, sady nahafinaritse ty maso, vaho iaze hetae le nampagniry te mampahendre, le nangalake ty sasane tamy ty voane re le nitava zane. Bak'eo nomeine avao kea ty valine zay niarake tamine, le nitava re. ⁷ Nahisake ty maso iareo, le hay iareo te nihalo iareo. Nanjaitse ravy ty aveavy nakamba iareo vaho nagnamboatse fisikina ho ahy ty vatane. ⁸ Nahare ty feo Yaveh Andragnahare nandehandeha tao amy ty baibo iareo laha malomaloke igny ty andro, le nilietse ty fagnatreha Yaveh Andragnahare tei amy reo hetae ty baibo ty lehilahy naho ty valine. ⁹ Nikaike ahy ty lehilahy Yaveh Andragnahare le nanao tamine tihoe: "Aia iriha?" ¹⁰ Nanao tihoe ty lehilahy: "Naheno Anao tao am-baibo raho, le natahotse raho, satria nihalo. Noho zane le nivony raho." ¹¹ Nanao tihoe ty Andragnahare: "ia ro nitalily taminao te nihalo iriha? Nao iriha vao nitava bak'amy iaze hetae zay nandiliako anao tsy hitavà? ¹² Nanao tihoe ralehilahy: "Ty ampela zay nomeinao hiarake amiko, reke ahike ty voa bak'amy iaze hetae, le nihina zane raho." ¹³ Vaho nanao tihoe Andragnahare tamin'ampela igny tihoe: "Ino raha nanoenao zao?" Nanao tihoe ampela igny: "Navande tamiko ty biby lava, le nihina raho." ¹⁴ Le nanao tihoe Yaveh Andragnahare tamy iaze biby lava: "satria nanao zao iriha, le iriha raike ro voaozo amy ty biby fihare naho ty bibi-ly ty baibo iaby. Amy ty tronao ro handehananao vaho leboke ro fihinanao amy ty andro iaby hiaignanao. ¹⁵ Hasiako fifandrafia eo aminao naho ty ampela, vaho eo amy ty taranakao naho ty taranagne. Hanorotoro ty lohanao re, vaho iriha kea hanorotoro ty tondrobein-tombone." ¹⁶ Le nanao tihoe Re tamin'ampela iagny: "Hampitomboiko ty fanaintaignanao laha misamake; amy ty fanaintaigna ro hisamahanao reo anagnao. Ty fagnirianao le ho ahy ty valinao, te re kea hanapake eo aminao." ¹⁷ Le nanao tihoe Re tamy ndre Adama: "Satria niheno ty feo ty valinao iriha, vaho nitava tamy ty hetae, mikasiky zy nandiliako anao, titihoe: 'Tsy azonareo hihinana zane,' le voaozo ty tane noho ty aminao amy ty alala ty asa feno fanaintaigna ro hihinanao bak'amy zane amy ty andro iaby hiaignanao. ¹⁸ Hamokatse fatike naho songosongo ho anaozane, vaho hihina reo zaka-mitiry ty baibo iriha. ¹⁹ Amy ty lignitsy ty vatanao ro hihinanao mofo, mandra-piholianao amy ty tane, te bak'amy zane ro nangala anao. Te leboke iriha, vaho mboe holy leboky ndraike." ²⁰ Eva ro natao ty lehilahy igny ty agnaram-baline satria reke ro rene ty mana-piay iaby. ²¹ Le nagnamboara Yaveh Andragnahare akanjo holitse re Adama naho ty valine le nampisiky aiereo. ²² Le nanao tihoe Andragnahare tihoe: "Amy henany zao le fa nanjary manahaky ty raiky amintika lehilahy igny mahay ty soa naho ty rate. Kea amy henany zao le tsy azone atao ty mamelatse ty tagnane, mangalake bak'eo amy ty hetae ty fiay, hihina zane, le ho velo zisikam-parane. ²³ Le noho zane le niroahy Yaveh Andragnahare hiala tao amy ty baibo Edena re, soa hiasa ty tanezay nangala aze. ²⁴ Zane le niroasy ty Andragnahare hiala ty baibo ty lehilahy, vaho napipoke kerobima teo atignana ty baibo Edena Re, vaho meso meso mirehits'afo zay mihodikodike, soa hiamby ty lala mandeha agne amy ty hazo ty fiay.